Kinaandan nga Sayop nga mga Paghangop

Sayop nga Paghangop: Ang mga manug-abuso sa bata masami nga mga dumuluong, mga buangbuang nga nagakidnap sa kabataan kag nagagamit sing pisikal nga kusog sa pag-abuso sa ila.

Sa kalabanan gid nga mga kaso​—halin sa 85 tubtob 90 porsiento suno sa pila ka pagbanta—​ang manug-abuso amo ang isa ka tawo nga kilala kag ginasaligan sang bata. Sa baylo nga maggamit sing kusog, masami nga ginamaniobra sang mga manug-abuso ang bata sa seksuwal nga mga buhat sing amat-amat, ginahingalitan ang limitado nga eksperiensia kag ikasarang sa pagpangatarungan sang bata. (Ipaanggid ang 1 Corinto 13:11 kag Hulubaton 22:15.) Ining mga manug-abuso indi mga tawo nga ditimbang sa ila panghunahuna. Madamo ang relihioso, talahuron, kag naluyagan gid sa komunidad. Suno sa Federal Bureau of Investigation sang Estados Unidos, “indi makatarunganon hunahunaon nga ang isa indi pedophile bangod lamang mabuot sia, palasimba, mapisan magtrabaho, maluluy-on sa mga sapat, kag iban pa.” Ang panalawsaw sining karon lang nagapahangop nga sayop man ang maghunahuna nga ang tanan nga manug-abuso mga lalaki ukon nga ang tanan nga biktima mga babayi.

Sayop nga Paghangop: Ang kabataan nagahanduraw ukon nagabinutig nahanungod sa seksuwal nga pag-abuso.

Sa idalom sang normal nga mga kahimtangan wala pa ang kabataan sing eksperiensia ukon paghangop sa seksuwal nga mga butang agod mag-imbento sila nga sila gin-abusuhan, bisan pa mahimo nga ang pila sang magagmay nga kabataan magumon nahanungod sa mga detalye. Bisan ang labing maduhaduhaon sa mga mananalawsaw nagaugyon nga ang kalabanan sang ginapangangkon nga pag-abuso matuod gid. Binagbinaga ang libro nga Sex Abuse Hysteria​—Salem Witch Trials Revisited, nga nagasugid sang butig nga mga pangangkon sa pag-abuso.a Ini nga libro nagabaton: “Ang matuod gid nga pag-abuso sa sekso sa kabataan lapnag kag ang kalabanan sang pag-abuso sa sekso nga ginapangangkon sang kabataan . . . mahimo gid nga may kamatuoran (ayhan sing 95% ukon kapin pa).” Nabudlayan gid ang kabataan sa pagreport sang pag-abuso. Kon nagabinutig sila nahanungod sa pag-abuso, sa masami ginahimo nila ini agod ipanghiwala nga natabo ini bisan pa matuod nga natabo gid ini.

Sayop nga Paghangop: Ang kabataan mahayluhon kag masami nga ang ila paggawi amo ang ginabangdan sang pag-abuso.

Ini nga ideya tiko gid, kay, sa epekto, ang ginabasol sa pag-abuso amo ang biktima. Wala pa sing buot ang kabataan sa seksuwalidad. Wala sila sing ideya kon ano ang ginapahangop sina nga butang ukon kon paano ini magabag-o sa ila. Busa indi sila makapasugot sa sini agod makatigayon sing seksuwal nga kaayawan. Ang manug-abuso, kag ang manug-abuso lamang, ang balasulon.​—Ipaanggid ang Lucas 11:​11, 12.

Sayop nga Paghangop: Kon isugid sang kabataan ang pag-abuso, dapat sila tudluan sang mga ginikanan nga likawan ang paghambal tuhoy sini kag ‘kalimtan na lang ini.’

Sin-o ang labi nga makabenepisyo kon maghipos ang bata tuhoy sa pag-abuso? Indi bala amo ang manug-abuso? Sa kamatuoran, ginpakita sang mga pagtuon nga ang pagpanghiwala nga ginapunggan ang emosyon mahimo nga amo ang pinakakubos ka epektibo nga paagi sa paglandas sang masakit nga handumanan tuhoy sa pag-abuso. Sa siam ka metodo sa paglandas nga gingamit sang isa ka grupo sang adulto nga mga biktima nga gintun-an sa Inglaterra, ang mga nagpanghiwala, naglikaw, ukon nagpugong sa hulusayon amo ang nag-antos sing kapin nga emosyonal nga problema kag kasakit sang adulto na sila. Kon ikaw makahaladlok nga gin-atake, luyag mo bala nga suguon ka nga indi maghambal tuhoy sini? Ngaa abi suguon ang isa ka bata sing subong sina? Ang pagtugot sa bata nga magpakita sing normal nga reaksion sa sinang makangilil-ad nga butang, subong sang kasubo, kaakig, kalisod, magahatag sa iya sing kahigayunan nga kalimtan ang pag-abuso.

[Mga footnote]