Pamangkot sang mga Pamatan-on . . .

Ano Kon Wala Ako Ginasupurtahan sang Akon mga Ginikanan sa Akon Relihion?

MADAMO nga Cristianong pamatan-on ang may mga ginikanan nga ditumuluo. “Ako lamang ang nagatuon sang Biblia sa akon pamilya,” siling sang isa ka 12-anyos nga lin-ay. “Kag luyag ni mom nga mag-untat ako sa pagtuon.” Ang iban may mga ginikanan nga wala nagapanguna sa espirituwal. Ining mga kahimtangan isa ka matuod nga pagtilaw para sa sinsero nga pamatan-on nga luyag mag-alagad sa Dios.

Ang pagtinguha nga mangin isa ka matuod nga Cristiano nga wala sing bulig kag pagpalig-on sang mga ginikanan mabudlay. Apang mahimo ikaw magmadinalag-on! Madamo nga halimbawa, sang una kag sa karon, ang nagapamatuod sa sina.

Matutom nga mga Pamatan-on sang Panahon sang Biblia

Binagbinaga si Abel, ang anak nga lalaki sang unang mag-asawa, nga sanday Adan kag Eva. Dapat kuntani nga ginhatagan nanday Adan kag Eva ang ila mga anak sing himpit nga supurta sa espirituwal. Apang nagrebelde sila kag nagtalikod kay Jehova, ginpabay-an ang ila mga anak nga magdesisyon sa ila pagsimba. Sa baylo nga maluoy sa iya kaugalingon ukon tugutan ang kakulang sing espirituwalidad sang iya mga ginikanan nga paluyahon ang iya pag-apresyar sa balaan nga mga butang, mahimo gid nga gintun-an ni Abel ang tanan nga masarangan niya nahanungod sa Manunuga. Si Jehova nagkomunikar sa mga anak ni Adan, nga sanday Cain kag Abel, kag si Abel nakatukod sing kaangtanan sa Dios kag nangin isa ka tawo sang pagtuo sang magdaku sia. “Bangod sa pagtuo si Abel nagdulot sa Dios sing halad nga maayo pa sang sa kay Cain, kag paagi sa sini nga pagtuo ginpamatud-an niya ang iya kaugalingon nga matarong.”​—Hebreo 11:​4; Genesis 4:​2-15.

Si Josias isa pa ka halimbawa sang isa ka pamatan-on nga wala sing relihioso nga supurta gikan sa iya mga ginikanan. Ang iya amay, si Hari Amon sang Juda, ginpatay sang si Josias otso anyos pa lamang. Sang buhi sia, si Hari Amon ‘naghimo sing malaut sa mga mata ni Jehova, subong sang ginhimo ni Manases nga iya amay; kag si Amon naghalad sa tanan nga larawan nga tinigban nga ginpahimo ni Manases nga iya amay, kag padayon sia nga nag-alagad sa ila. . . . Si Amon naglapas sing labi kag labi pa.’ (2 Cronica 33:​22, 23) Busa, handurawa ang makapaluya sa espirituwal nga palibot nga gindak-an sang anak ni Amon nga si Josias.

Apang, si Josias ‘naghimo sing matarong sa mga mata ni Jehova kag naglakat sa mga dalanon ni David nga iya amay; kag sa ikanapulo kag duha nga tuig [sa edad nga mga 20] nagsugod sia sa pagtinlo sang Juda kag sang Jerusalem sang mataas nga mga duog, sang balaan nga mga palo, kag sang mga larawan nga tinigban kag sang mga larawan nga tinunaw.”​—2 Cronica 34:​2-4.

Paano si Josias nakatigayon sing amo nga kusog nga wala sing bulig sang isa ka amay? Nakatigayon sia sing supurta gikan sa iban nga espirituwal nga mga lalaki, subong sang mataas nga saserdote nga si Helcias kag ang iya sekretaryo nga si Safan. Ang ila maayo nga espirituwal nga impluwensia sa lanubo nga si Josias nakabulig sa iya sa “pagtuman sang mga pulong sang kasuguan.” (2 Hari 23:​24; 2 Cronica 34:​14-19) Yadto nga Kasuguan nag-obligar sa mga hari nga maghimo sing personal nga kopya sini kag tun-an ini sa adlaw kag gab-i. (Deuteronomio 17:​18; Josue 1:8) Ang paghimo sini wala sing duhaduha nga nakabulig sing daku sa espirituwal nga pagtubo ni Josias.

