Ang Aton Nagabag-o nga Kalibutan—Ano Gid ang Ginatigana sang Palaabuton?

AGOD mag-uswag ang aton kalibutan, ano ang aton pililian? Ang isa nga pilion amo ang pagpati nga ang mga manuggahom kag mga lider sang kalibutan sa ulihi mangin mahinuklugon kag magsugod nga tuytuyan ang katawhan padulong sa mga dalanon sang pagpasunairay, paghangpanay, kag paghidait.

Nagakahulugan ina sing pagpati nga ang tribolismo kag nasyonalismo pagadulaon kag buslan sang mahinangpanon nga panimuot nga makadala sing harmoniya sa kalibutan.

Nagadalahig man ini sing pagpati nga ang mga lider sang kapitalista nga mga ekonomiya magakilala nga ang ganansia lamang nga motibo isa ka indi nagakaigo nga prinsipio sa isa ka kalibutan nga madamo ang walay trabaho, walay puluy-an, kag dalagku nga balayran sa pagpabulong.

Nagakahulugan man ini sing pagpati nga ang tanan nga manugprodukto sing armas sang kalibutan magasugod sa pagkalangkag sa paghidait sa bug-os nga kalibutan kag magasalsal sang ila mga espada nga mangin mga punta sang arado.

Dugang pa, nagakahulugan ini nga ang mga kriminal sang kalibutan, lakip ang mga hari-hari sang Mafia, ang mga lider-lider sang mga gang sang mga kriminal sa Sidlangan, kag ang mga kadalagkuan sa droga sang Bagatnan nga Amerika, magahinulsol kag magtarong!

Kon sa aton pa, nagakahulugan ini sing pagpati sa hinimo-sang-tawo nga Utopia​—isa ka imposible nga damgo. Kon nagahunahuna kita nga mahimo naton ini nga wala ang Dios, nian yara kita sa kahimtangan nga kaanggid sa ginlaragway sang istoryador nga si Paul Johnson sa iya libro nga A History of the Modern World. Nagsulat sia nga ang isa sang sadsaran nga mga kalautan nga ginabangdan sang “malaglagon nga mga kapaslawan kag mga trahedya” sang aton siglo amo ang “matinaastaason nga pagpati nga sarang malubad sang mga lalaki kag mga babayi ang tanan nga misteryo sa uniberso paagi sa ila kaugalingon nga mga kinaalam nga wala sing tuytoy.”​—Ipaanggid ang Isaias 2:​2-4.

Apang, may yara isa ka makatarunganon nga pilion para sa positibo nga pagbag-o. Amo ina ang pagpati nga ang Manunuga sang duta, ang Tag-iya sang aton planeta, ang Dakung Arkitekto sang pagbag-o, nga si Jehova nga Dios, magapasilabot sa mga ginahimo sang tawo agod luwason ang iya binuhatan. Ginapakita sang maragtas sang Biblia nga ang Dios naghikot sang una agod tumanon ang iya mga katuyuan, kag ang mga tagna sa Biblia nagapakita nga sa dili madugay sia liwat magahikot agod tumanon ang iya orihinal nga katuyuan para sa katawhan kag sa duta.​—Isaias 45:18.

Isa ka Tumalagsahon nga Tuburan sang Masaligan nga Impormasyon

Ang tumalagsahon nga Tuburan sang matuod nga ihibalo sang kon ano ang ginatigana sang palaabuton para sa katawhan ginalaragway sa mga pulong sang manalagna sang Biblia nga si Isaias: “Dumduma ang nahauna nga mga butang sang dumaan, nga ako ang Balaan nga Isa kag wala na sing iban nga Dios, ukon kaangay sa akon; ang Isa nga nagapahayag sang katapusan kutob sa ginsuguran, kag kutob sa dumaan nga mga tion sang mga butang nga wala pa mahimo.”​—Isaias 46:​9-11.

Ngaa napaktan ni Jehova nga Dios ang mga hitabo nga magaapektar sa katawhan? Sa liwat si Isaias nagasabat: “Subong nga ang mga langit mataas pa sa duta, sa amo ang akon mga dalanon mataas pa sa inyo mga dalanon, kag ang akon mga painuino sa inyo mga painuino.” Ang mga painuino sang Dios para sa palaabuton sang katawhan ginapabutyag sa Biblia.​—Isaias 55:9.

“Makahalanguyos nga mga Tion nga Mabudlay Pakigbagayan”

Ano ang gintagna sang Pulong sang Dios, ang Biblia, para sa aton kaliwatan? Ang Cristianong apostol nga si Pablo nagpaandam: “Apang hibalua ini, nga sa katapusan nga mga adlaw magaabot ang makahalanguyos nga mga tion nga mabudlay pakigbagayan.” (2 Timoteo 3:1) Kutob sang 1914 kag sang Inaway Kalibutanon I, nagakabuhi kita sa mga tion nga nangin dugang kag dugang nga makahalanguyos. Ang kakagod, kadalok, kag pagkauhaw sa gahom sang tawo nagdul-ong sa iya sa paghimo sing nagalain kag nagalain nga mga kapintas indi lamang batok sa iya isigkatawo kundi batok man sa kinaugali gid. Ang indi pagsapak sang tawo sa iya palibot nagabutang sa peligro sang palaabuton nga pagkabuhi sang iya kabataan kag kaapuhan.

