Ang Pagtamod sang Biblia

Nagakinahanglan Bala ang Kalibutan sing “Bag-o nga Pag-ebanghelyo”?

Sang koresponsal sang Magmata! sa Italya

ANG hangin sang politikal nga pagbag-o nga naghuyop sa Nasidlangan nga Europa nagdala sing relihioso nga pagbugtaw liwat. Agod makabenepisyo sa sining espirituwal nga kahigayunan, ang Pinasahi nga Asambleya para sa Europa sang Sinodo sang mga Obispo nagtipon sa Batikano halin sang Nobiembre 28 tubtob Disiembre 14, 1991. Ang tanan 137 ka “Amay sang Sinodo,” nga pangunang manugsakdag sang Europeanhon nga Katolikong hirarkiya, nagtipon nga ang katuyuan amo ang “bag-o nga pag-ebanghelyo.”

Kutob sang ginpahibalo ining sinodo sang Abril 22, 1990, sa Velehrad, Czechoslovakia, ginpahayag ini bilang isa ka maragtason nga hitabo. Apang, mabudlay hunahunaon ang sinodo nga isa ka daku nga kadalag-an, bangod ang RAI, ang Italyano nga pungsudnon nga network sang telebisyon, nagpahibalo sang Disiembre 14, 1991: “Ang sinodo sang mga kapaslawan nagdangat sa iya katapusan.”

Ngaa ang pagtililipon sang mga obispo isa ka kapaslawan? Kag ang Europa bala, ukon ang kalibutan sa sina nga bagay, nagakinahanglan sing “bag-o nga pag-ebanghelyo?”

“Bag-o” sa Ano nga Kahulugan?

Ang Katoliko nga hirarkiya nagahunahuna nga ang bag-o nga pag-ebanghelyo kinahanglanon bangod bag-o ang relihioso nga konteksto. Sa pagbukas sang asambleya, si kardinal Camillo Ruini nagsumaryo sang iya pagtamod sa Europeanhon nga arena. Nagsiling sia nga sa Sidlangan “minilyon ang wala gani bisan natugmawan kag wala nagasapak sa sadsaran nga mga kamatuoran sang Cristianong pagtuo.” Bangod sini nga rason “ang pagkapukan sang Komunista nga mga pagginahom nagabukas sing dalagku nga mga kahigayunan sa pag-ebanghelyo para sa Iglesia.” Sa pihak nga bahin, ang danyag sa Nakatundan nga Europa namarkahan sang ginatawag niya nga “praktikal nga ateismo.” Wala na ginabaton ang pulong sang Iglesia Katolika bilang kamatuoran nga nagikan sa Dios.

Ang relihioso nga pagbugtaw liwat nagabutang sang isa pa ka hangkat para sa mga obispo. Sa ano nga paagi? Ang mga obispo sa Europa kag sa Latin Amerika nahangawa sa pagbuad sang iban nga mga relihioso nga hublag. Ngaa? Sing maathag, bangod nadula sang iglesia ang madamo sang pinasahi nga mga posisyon nga iya ginaangkon sang una, kag karon nakita niya ang iya kaugalingon nga “ginapahog sang makatalagam nga mga karibal.” Ang Jesuita nga pahayagan La Civiltà Cattolica nagtudlo sa mga Saksi ni Jehova nga isa sa sinang mga karibal bangod sang “talalupangdon nga kadamuon sang mga Katoliko kag Protestante nga madinalag-on nila nga nahaylo.”

Ang mga pulong sang nagahinakop nga “Deklarasyon” sang sinodo nagsiling nga ang bag-ong pag-ebanghelyo isa ka pangganyat agod “pangitaon liwat ang Cristiano nga ginhalinan sang isa.” Ngaa kinahanglan sang mga Europeanhon nga pangitaon liwat ang ila “Cristiano nga ginhalinan”? Ang mga obispo nagsiling nga ang Cristianong mga talaksan wala na ginakabig nga mapuslanon. “Para sa madamo nga bawtismado nga Europeanhon,” siling sang La Civiltà Cattolica, ang relihion “binata-bata, matahom nga sugilanon para sa mga bata nga indi matamod nga serioso sang mga hamtong, nga daw isa ka bagay nga makaimpluwensia sa ila kabuhi. . . . Ang iban nga mga Europeanhon nagatamod sang Cristianong relihion nga sugid-sugid lamang, nga madula samtang nagauswag ang sibilisayon . . . Ang iban pa nga mga Europeanhon nagakabig sa Cristianong relihion nga makahalalit.”