Pagtigayon sing Supurta Karon

Ikaw man mahimo magtubo sa espirituwal, bisan pa wala ikaw nagabaton sing supurta nga luyag mo gikan sa imo mga ginikanan. Ang supurta masami nga matigayon gikan sa espirituwal nga kauturan nga mga lalaki kag mga babayi kag mga iloy kag mga amay sa sulod sang mga kongregasyon sang mga Saksi ni Jehova. (Marcos 10:30) Ayhan may yara pila ka mahunahunaon-sa-espirituwal nga mga pamatan-on sa kongregasyon nga sarang mo mangin abyan. Ukon ayhan may yara pila ka may edad nga mga Saksi nga magapakita sing interes sa imo. Halimbawa, ang isa ka wala sing amay nga tin-edyer nga nagahingalan kay Jerry gin-agda sang isa ka gulang sang kongregasyon nga mag-upod sa iya sa isa ka pagtuon sang Biblia sa puluy-an. Sa tapos sang pagtuon, masami sila nagakaon sa isa ka fast-food nga restawran kag nagahambalanay. “Daw nangin amay ko sia,” alimunaw ni Jerry. Sa karon si Jerry may asawa na kag nagaalagad subong isa ka ministeryal nga alagad. Ginapasalamatan gid niya ang supurta nga ginhatag sa iya sadto nga gulang.

May yara na bala isa ka may edad nga tawo nga nagtanyag sa pagbulig sa imo sa pila ka paagi? Nian ngaa indi ini pagbatunon? Kag kon wala sing isa nga naghimo sini nga tanyag, himua ang una nga tikang sa pagpalambo sing mapuslanon nga relasyon. Mahimo tilawan mo pa gani nga palapitan ang isa sang mga manugtatap sang lokal nga kongregasyon. Ayhan nagakinahanglan ka sing isa nga magadumala sing pagtuon sa Biblia sa imo ukon magabulig sa imo sa paghimo sang mga asaynment para sa Teokratikong Eskwelahan sa Pagministro.a Ukon mahimo nagakinahanglan ka sing mapuslanon nga pagpakig-upod sang pamilya. Sing halangpunon, mahimo ginanerbios ka sa pagpahibalo sang imo mga kinahanglanon sa sining paagi. Apang dumduma, ang mga gulang sa kongregasyon gintangdo agod atipanon ang espirituwal nga mga kinahanglanon sang tanan sa kongregasyon​—lakip ang mga pamatan-on. (1 Pedro 5:2) Makabulig gid sila sa imo.

Pagpalambo sang Supurta sa Puluy-an

Nagakahulugan bala ini, nian, nga wala ka na sing mahimo agod mapauswag ang kahimtangan sa puluy-an? Indi gid. Binagbinaga ang pamatan-on nga si Joe, bilang halimbawa. Ginalaragway niya ang kadakuon sang espirituwal nga supurta nga ginahatag sang iya ditumuluo nga mga ginikanan subong “limitado.” Apang, ginabaton ni Joe nga ayhan may bahin sia sa ila kakulang sing supurta. Sa anong paagi? Ti, daw subong bala nga sang si Joe una nga nagsugod sa pagtuon sang Biblia upod sa mga Saksi ni Jehova, wala niya gin-aplikar sing bug-os sa iya personal nga kabuhi ang iya natun-an. Gani padayon nga ginlalis niya ang iya mga ginikanan. Natural, wala sila sing nakita nga rason nga tun-an ang Biblia, kag labi na, sing rason nga palig-unon pa sia sa pagtuon sang Biblia.

