Gikan sa Amon mga Bumalasa

Mga Sablag sa Lawas Ang artikulo nga “Young People Ask . . . Why Do I Have to Suffer With a Disability?” (Mayo 22, 1993) realistiko nga nagpaathag sining problema. May diperensia ang akon duha ka tiil kag tuman ako ka sensitibo kon ginatulok ako sang mga tawo nga may pagkaluoy. Ang nagasaklaw gid sa akon amo kon may maghatag sa akon sing limos​—nga subong bala isa ako ka manugpakilimos! Ginalugpayan ako sa paghibalo nga si Jehova wala nagatulok sa pisikal nga kahimtangan kundi “nagatulok sa tagipusuon.”​—1 Samuel 16:7.

A. A. A. S., Brazil

Nagapamatok ako sa inyo pagpatuhoy sa cerebral palsy subong isa ka balatian. Ang cerebral palsy isa ka kahimtangan nga ginapautwas sang halit sa utok, masami nagakatabo antes, sa tion, ukon pagkatapos gid sang pagkabun-ag. Indi ini progresibo ukon makalalaton. Indi ini isa ka balatian kag indi gid dapat patuhuyan subong amo.

L. Z., Estados Unidos

Ginakasubo namon kon ang mga tinaga nga ginpili namon nakasaklaw. Gingamit namon ang tinaga nga “balatian” sa kabilugan nga kahulugan nga ginhatag sa “Webster’s New Collegiate Dictionary,” nga amo, “isa ka kahimtangan . . . nga nagasablag sa pagpanghikot sang isa ka importante nga hilikuton.”​—ED.

Sirkunsisyon sa Babayi Salamat sa pagbuyagyag kon daw ano ka demonyohanon kag malaut ang buhat nga pagtuli sa mga babayi! (“Minilyon ang Nagaantos​—Mabuligan Bala Sila?” Abril 8, 1993) Kon isa lamang ka bata ang maluwas sa kasakit sining wala mabuyagyag, makakulugmat nga krimen, nian mapuslanon gid ang pagbalhag sa artikulo.

J. C., Estados Unidos

Ang akon mga mata napuno sing mga luha sa paghunahuna nga ginapaantos sing subong sina sang mga ginikanan ang kabataan nga indi makapangapin sa ila kaugalingon. Ang mga balita kaangay sini wala ginabalhag sa amon pamantalaan, gani ginapasalamatan ko kamo sa pagpahibalo sini sa amon.

C. C. G. M., Brazil

Homework Salamat gid sa artikulo nga “Young People Ask . . . What Can I Do About So Much Homework?” (Abril 8, 1993) Ginbasa ko ang artikulo sang tion nga nahul-an gid ako bangod sang madamo nga tulun-an para sa eskwelahan. Wala ako sing tion sa pagpahunayhunay ukon sa paghanda para sa Cristianong mga miting. Ginaaplikar ko na karon ang inyo mga panugda.

M. H., Estados Unidos

Pag-emigrar Nalipay ako sa pagpabutyag sang akon pasalamat sa artikulo nga “Young People Ask . . . Should I Move to a More Prosperous Country?” (Abril 22, 1993) Disiseis anyos ako kag nagplano ako nga magsaylo sa isa ka pungsod diin basi mag-ayoayo ang akon kabuhi. Apang sa tapos ko mabasa ang artikulo, ginbatyag ko nga indi importante kon sa diin kita nagapuyo. Kon unahon naton sa aton kabuhi ang Ginharian ni Jehova, pat-od gid nga magabugana kita [sa espirituwal] kay buligan kita ni Jehova.

V. L. A., Brazil

Paglugos Nagasalamo ang akon nabatyagan sang mabaton ko ang Marso 8, 1993, nga guwa tuhoy sa “Rape​—A Woman’s Nightmare.” Kay man, abi ninyo, ang akon iloy nga isa ka bug-os tion nga ebanghelisador sa sulod sang madamo nga tinuig, biktima anay sang makakulugmat nga pag-atake kag pagtinguha nga luguson sia sa iya mismo puluy-an. Ang pagbasa sang mga artikulo nakabulig sa pagpaayo.

P. G., Estados Unidos

Isa ako ka kabulig nga direktor sang lokal nga “Family Violence and Sexual Assault Services.” Nabasa namon ang Magmata! sang ang isa sang inyo pamatan-on nga mga ministro nagdala sa amon sing isyu tuhoy sa pag-abuso sa bata. (Oktubre 8, 1991) Nagasuskriber na kami karon. Luyag ko ipahibalo sa inyo nga nahamuot gid ako sa inyo mga isyu tuhoy sa kasingki kag paglugos sa sulod sang pamilya. Maayo gid ang pagkasulat sini kag maid-id ang panalawsaw nga nahimo.

D. G., Estados Unidos