Ining daku nga katalagman ginpatalupangod sang anay presidente sang Czechoslovakia, nga si Vaclav Havel, nga nagsulat nahanungod sa mga kahimtangan sa sadto nga pungsod. Sa epekto, ang iya ginhambal maaplikar sa bug-os nga kalibutan: “Mga resulta lamang ini sang . . . panimuot sang tawo sa kalibutan, sa kinaugali, sa iban nga mga tawo, sa kabuhi gid. Mga resulta ini . . . sang pagkamatinaastaason sang modernong tawo, nga nagapati nga nahangpan niya ang tanan nga butang kag nahibaluan niya ang tanan nga butang, nga nagatawag sang iya kaugalingon nga agalon sang kinaugali kag sang kalibutan. . . . Amo ina ang panghunahuna sang tawo nga nagapangindi sa pagkilala sa bisan ano . . . nga mas mataas sa iya kaugalingon.”

Ang ginbalikwat kaina nga si Bise Presidente Gore sang E.U. nagsulat: “Kombinsido ako nga madamo nga tawo ang nadulaan na sing pagtuo sa palaabuton, bangod sa halos tanan nga bahin sang aton sibilisasyon nagasugod kita sa paghikot nga subong bala ang aton palaabuton indi sigurado karon amo kon ngaa mas makatarunganon nga ang aton atipanon lamang amo ang aton mga kinahanglanon kag mga problema karon.” (Earth in the Balance) Sa pagkamatuod ang pagkadimalaumon tuhoy sa palaabuton daw amo ang panimuot karon.

Ang isa ka kabangdanan sining kahimtangan amo ang katumanan sang dugang pa nga mga pulong ni Pablo: “Ang mga tawo mangin mahigugmaon sang kaugalingon, mahigugmaon sang kuwarta, bugalon, palabilabihon, mapasipalahon, malalison sa mga ginikanan, dimapinasalamaton, dimatutom, wala sing kinaugali nga gugma, indi tampad sa bisan anong kasugtanan, mapatupatuon, wala sing pagpugong sa kaugalingon, mabangis, wala sing gugma sa kaayuhan, maluib, dasudaso, nagahabok sa pagpadayaw, mahigugmaon sa kinasadya sa baylo sang sa Dios, nga may dagway sang pagkadiosnon apang nagapanghiwala sang gahom sini; kag likawi ang subong nga mga tawo.”​—2 Timoteo 3:​2-5.

Mas Maayo nga Pilion

Apang tuyo sang Dios nga magbag-o ang mga butang sa sini nga duta​—para sa mas maayo. Nanaad sia nga magatuga sia sing “bag-ong mga langit kag bag-ong duta . . . , kag sa sini magapuyo ang pagkamatarong.” (2 Pedro 3:13) Agod mapasag-uli ining nahigkuan nga duta sa isa ka Paraiso nga kahimtangan, dapat anay ‘laglagon [ni Jehova] ang mga nagalaglag sang duta.’ (Bugna 11:18) Paano ini mahanabo?

Nagagamit sing simbuliko nga hambal, ginapakita sang Biblia nga sa indi madugay ibutang sang Dios sa tagipusuon sang politikal nga mga elemento, lakip ang Nasyones Unidas, ang painuino nga laglagon ang gahom kag kadungganan sang ayhan amo ang labing negatibo nga puwersa sa maragtas sang katawhan​—ang nasyonalistiko kag nagabahinbahin nga impluwensia sang relihion sa bug-os nga duta.a Suno kay Martin van Creveld, sa iya libro nga The Transformation of War, “may rason kita sa pagpaabot nga ang relihioso nga mga panimuot, mga pagpati, kag mga panatisismo magatungod sing mas daku nga papel sa pagpahulag sa naarmasan nga inaway sang sa nahimo sini anay, sa dimagkubos sa Nakatundan, sa nagligad nga 300 ka tuig.” Ayhan bangod sang pagpasilabot sa politika, ang relihion magaantos sa mga kamot sang politikal nga mga kagamhanan. Apang, ina nga mga kagamhanan indi hungod nga magatuman sang kabubut-on sang Dios.​—Bugna 17:​16, 17; 18:​21, 24.

Ang Biblia nagapadayon sa pagpakita nga ang Dios masunod nga magaliso sang iya igtalupangod sa mahingaliton, tulad-sapat nga politikal nga mga elemento sang malaut nga sistema sa kalibutan ni Satanas kag makig-away sa iya sa hingapusan nga inaway, ukon sa inaway sang Armagedon. Sa tapos dulaon ang mapintas nga mga sistema politika kag ang ila agalon nga manugmaniobra, nga si Satanas, ang dalanon mangin mahawan para sa mahidaiton nga bag-ong kalibutan nga ginsaad sang Dios.b​—Bugna 13:​1, 2; 16:​14-16.