Sa sining mga rason, ang mga obispo nakakita sing kinahanglanon para sa “bag-o nga pag-ebanghelyo.”

Kon Ngaa Napaslawan

Agod magmadinalag-on sa “bag-o nga pag-ebanghelyo” sang Daan nga Kalibutan, kinahanglanon ang madamo nga manugpangabudlay. Apang, ang isa sang pinakadaku nga palaligban nga nagaapektar sa iglesia sa Europa amo ang kakulang sing mga pari. Ang isa sa mga obispo nagsiling nga sang nagligad nga 13 ka tuig, suno sa bag-o nga mga pagbulubanta para sa Europa, ang kadamuon sang mga klero nagbuhin sing 9 porsiento.

Madamo ang nagkabig sa sinodo sang mga obispo nga isa ka kapaslawan bangod diutay lamang ang praktikal nga mga punto nahanungod sa kon paano himuon ang “liwat nga pagpa-Cristiano” sa Europa. Ang Pranses nga obispo nga si Joseph Duval naglaygay sa grupo sang mga obispo: “Dapat naton likawan ang mabudlay hangpon nga mga diskurso sa pag-ebanghelyo . . . Tanan kita nagahambal katulad sang mga abogado. Kabay nga ang aton mensahe sa liwat mangin mensahe nga may ebangheliko nga kahapos kag tono.”

Pila lang ka mga obispo ang nagsambit sing mga paagi nga katulad sang mga apostoles para sa pag-ebanghelisar sa katawhan. Halimbawa, si Obispo František Tondra sang Spiš, Czech kag Slovak Federal Republic, nagsiling: “Para sa bag-o nga pag-ebanghelyo sa Europa, dapat magbalik kita sa orihinal nga porma sang pag-ebanghelyo. . . . Ang unang mga Cristiano, pagkatapos gid nila patugmaw, nagbatyag nga katungdanan nila ang pagpalapnag sang Ebanghelyo.”

Ebanghelismo—Ang Paagi sang Biblia

Ang tanan bala nga unang siglo nga mga Cristiano mga ebanghelisador? Huo! Ang libro nga Evangelism in the Early Church, ni Michael Green, Oxford, Inglaterra, nagasiling: “Ang isa sang labing talalupangdon nga butang sa ebanghelismo sang unang mga inadlaw amo ang mga tawo nga nagpakigbahin sa sini. . . . Ang ebanghelismo kinamatarong kag katungdanan sang tagsa ka katapo sang Iglesia. . . . Ang Cristianismo isa gid ka hublag sang ordinaryo nga mga tawo, ginapalapnag sang di-pormal nga mga misyonaryo.”

Ang tinaga nga “ebanghelisador” nagakahulugan nga “manugbantala sing maayong balita,” kag ang ginsiling ni Jesus nahanungod sa pag-ebanghelyo naaplikar para sa tanan niya nga mga sumulunod: “Ining maayong balita [ebanghelyo] sang ginharian ibantala sa bug-os nga kalibutan bilang pamatuod sa mga kapungsuran. Kag nian magaabot ang katapusan.” (Mateo 24:​14, The New Jerusalem Bible) Gani, ang labing masangkad nga hilikuton sa pag-ebanghelyo nga dapat himuon pa pagahimuon sa “tion sang katapusan.”​—Daniel 12:4.

Sang nagligad nga tuig, ang mga Saksi ni Jehova, nga kapin sa apat ka milyon, naghinguyang sing halos isa ka bilyon ka oras sa pag-ebanghelyo nga hilikuton sa 211 ka kadutaan, lakip sa Nasidlangan nga Europa. Anong maayong balita ang ila ginabantala? Ang maayong balita sang Ginharian sang Dios kag sang kaluwasan paagi sa pagtuo kay Jesucristo. (2 Timoteo 1:​9, 10) Ining mensahe amo ang kinahanglan sang kalibutan karon​—sa wala pa mag-abot ang katapusan.​—Mateo 24:​3, 14.

[Picture Credit Line sa pahina 12]

Si Jesus nga Nagabantala sa Dagat sang Galilea, ni Gustave Doré