Gikan sa Amon mga Bumalasa

Kamingaw Luyag ko pasalamatan kamo sing madamo bangod sang mga serye nga “Loneliness​—What You Can Do About It.” (Septiembre 22, 1993) Nag-abot ini sang adlaw nga ang pamatyag ko isahanon lamang ako. Bisan pa ginpahibi ako sini, nag-ayuayo ang pamatyag ko sa tapos ko ini mabasa. May madumduman ako nga pila ka mga abyan nga mapalig-on kon mabasa nila sini.

B. H., Estados Unidos

Bisan pa madugay ko na ginhandum ang pagguwa sina nga artikulo, nag-abot ini nga wala ginapaabot. Luyag ko ipabutyag ang akon tinagipusuon nga mga pasalamat sa laygay nga gin-unod sini. Ang kamingaw mabudlay gid hangpon kon wala mo ini maeksperiensiahi.

C. G., Italya

Treintay-otso anyos ako kag nakaeksperiensia sing daku nga kamingaw, bangod bugtong lamang ako nga anak kag sang ulihi nagbaylo ako sing karera kag nagdiborsio sa akon tiayon. Ang materyal makapasanag kag edukasyonal. Apang, wala ninyo masambit nga ang kamingaw makadul-ong sa seksuwal nga imoralidad, pag-abuso sa droga, kag malain nga mga pagpakig-upod.

J. B., Estados Unidos

Sa sining partikular nga artikulo, ginpakamaayo namon nga hatagan sing igtalupangod ang nga paagi sa paglandas sa kamingaw sangsa nga katalagman sini. Apang, ginaapresyar namon ini nga obserbasyon.​—ED.

Mga Mariposa kag mga Alibangbang Subong isa ka tawo nga may interes sa biolohiya, luyag ko magdugang sing isa ka punto sa artikulo nga “Mariposa ukon Alibangbang​—Paano Mo Makilal-an?” (Mayo 8, 1993) Ang pinakamaathag nga paagi agod makilal-an sa gilayon ang mariposa kag ang alibangbang amo ang pagpanilag sa ila pagpungko. Ang mariposa nagapungko nga ang iya mga pakpak nagabukadkad sing matapan; ang alibangbang, nagapilo sang iya mga pakpak sing patindugon.

Y. Y., Estados Unidos

Salamat sa sining dugang pa nga impormasyon. Ang “The World Book Encyclopedia” nagasiling nga matuod ini sa ‘kalabanan nga nga alibangbang kag nga mariposa.’​—ED.

Pamangkot sang mga Pamatan-on . . . Salamat sa artikulo nga “Am I Developing Normally?” (Septiembre 22, 1993) Ang akon utod nga babayi mas bata sa akon sing isa ka tuig, kag tuman sa iya kataas. Nahibaluan ko na karon nga indi nagakahulugan nga magapabilin ako nga manubo.

C. L., Estados Unidos

Salamat sa artikulo nga “What About Hanging Out?” (Hunyo 22, 1993) Indi gid ako isa ka sahi sang tin-edyer nga nagaistambay upod sa iban pa nga mga pamatan-on. Bangod sini nagbatyag ako nga may diperensia ako. Apang ginbuligan ako sang artikulo sa paghangop nga ang pag-istambay makadala sa imo sa madamo nga gamo. Mas maayo nga gamiton ko ang akon tion sa pagluto, pagdrowing, pagsulat, kag pagbantala.

K. R., Estados Unidos

Onse anyos lamang ako, apang naluyagan ko gid ang artikulo nga “How Can I Avoid Getting AIDS?” (Septiembre 8, 1993) Ginhambalan namon ini sang akon iloy. Salamat sa pagpaathag ninyo sing detalyado kon paano malikawan ang virus sang AIDS. Nagdumdom ako nga matigayon mo ini sa madamo nga paagi!

L. K., Estados Unidos

Holocaust Museum Kasan-o lang ang superbisor sa amon trabaho nagplano sa pagduaw sa Holocaust Memorial Museum. Ginhatag ko sa iya ang artikulo sa Mayo 8, 1993 nga “Holocaust Museum kag mga Saksi ni Jehova” agod makatigayon sia sing dugang pa nga ideya nahanungod sa iya duawon. Ang museo nagapasirkular sing 500 ka personal nga mga eksperiensia sa ginapanghatag nga mga kard. Ang iya kard may eksperiensia sang isa sang mga Saksi ni Jehova​—si Emma Arnold. Nakilala sang akon pamilya ang pamilya nga Arnold sang 1951 kag may retrato nila sa photo album. Nakibot ang akon superbisor nga nakakuha sia sing eksperiensia indi lamang sang isa ka Saksi kundi sang isa nga kilala sang akon pamilya! Ginpakita ko sa iya kag sa iban sa amon trabaho ang amon mga retrato kag ang eksperiensia sang umagad nga lalaki ni Utod Arnold nga si Max Liebster, nga nagguwa sa Oktubre 1, 1978 sang Ang Lalantawan.

J. K., Estados Unidos