Mga Biktima Ukon mga Martir—Ano ang Kinatuhayan?

SA BUG-OS nga maragtas, ang kapintas sang katawhan sa mga lalaki, mga babayi, kag kabataan ginbangdan sang walay katapusan nga pag-antos kag nagresulta sa minilyon ka biktima. Kon bala bangod sa politikanhon, pungsudnon, rasyal, ukon relihioso nga mga rason, walay sala nga mga dugo ang ginpaagay kag ginapaagay sa gihapon karon. Ang dumot nangibabaw sa gugma kag paghangpanay. Ang pagkapanatiko nagdingot sing kahilwayan sa iban. Kag ang pinatyanay nagapadayon.

Sa nagligad nga mga siglo, ang mga hangaway ginpaaway batok sa isa kag isa, kag diutay lamang ang pagpakigbahin sang mga sibilyan. Sa aton ika-20 nga siglo, sa pag-abot sang mga bomba nga ginahulog gikan sa kahawaan, sang malayo-malab-utan nga mga kanyon kag mga misil, madamo gid nga sibilyan ang nabiktima amo kon ngaa ang isa ka pagtuon nagsiling: “Sa isa ka daku nga kasangkaron ang mga sibilyan amo sa karon ang una nga mga biktima sang mga inaway. Sa sini nga siglo mas madamo sang walay armas nga mga sibilyan sangsa propesyonal nga mga soldado ang napatay sa mga inaway.” Ang walay sala nga mga tawo amo ang nangin mga biktima sang mga inaway nga ginapadabdab sang politikanhon nga mga lider. Sa aton siglo lamang, ang kadamuon sang mga biktima sang inaway nagtimbuok, kapin sa isa ka gatos ka milyon ang napatay kag ginatos ka milyon ang ginpaantos sang halit kag sang pagkapatay sang mga hinigugma.

Dugang sa mga biktima sang mga inaway karon, yara man ang mga martir.a Ano ang kinatuhayan sang mga biktima sang inaway kag sang mga martir? Minilyon​—mga Judiyo, mga Slav, mga Gypsy, mga homoseksuwal, kag iban pa​—ang napatay subong mga biktima sa Nazi nga Alemanya bangod amo sila sina. Wala sila sing mahimo, wala sing mapilian. Sa idalom sadtong malaut nga sistema, ang ila kamatayon indi mapunggan. Sa pihak nga bahin, ang iban indi kinahanglan mapatay. Malikawan nila kuntani ini, apang, bangod sang ila mga prinsipio, ginpili nila nga batunon ini.

Ang isa ka bantog nga halimbawa amo ang isa ka Katoliko nga pari nga si Maximilian Kolbe, nga nagbulig sa Judiyo nga mga refugee sang Inaway Kalibutanon II. Sang 1941 sia “gindala [sa kampo konsentrasyon sang mga Nazi] sa Auschwitz, diin nagboluntaryo sia nga patyon sa baylo sang ginkondenar nga bilanggo nga si Franciszek Gajowniczek. Ginpagutman sia anay, dayon gin-indyeksionan sing phenol kag ginsunog.” (Encyclopædia Britannica) Nangin isa sia ka nagsakripisyo sang kaugalingon nga martir​—tuhay sa kinaandan nga nagakatabo kon tuhoy sa Protestante kag Katoliko nga mga relihion ang hambalan.

Sang panahon sang mga Nazi sa Alemanya (1933-45), ang mga Saksi ni Jehova nag-antos sing daku bangod sang ila pagpabilin nga neutral kag pagpangindi sa pag-alagad sa panikasog ni Hitler para sa inaway. Linibo ang gindala sa ginkahadlukan nga mga kampo konsentrasyon, diin madamo ang ginpatay kag ang iban napatay bangod sang kapintas. Apang, indi sila kinahanglan mag-antos kag mapatay. May mapilian sila. Gintanyagan sila sing paagi agod malikawan ini. Kon pirmahan lamang nila ang dokumento nga nagasikway sang ila pagtuo, makaguwa na sila. Ang kalabanan nagdesisyon nga indi magpirma kag indi lamang nangin mga biktima sang kapintas sang mga Nazi kundi nangin mga martir man. Sa amo, samtang ang tanan nga mga martir mga biktima, pila lamang sang mga biktima ang mahimo kag nagdesisyon nga mangin mga martir. Madaugon sila sa atubangan sang kamatayon.

Ang walay nadampigan nga pamatuod sang madamo nga indi mga Saksi nagapamatuod sa sining kamatuoran. “Ang Swiso nga si Pastor Bruppacher nagsiling sang 1939 nga ‘Samtang ang mga tawo nga nagatawag sang ila kaugalingon nga mga Cristiano napaslawan sa makahalawathawat nga mga pagtilaw, ining dikilala nga mga saksi ni Jehova, subong Cristianong mga martir, nagahupot sing dimationg nga pagpamatok sa pagpatiko sang ila konsiensia kag pagano nga idolatriya . . . Nag-antos sila kag napatay bangod, subong mga saksi ni Jehova kag mga kandidato para sa Ginharian ni Cristo, nangindi sila nga simbahon si Hitler kag ang Swastika.’ ”

Apang, indi lamang sa Nazi nga Alemanya nga ang mga Saksi ni Jehova naghupot sang ila integridad sa atubangan sang kamatayon. Kinahanglan nila ipakita ang ila kaisog sa atubangan sang Komunismo, Pasismo, kag sa iban pa nga sahi sang politikanhon nga kapintas, subong man sa relihioso nga pagpamatok. Bisan sa ginatawag nga demokratiko nga mga pungsod sang Katundan, ang mga Saksi nakaatubang sing kasingki. Tul-id nga ipaathag sang amon masunod nga artikulo ang iban sang mga kaso tuhoy sa mga Saksi nga nakatigayon sing kadalag-an sa atubangan sang kamatayon.

[Mga footnote]

[Retrato sa Pahina 3]

Sa tapos sang Inaway Kalibutanon II, ang mga korte sa Sidlangan nga Alemanya sayop nga nagsumbong nga ang mga Saksi ni Jehova mga espiya sang Amerika

[Credit Line]

Neue Berliner Illustrierte