Gikan sa Amon mga Bumalasa

Bagyo nga Andrew Daw ano katahom nga artikulo! (“Mga Butang nga Indi Maguba sang Bagyo nga si Andrew,” Enero 8, 1993) Bangod naeksperiensiahan ko ang pribilehiyo nga makabulig sa hilikuton sa pagtabang, naluyagan ko gid ang mga binalikwat gikan sa lokal nga mga pumuluyo. Ang pito ka adlaw nga ginhinguyang ko didto nagpabakod sang akon pagsalig kay Jehova kag nagpalig-on sa akon nga higugmaon sing kapin pa ang akon Cristianong kauturan nga mga lalaki kag mga babayi.

M. J., Estados Unidos

Paghingabot sang mga Nazi Salamat sa artikulo nga “Paghupot sing Integridad sa Nazi nga Alemanya.” (Pebrero 8, 1993) Madamo gid nga pagtilaw ang naagihan sang aton Cristianong kauturan nga mga lalaki kag mga babayi, apang nagpabilin sila nga matutom! Kon matabo man nga ako makaeksperiensia sing mabudlay nga pagtilaw, nagalaum ako nga kuntani may kusog ako kag pagbatas ni Josef Rehwald kag sang iya pamilya.

D. J., Estados Unidos

Nabasa ko karon ang sugilanon sa kabuhi ni Josef Rehwald. Nagluha ang akon mga mata samtang ginahunahuna ko kon paano ginasakdag ni Jehova ang iya mga alagad sa tion sang kasisit-an. Indi ako makapugong nga pasalamatan Sia!

V. M., Italya

Kalingawan Ang mga artikulo nga “How Does Entertainment Affect Your Life?” (Nobiembre 8, 1992, Awake!) sibu gid sa tion. Gin-apresyar ko gid labi na ang impormasyon tuhoy sa mga sine. Nagatrabaho ako sa arkilahan sing mga video, kag ang sine nga Basic Instinct nga inyo ginsambit sa inyo artikulo amo ang isa sang pinakamadahog. Indi ako makapati kon paano nangin daku nga negosyo ang subong sina kalaut nga mga sine!

D. M., Estados Unidos

Modernong Arte Sa pagbasa sang artikulo nga “Modern Art Fails a Test” (“Watching the World,” Nobiembre 8, 1992, Awake!), ang isa makatigayon sing impresyon nga ang acrylic nga pintura indi mapuslanon gid. Indi subong sina. Sa pagkamatuod, mas madamo ini sing importante nga mga bentaha sangsa iban nga mga sahi sang pintura. Halimbawa, wala ini nagatahaw. Dugang pa, ang komersial nga kanbas nagagamit sing acrylic subong pundo nga pintura. Ang peligro nga magpanitpanit ini nagakatabo kon indi husto ang paglamhit sa acrylic nga pintura, ayhan sa isa ka mahigko ukon mantikaon nga kadaygan. Mahimo nga amo sini ang natabo sa mga artist nga ginhingadlan.

J. W., Switzerland

Ginaapresyar namon ini nga paathag.​—ED.

Balingag nga mga Anak Salamat sa inyo artikulo nga natig-uluhan “Young People Ask . . . Will I Turn Out Like My Brother?” (Disiembre 22, 1992, Awake!) Gin-apresyar ko gid ini sing labi. Ang akon magulang nga babayi isa anay ka payunir [bug-os tion nga ebanghelisador], kag suod gid kami. Tulumuron ko anay nga magpayunir kaupod niya, apang ang akon tulumuron wala madayon. Apat ka bulan sa tapos ako mabawtismuhan subong isa sang mga Saksi ni Jehova, ginsikway [ginpaguwa] sia gikan sa kongregasyon. Binudlayan gid ako sa sini, labi na kon mamangkot ang mga abyan tuhoy sa iya. Wala ko na sia ginapabugal. Ang artikulo nagparealisar sa akon nga mahimo ako (kag himuon ko gid) mangin tuhay!

L. S., Estados Unidos

Binudlayan gid ako sang ang akon magulang nga lalaki ginsikway. Apang, wala ako mangin subong sa iya. Nakagradwar na ako karon sa hayskol kag makapayunir. Nagabulig man ako sa pagpatindog sing mga Kingdom Hall sang mga Saksi ni Jehova. Luyag ko magpangabudlay sing lakas kag magpadayon sa paghimo sang kon ano ang maayo.

K. M., Japan

Duha ka magulang ko nga mga lalaki ang ginsikway. Kon kaisa nahadlok ako magpabawtismo kay basi mangin subong ako sa ila. Ginsabat ni Jehova ang akon mga pangamuyo paagi sa sining artikulo. Sang Enero, ginbawtismuhan ako. Sa amo napakita ko sing dayag nga nadedikar ko na ang akon kaugalingon kay Jehova, kag magahalong ako nga indi pagsuliton ang mga sayop sang akon mga utod nga lalaki.

R. C., Italya