Isa Bala Ikaw ka Mapinalanggaon nga Ginikanan?

GINAPALANGGA mo bala ang imo mga kabataan? Ginapabugal mo bala sila? Ginabatyag mo bala nga ang kada isa espesyal, pinasahi, dimabayluhan nga indibiduwal? Amo sina ang kalabanan nga mga ginikanan. Apang ginasugiran mo bala ang imo mga kabataan nga amo man sini ang imo ginabatyag? Ginadayaw mo bala sila sing ispisipiko kon nakahimo sila sing maayo? Kag ginapabutyag mo bala ang pagpalangga sa iban nga mga paagi​—paagi sa mainanggaon nga pagduludugsing, makapasalig nga pagdapulay, mahigugmaon nga mga paghakos?

“Apang indi ako amo sina,” mahimo ipamatok sang iban. “Indi ako subong sina ka bukas sa akon mga balatyagon.” Matuod, indi tanan mapinabutyagon sa kinaugali. Apang, ang pagpakita sing pagpalangga sa imo mga kabataan mahimo nga labi pa ka importante sang sa ginahunahuna mo.

Isa ka grupo sang mga sientipiko ang nagpadayon sining karon lang sang 1951 nga pagtuon sa 400 ka kindergarten nga kabataan. Sa 94 ka kalalakin-an kag kababayin-an nga nakita nila, nasapwan nila ang pila ka talalupangdon nga mga halimbawa. Suno sa The New York Times, ang mga kabataan nga may mapinalanggaon, mahigugmaon nga mga ginikanan mas maayo sa ila hamtong nga pagkabuhi. Sing sadsaran may madinalag-on sila nga pag-asawahay, nagpadaku sa mga kabataan, nagkalipay sa ila trabaho, kag nag-eksperiensia sing suod nga pag-abyanay. Si Dr. Carol Franz, nga nagpanguna sa pagtuon, nagsiling sa pamantalaan nga sila “nagpakita sing kaayo sa sikolohiko, kalipay kag kaayawan sa ila kaugalingon kag sa ila kabuhi.”

Sa kabaliskaran, nasapwan ni Franz nga “yadtong may dimasinapakon, mapinatumbayaon nga mga ginikanan nakaagom sing pinakamabudlay nga tion sa ulihi nga kabuhi sa tanan nga paagi​—sa trabaho, sa sosyal nga pagpasibu, kag sa kaayo sa sikolohiko.” Sa katunayan, ginpakita sang pagtuon nga ang kakulang sing pagpalangga sang ginikanan mahimo gani nga mas makahalalit sa mga kabataan sa ulihi sang sa diborsio, alkoholismo, ukon kaimulon sang mga ginikanan.

Indi ini dapat magpakibot sa hanuot nga mga estudyante sang Biblia. Nakahibalo sila sing maayo kon paano gintamod ni Jesus ang mga kabataan. Ginpabilihan niya sila, ginpapalapit niya sila sa iya, kag ginpakita niya sa ila ang iya pagpalangga. (Marcos 10:​13-16; Lucas 9:​46-48; 18:​15-17) Sa pagkamatuod, ginailog lamang niya ang iya langitnon nga Amay sa sining bahin​—ang Isa nga mangin Amay sa ilo nga bata nga lalaki. (Salmo 68:5) Si Jehova amo ang himpit nga Ginikanan; makalilipay para sa mga nagahigugma sa iya, mahimo niya takpan ang bisan anong kakulangan sang dihimpit nga tawhanon nga mga ginikanan.​—2 Corinto 6:18.