Kamusta naman ikaw? Kon ang imo mga ginikanan ditumuluo, ang imo bala mga ginabuhat nagahatag sa ila sing mga rason sa pagpati nga serioso ikaw sa pagtinguha nga alagdon ang Dios? Ang Cristianong mga asawa ginalaygayan nga daugon ang ila ditumuluo nga mga bana paagi sa ila maayong paggawi. ‘Madaug man bala sa wala sing pulong’ ang imo mga ginikanan kon ikaw kapin ka matinumanon kag matinuharon sa ila? (1 Pedro 3:​1; Efeso 6:​1-3) Kon amo, indi ayhan posible gid nga supurtahan nila ikaw?

Apang, ano kon ang imo mga ginikanan mga Cristiano apang wala nagahimo sang tanan nga dapat nila himuon agod buligan ka kag palig-unon? Kon ano man ang ila rason, daku ang mahimo mo agod mapauswag ang isa ka maayo nga espirituwal nga atmospera sa inyo puluy-an paagi sa pagpakita sing maayong huwaran. (1 Timoteo 4:12) Kon tion na sa pagtambong sa Cristianong mga miting, mag-ilis sing bayo kag maghanda sa paglakat. Magboluntaryo sa paghimo sang pila ka ekstra nga hilimuon sa balay agod nga ang imo mga ginikanan makahanda man sing temprano. Himal-i mo? Ayhan ang imo kapagsik para sa mga miting magalaton sa ila.

Ang imo bala mga ginikanan nagadumala sing semanal nga pagtuon sang Biblia sa puluy-an upod sa imo? Kon wala, ngaa indi mangabay sa isa ka malulo nga paagi, nga wala nagapamasol ukon nagareklamo, nga himuon nila ini. Kon ginahiwat ang pagtuon, indi sila pagpabudlayi sa pagtigayon sing mga komento gikan sa imo; maghanda sing maayo sa pagpakigbahin. Himua ang imo bahin sa paghimo sini nga isa ka makalilipay nga okasyon. Pasalamati sila sa sini nga pagtuon. Mahimo nga magahatag ini sa imo mga ginikanan sing ginakinahanglan nga pagpalig-on nga hiwaton ang pagtuon sing regular.

Ano kon ang imo mga panikasog daw wala ginasapak? Indi mag-ampo. (Galacia 6:9) Ipabutyag sing dayag ang imo gugma sa Dios kag sa kamatuoran sang Biblia. Indi pagpaluyaha ang imo kakugi ukon pagbatyag sing pagkahilingagawon sa pagbulig sa iban nga makilala ang Dios. Padayon nga ‘patubua ang imo kaugalingon sa imo labing balaan nga pagtuo, kag nagapangamuyo nga may balaan nga espiritu.’ (Judas 20) Amo gid sini ang ginahimo sang isa ka pamatan-on nga nagahingalan kay Laverne. “Namat-od ako nga indi pagtugutan ang akon amay nga upangan ako sa pagtuon sang kamatuoran,” siling niya. “Gani ginatun-an ko Ang Lalantawan sing isahanon sa baylo nga magtan-aw sing TV.b Nagabasa man ako sing isa ka teksto sa Biblia kada aga. Makaguwa ako sa pagbantala paagi sa pag-upod sa iban pa nga Cristianong kauturan nga mga lalaki kag mga babayi.”

Magpakita sing amo man nga determinasyon. Indi pagtuguti ang kakulang sing supurta sa puluy-an nga magpaluya sa imo. Magpabilin nga malig-on sa imo pagtuo. Kon mahimo, mangin malapit sa mahunahunaon-sa-espirituwal nga mga katubotubo mo kag mga may edad sa kongregasyon. Apang may supurta man ukon wala, mangin determinado sa pagtipig sang imo pagpakig-abyan sa Dios. Masaligan mo sia sa pagsupurta sa imo.​—Ipaanggid ang Salmo 119:​116.

[Mga footnote]

[Piktyur sa pahina 17]

Ang hamtong nga mga katapo sang kongregasyon makabulig paagi sa pagpakita sing interes sa imo