Gikan sa Amon mga Bumalasa

Lead Poisoning Madamo nga salamat sa mga artikulo nahanungod sa pagkahilo sa tingga. (Nobiembre 22, 1992 nga Awake!) Ang ginsambit ninyo nga mataas nga presyon sang dugo, balatian sa batobato, sakit sa tiyan, kag pagsuka​—mga problema nga gin-antos ko sing tinuig na​—nagtiklod sa akon nga usisaon ang akon kaugalingon basi nahiluan ako sang tingga. Ang resulta nagkompirma sang sobra nga natipon nga tingga. Ginalauman ko nga mangin madinalag-on ang pagbulong sa akon karon.

T. W., Alemanya

Maathag nga nanalawsaw kamo sing maayo para sa inyo mga artikulo. Nagaobra ako sa research institute sa Department of Organic Coatings. Sa amon pungsod, ang halin sa tingga nga mga pintura madamong tinuig na nga ginagamit bangod makabato ini sa pagbag-o sing tiempo. Karon ginlatiran sing daku ang paggamit sini, apang subong sang ginsulat ninyo, ang katalagman nga mahiluan sang tingga nagapabilin. Ini nga artikulo nagbulig sa akon agod ipakita sa akon mga kaupdanan nga ang Awake! wala lamang nagasabat sang relihiosong mga pamangkot kundi nagabulig man sa paglubad sang ila mga problema bisan pa indi sila mga tumuluo. Salamat.

A. A., Czech Republic

Iron Lung Nagapasalamat gid ako sing daku sa eksperiensia ni Laurel Nisbet nga natig-uluhan “Not Even an Iron Lung Could Stop Her Preaching.” (Enero 22, 1993 nga Awake!) Daw ano ka tumalagsahon nga halimbawa sang kaisog, pagtuo, pagbatas, kag kakugi! May lupus ako, apang kamalingking lamang ini sa gin-antos kag ginbatas ni Sister Nisbet.

R. L. H., Estados Unidos

Sanglit paralisado ako kag indi makalakat, nagreklamo ako nga indi na ako pirme makabantala. Karon narealisar ko nga kon ining babayi, nga nabuhi sa iron lung sa 37 ka tuig, nakabantala kag nakahimo sing mga disipulo, nian ako man mangin kontento sa masarangan ko nga himuon.

M. L., Italya

Ginaapresyar namon ina nga mga komento. Sa pagkamatuod, ang matutom nga halimbawa ni Sister Nisbet wala nagapakadiutay sa pagpakig-away nga ginahimo sang madamo nga may mabug-at nga mga problema sa panglawas nga daw maluya sing kinaugali apang kabangdanan gihapon sang madamo nga pag-antos.​—ED.

Tinapay Salamat sa artikulo nga “Our Daily Bread.” (Disiembre 8, 1992 nga Awake!) Gintilawan ko ang inyo resipe sang tinapay, kag nalipay ako kon daw ano kahapos gali maghimo sing tinapay kag kon daw ano kanamit sini.

M. M., Estados Unidos

Madamo ako sing mga libro sa pangluto sa talaguan, apang wala sing resipe sa sina nga mga libro ang nakahatag sing maayo nga resulta subong sang inyo resipe. Madamo nga salamat!

S. H., Alemanya

Paghingabot sang Nazi Napalig-on gid ako sang artikulo nga “The Nazis Couldn’t Stop Us!” nga ginsulat ni Erwin Klose. (Nobiembre 22, 1992 nga Awake!) Indi kaangay sang iban pa nga mga eksperiensia nahanungod sa mga Nazi nga nabalhag tubtob karon, ang sugilanon ni Erwin Klose ginsaysay nga nagapakadlaw. Kon kaisa indi ko mapunggan ang magkadlaw! Napalig-on ako bangod sang iya malipayon kag positibo nga pagtamod sa mga butang.

T. K., Hapon

Mga Kombension sa Rusya Luyag ko gid kamo pasalamatan sa artikulo nga “Russia’s First International Convention of Jehovah’s Witnesses.” (Disiembre 22, 1992 nga Awake!) Bisan pa madugay na ako nga alagad ni Jehova nga Dios, ginabaton ko nga ang akon apresasyon sa mga aman sang Dios indi mapaanggid sa iya sang mga Cristiano sa Rusya! Ang pangguyahon sang utod nga babayi sang mabaton niya ang iya nahaunang personal nga kopya sang Biblia nagparealisar sa akon kon daw ano gid ang yara sa akon​—kag ginpasapayanan lamang. Ang artikulo nagbulig sa akon nga makita ang mga bahin nga kinahanglan ko bag-uhon.

B. T. A., Estados Unidos