Gikan sa Amon mga Bumalasa

Mga Hampanganan sa Aprika Daw ano katahom nga artikulo ang “Mga Hampanganan sa Aprika sa Walay Bayad”! (Abril 8, 1993) Subong isa ka manunudlo sa art, nahibaluan ko kon daw ano ka importante nga sakdagon ang pagkamatugahon sa kabataan sa sining dag-on sang telebisyon kag mga hampang sa kompyuter. Kon ang mga ginikanan maghinguyang sing tion sa paghimo sing mga butang upod sa ila kabataan, nagatuga man sila sing mga handumanan nga indi malipatan!

D. B., Alemanya

Siete anyos ako. Naluyagan ko ang artikulo, kag talalupangdon nga ang [kabataan sa Aprika] nagahimo sang ila kaugalingon nga mga hampanganan! Daw makalilipay ini, kag luyag ko ini tilawan.

M. S., Estados Unidos

Panglugos Ang inyo serye sang mga artikulo tuhoy sa “Rape​—A Woman’s Nightmare” maayo gid. (Marso 8, 1993, Awake!) Katorse anyos ako, kag nabatian ko nga ang mga bata nga babayi nga mas bata pa sa akon ginlugos. Apang tubtob lamang sang mabasa ko ang inyo artikulo nga nakahibi ako, kag narealisar ko nga mas serioso gali ini sangsa ginahunahuna ko. Madamo gid nga salamat.

S. B., Estados Unidos

Sang una nga tuig ko sa hayskol, ginlugos ako sang isa ka “abyan sang amon pamilya.” Sa nagligad nga pila ka tuig, nagdumdom ako nga nakahimo ako sing pagpakighilawas. Nahangpan ko na karon nga si Jehova nakahibalo nga indi ko yadto sala! Nagakasubo lamang ako nga wala ako makatigayon sing bulig sing mas maaga.

A. S., Estados Unidos

Madamo ang mga programa tuhoy sa paglandas sang eksperiensia nga nalugos ang isa, apang wala ini nagasugid kon paano ini likawan. Sa pagkamatuod mas importante ang pagtapna sangsa pagbulong! Sa sini nga bahin ang artikulo nakabulig sa akon sing daku, kag sa pagkamatuod magabulig ini sa mga babayi bisan diin nga mahimo mangin mga biktima.

J. A. M., Brazil

Gin-atake ako sang isa ka manuglugos sa guwa sang akon puluy-an. Nakig-away ako sing pagpakig-away nga wala ko pa gid mahimo sang una kag ginsinggit ko ang ngalan ni Jehova sing mabaskog gid sa madamo nga bes amo kon ngaa nagsugod sa pagtinaghol ang mga ido. Ang nagaatake sa akon linapyo sang ulihi sa akon pagsinggitan kag nalagyo. Ginarekomendar ko sa tanan nga sundon ang inyo mga panugda. Depende sa mga kahimtangan nga nadalahig, ang aton mga aksion makahimo sing daku nga kinatuhayan.

S. P., Estados Unidos

Halos 20 ka tuig na ang nagligad, ginlugos ako sang isa ka kakilala. Wala ko gid ini pag-ireport bangod nahuya ako. Wala gid ako maghambal nahanungod sini tubtob sang nagligad lamang nga tatlo ka tuig sa terapiya. Sadto ko lamang gintu-ad ini sa akon bana. Nahangpan na niya karon ang akon paglikaw sa seksuwal nga paghirupay. Sang mabasa ko ang inyo mga artikulo, naghibi ako sa kalipay​—indi sa kasakit—​sa una nga tion sa sulod sang 20 ka tuig, kag nagpasalamat ako kay Jehova.

T. P., Estados Unidos

Paglagulad sa Kahawaan Nabasa ko ang ekselente nga mga artikulo tuhoy sa paglagulad sa kahawaan sa guwa sang Awake! nga Septiembre 8, 1992. Walay sapayan nga diutay lang ang akon nahibaluan nahanungod sini nga tema, nagdayaw ako sa paathag nga ginhatag ninyo. Nagapati ako nga ining mga artikulo magabulig sa amon nga apresyahon sing dugang pa ang katuyuan ni Jehova para sa matinumanon nga tawhanon nga pamilya.

W. D. F., Costa Rica

Nagsulat kami agod pasalamatan kamo sa inyo panikasog nga tipunon ang mga artikulo tuhoy sa paglagulad sa kahawaan. Sa tapos mabasa ang katapusan nga artikulo, malipayon nga ginpasalamatan namon si Jehova, ang nakahibalo sing tanan nga Dios, nga nag-organisar sang uniberso sa subong sina ka makatilingala nga paagi. Malangkagon nga ginapaabot namon ang bag-ong sistema, nga sa amo nga tion hatagan niya ang matinumanon nga katawhan nga may himpit nga utok sing kahigayunan sa pagpauswag sang ila paghangop sa uniberso.

I. N. O. kag J. N. O., Nigeria