Isa ka Masanag nga Palaabuton Para sa Kabataan

SA World Summit for Children, madamo nga lider sang kalibutan ang naghambal sing masinaligon nahanungod sa palaabuton. Nagtagna sila sing isa ka “bag-o nga dag-on” para sa kabataan, “isa ka bag-o nga dedikasyon sa mga kinahanglanon sang bata.” Naghambal sila tuhoy sa “ ‘isa ka bag-o nga paghiusa’ nga nagahatag sing ‘kabuhi sa isa ka nahiusa kag determinado nga pagbuyluganay sang kalibutan’ ” agod buligan ang kabataan.

Dungganon ina nga mga pulong. Apang butang pa nga lantawon kon tubtob diin ang malambutan sang mga pungsod padulong sa paglambot sang ila mga tulumuron. Takus talupangdon nga sa sulod sang lima ka bulan sa tapos sang komperensia, ang mga pungsod nag-inaway sa Persian Gulf sa isa ka inaway nga nangin isa sang labing magasto​—$61 ka bilyon—​kag labing malaglagon sa palibot. Sa tapos sini, linibo ka tawo sa Iraq kag Kuwait ang nagbiya sa ila mga puluy-an. Linibo ang napatay​—sa isa ka tion ginatos ka tawo kada adlaw—​bangod sang pagkagutom, pagkanadayag sa init kag tun-og, malnutrisyon, kag balatian. Mga 8 sa 10 ang mga babayi kag kabataan.

Gintagna ang mga Kailo

Ang mga estudyante sang Pulong sang Dios nakahibalo nga ang mga problema nga nagapaantos sa kabataan sang kalibutan gintagna sang nagligad nga duha ka libo ka tuig. Ang Biblia nagtagna tuhoy sining “katapusan nga mga adlaw”:

◻ “May . . . mga kamatay.”​—Lucas 21:11.

◻ “May kakulang sing kalan-on.”​—Mateo 24:7.

◻ ‘Laglagon [sang mga tawo] ang duta.’​—Bugna 11:18.

◻ “Ang pungsod magatindog batok sa pungsod kag ang ginharian batok sa ginharian.”​—Marcos 13:8.

◻ “Magaabot ang makahalanguyos nga mga tion. Kay ang mga tawo mangin mahigugmaon sang kaugalingon, . . . wala sing kinaugali nga gugma.”​—2 Timoteo 3:​1-3.

Nagtagna man ang Biblia nga ang tion magaabot sa indi madugay nga ang mga pungsod magahunahuna nga may pag-uswag sila sa paglubad sang mga problema sang katawhan amo kon ngaa sila magasinggit sing: “Paghidait kag kalig-unan!”​—1 Tesalonica 5:3.

Isa ka Masanag nga Palaabuton

Apang, sa kamatuoran ina nga pagsinggit magasinyas sang tion nga ang Dios magapahilabot sa ginahimo sang katawhan. Paagi sa iya langitnon nga Ginharian, dulaon sang Dios ang sistema sang mga butang karon kag pasudlon ang isa ka bag-ong kalibutan nga may matuod nga paghidait kag dayon nga kalig-unan, para sa kabataan kag sa mga adulto man.​—Hulubaton 2:​21, 22; Daniel 2:​44; Mateo 6:10.

Sa idalom sang matahom nga kahimusan sang Dios sa Ginharian, “wala sing pumuluyo ang magasiling: ‘Nagamasakit ako.’ ” (Isaias 33:24) Ang malnutrisyon mangin isa ka butang sang nagligad: “Magabugana ang uyas sa duta; sa putukputukan sang kabukiran magahapayhapay ini.” (Salmo 72:16) Bisan ang inaway madula na, kay ang Biblia nagasaad: “[Si Jehova] magapatunong sang mga inaway tubtob sa ukbong sang duta.”​—Salmo 46:9.

Apang kumusta ang tanan nga kabataan​—kag ang iban pa—​nga napatay sa malnutrisyon, balatian, ukon iban pa nga mga kabangdanan? Ang inspirado nga Pulong sang Dios nagasiling: “May pagkabanhaw sang matarong kag dimatarong.”​—Binuhatan 24:15.

Sang yari sia sa duta, ginpakita ni Jesucristo nga ang pagkabanhaw sa kabuhi sa duta sa bag-ong kalibutan sang Dios magalakip sa kabataan. Halimbawa, sang mapatay ang isa ka bata nga babayi nga mga 12 anyos, ‘ang tanan naghibi kag naghaya sa iya.’ Apang nian, sa gin-uyatan ang kamot sang dalagita, si Jesus nagsiling sa iya: “Lin-ay, bangon ka!” Ang maragtason nga kasaysayan nagasiling: “Nagtindog sia sa gilayon, kag nagsugo si Jesus nga hatagan sing pagkaon ang dalagita.” Ano ang reaksion sang iya mga ginikanan? Ang Biblia nagareport: “Naurungan sila sing daku.”​—Lucas 8:​40-42; 49-56; Marcos 5:42.

Sa isa pa ka okasyon, nasugata ni Jesus ang isa ka kumpanyar sa lubong sang bugtong nga anak nga lalaki sang isa ka balo nga babayi. “Nagpalapit [si Jesus] kag gintandog ang liyaliya, kag ang mga nagadala nagdulog, kag nagsiling sia: ‘Pamatan-on, nagasiling ako sa imo, Bangon ka!’ Kag ang patay nagbangon kag nagsugod sa paghambal, kag ginhatag sia ni Jesus sa iya iloy.” Ang mga tawo nga yara sa malapit “naghimaya sa Dios.”​—Lucas 7:​11-16.

Sa amo, sa idalom sang matarong nga paggahom sang Ginharian nga panguluhan sang Dios, ang kabataan, lakip ang mga binanhaw, makatigayon sing pinakamasanag nga palaabuton. Magadaku sila sa isa ka kalibutan nga may pagkamatarong kag paghidait nga tuman katahom, tuman kalig-on, tuman ka bugana, amo kon ngaa nagakaigo nga ginatawag ini ni Jesus nga “Paraiso.”​—Lucas 23:43.

[Piktyur sa pahina 9]

Sa bag-ong kalibutan sang Dios, ang kabataan magadaku nga may kalig-unan, mapagros, kag malipayon