Ang mga Saksi ni Jehova nagabantala sa mga pamalay nahanungod sining nagapakari nga mga pagbag-o sa halos 80 ka tuig. Sa sulod sina nga tion, nasaksihan man nila kag naeksperiensiahan ang madamo nga pagbag-o nga nahimo sang katawhan. Nakaagi sila sa mga bilangguan sang Nazi kag sa mga kampo konsentrasyon bangod sang ila napasad sa Biblia nga mga prinsipio. Naeksperiensiahan nila ang mga kabudlayan kag mga pag-antos sang kabuhi sa madamo nga bahin sang Aprika, lakip ang mga inaway sibil kag pag-inaway sang mga tribo. Nagbatas sila sing paghingabot sa mga kamot sang kalabanan sang politikal kag relihioso nga mga sistema bangod sang ila neutralidad kag sang ila makugi nga pagbantala. Apang, walay sapayan sini tanan, nakita nila ang pagpakamaayo sang Dios sa ila bug-os kalibutan nga hilikuton sa pagpanudlo nga nag-uswag halin sa pila ka libo lamang sang 1914 tubtob sa mga apat ka milyon kag tunga sang 1993.

Mga Rason sa Paglaum

Sa baylo nga madulaan sing paglaum, ang mga Saksi malaumon bangod nahibaluan nila nga ang labing maayo kag labing daku nga mga pagbag-o malapit na matabo sa sini nga duta. Ang mga hitabo kutob sang 1914 nagtuman sang mga tagna nga ginhatag ni Jesus, nagatanda sang tion sang iya dikitaon nga presensia sa paggahom sa Ginharian kag nagapakita nga kita yari na sa tion sang katapusan para sa bisan anong gin-inspirar sang tawo nga “bag-ong kalibutan nga kagamo,” subong amo ang paglaragway sang isa ka Pranses nga manunulat sa Le Monde sang magaabot sa malapit nga palaabuton. Si Jesus nagsiling: “Kon makita ninyo nga nagakahanabo ining mga butang, makilala ninyo nga malapit na ang ginharian sang Dios.”​—Lucas 21:​7-32.

Ang “bag-ong kalibutan nga kahimusan” sang tawo apektado sang mga kaluyahon sang tawhanon nga kinaugali​—ambisyon, pagkauhaw sa gahom, kadalok, kagarukan, kag inhustisya. Ang bag-ong kalibutan sang Dios magagarantiya sing katarungan. Tuhoy sa iya nasulat ini: “Ang Igang, ang iya binuhatan himpit, kay ang tanan niya nga dalanon katarungan. Dios sang katutom, kag walay kalautan sa iya; matarong kag matadlong sia.”​—Deuteronomio 32:4.

Ang “bag-ong kalibutan nga kahimusan” sang tawo bukas sa gintawag ni McGeorge Bundy, isa ka eksperto sa E.U. sa pagsulundan sa luwas, nga “makitid nga nasyonalistiko nga mga balatyagon nga sa amo sarang makaapelar ang isa ka tawo nga nagagamit sang emosyon agod makatigayon sing gahom.” Sa pagpadayon, sia nagsiling: “Nahibaluan naton pasad sa maragtas kon paano ang ekonomiko kag sosyal nga kapaslawan makahatag sing kusog sa sinang dikinaandan nga mga tawo. Nahibaluan man naton nga walay sapayan kon diin ini matabo, ina nga sahi sang nasyonalismo makatalagam.”

Ang bag-ong kalibutan sang Dios nagagarantiya sing harmoniya kag paghidait sa ulot sang katawhan sang tanan nga tribo kag mga pungsod bangod pagatudluan sila sa iya ni Jehova mga dalanon sang pagkawalay nadampigan kag gugma. Si Isaias nanaad: “Ang tanan mo nga anak tudluan ni Jehova, kag mangin daku ang paghidait sang imo mga anak.” (Isaias 54:13) Kag ang Cristianong apostol nga si Pedro nagsiling: “Matuod gid ginahantop ko nga ang Dios walay ginapasulabi sa mga tawo, kundi sa tagsa ka pungsod ang nagakahadlok sa iya kag nagahimo sing pagkamatarong kalahamut-an sa iya.”​—Binuhatan 10:​34, 35.

Sa walay duhaduha, daku nga mga pagbag-o sa malapit nga palaabuton ang magaabot sa kalibutan subong nahibaluan naton. Apang, ang labing daku nga mga pagbag-o, ang permanente kag mapuslanon nga mga pagbag-o, amo ang mga butang nga ginsaad sang Dios, kag sia “indi makabutig.”​—Tito 1:2.

[Mga footnote]