Isa Ka Bag-ong Kalibutan—Magakari gid Bala Ini?

SANG Abril 13, 1991, ang anay presidente sang Estados Unidos, nga si George Bush, nagpamulungpulong sa Montgomery, Alabama, nga natig-uluhan: “Ang Posibilidad sang Isa ka Bag-ong Kalibutan nga Kahimusan.” Sa paghinakop, sia nagsiling: “Nagaatubang sa aton ang bag-ong kalibutan . . . , isa ini ka makakulunyag nga kalibutan sang pagtukib.”

Duha ka bulan sang ulihi ang The Bulletin of the Atomic Scientists nagsiling nga sa pagkapukan sang Komunista nga mga panguluhan sa Nasidlangan nga Europa, “ang isa ka bag-ong kalibutan nga kahimusan pasad sa paghidait, hustisya, kag demokrasya daw malapit na.”

Ang paghambalanay tuhoy sa isa ka bag-ong kalibutan nagpadayon sang 1993. Nagreport sang Enero ang The New York Times tuhoy sa isa ka kasugtanan nga nagapangako sang pagbuhin sang mga armas nuklear. Ang pamantalaan nagsiling: “Ini nagpahamtang sa Amerika kag Rusya ‘sa gawang sang isa ka bag-ong kalibutan nga paglaum,’ sa pinili nga mga tinaga ni Presidente Bush.”

Pagkaligad sang duha ka semana, ang bag-o nga presidente sang E.U., nga si Bill Clinton, nagpamulungpulong sa inagurasyon sang iya pagkapresidente: “Karon, samtang nagataliwan ang daan nga kahimusan, ang bag-ong kalibutan mas hilway apang kubos kalig-on.” Sia nagpangangkon pa: “Ining bag-ong kalibutan nagpauswag na sa kabuhi sang minilyon ka Amerikano.”

Gani madamo sing hambalanay tuhoy sa isa ka bag-o nga kalibutan​—isa ka tuhay kag mas maayo nga kalibutan. Suno sa isa ka pag-isip, si George Bush naghambal sing 42 ka bes tuhoy sa isa ka “Bag-ong Kalibutan nga Kahimusan” sa iya publiko nga pahayag.

Pinasahi bala ini nga hambalanay? Nabatian na bala ini sang una pa?

Wala Gid sing Bag-o

Sang Mayo 1919, pagkatapos sang Inaway Kalibutanon I, nagsapol ang Federal Council of the Churches of Christ in America sa Cleveland, Ohio, diin gin-anunsio ‘ang posibilidad sang isa ka bag-o kag mas maayo nga kalibutan.’ Nagpahayag ang isa ka humalambal: “Mangin isa ini ka bag-ong kalibutan diin ang prinsipio sang paindis-indis magahatag sing dalan sa prinsipio sang asosasyon kag paghiliupod. Mangin isa ini ka bag-o nga kalibutan diin ang prinsipio sang paghiusa magailis sang prinsipio sang pagbinahinbahin . . . Mangin isa ini ka kalibutan diin ang paghiliutod kag pagpakig-abyan magailis sang tanan nga pagdumot luwas sa inaway batok sa malaut.”

Paano ang mga iglesia nagapati nga magaabot ining bag-ong kalibutan? Paagi bala sa Ginharian sang Dios nga panguluhan nga ginsaad sa Biblia? Indi. Nagapaabot sila nga isa ka politikal nga organisasyon ang magadala sing isa ka bag-ong kalibutan. “Ang aton ginapatuhuyan karon nga Liga de Nasyones,” siling sang isa ka lider sang iglesia, “isa ka kinahanglanon gid kag dimalikawan nga bunga sang aton tanan Cristianong pagtuo kag panikasog sa kalibutan.” Ginsakdag pa gani sang mga lider sang Iglesia sadtong tion ang Liga de Nasyones subong ang “politikal nga ekspresyon sang Ginharian sang Dios sa duta.”

Sa pihak nga bahin, ang gamhanan nga lider sang Alemanya nga si Adolf Hitler, nagpamatok sa Liga de Nasyones kag sang katuigan 1930 iya ginpatindog ang Third Reich sang Alemanya. Nagpangangkon sia nga ang Reich magalawig sing isa ka libo ka tuig kag magahimo sang ginasiling sang Biblia nga mahimo lamang sang Ginharian sang Dios. “Nagasugod ako sa mga pamatan-on,” siling ni Hitler. “Upod sa ila makahimo ako sing isa ka bag-o nga kalibutan.”

Nagpatindog si Hitler sang higante nga istadyum sa Nuremberg agod ipasundayag ang gahom sang Nazi. Sing makahulugan, gintukod niya ang 144 ka higante nga mga haligi sa entablado nga halos 300 metros ang kalabaon. Ngaa 144 ka haligi? Ang Biblia nagasambit sang 144,000 nga magagahom upod “sa kordero” nga si Jesucristo, kag nga ang ila paggahom mangin isa ka libo ka tuig. (Bugna 14:1; 20:​4, 6) Sing dayag, ang pagpatindog sing 144 ka haligi sa istadyum sa Nuremberg dili natabuan lang nga numero, bangod ang paggamit sang tinaga sang Biblia kag sang simbulismo sang mga opisyales sang Nazi dukumentado gid.

Ano ang resulta sang pagpaninguha sang tawo sa pagtuman sang ginasiling sang Biblia nga mahimo lamang sang Ginharian sang Dios?

Ang Kapaslawan sang mga Pagpaninguha sang Tawo

Maathag nga ginapamatud-an sang maragtas nga ang Liga de Nasyones napaslawan sa pagpaluntad sing isa ka bag-o nga kalibutan sang paghidait. Yadto nga organisasyon napaslawan sang ang mga pungsod nagpakigbahin sa Inaway Kalibutanon II. Dugang pa, pagligad sang dose ka tuig lamang nalaglag ang Third Reich. Bug-os gid yadto nga kapaslawan, isa ka kahuluy-an sa tawhanon nga pamilya.

Sa bug-os nga maragtas lunsay lang kapaslawan ang mga pagpaninguha sang mga tawo sa pagtuga sing isa ka mahidaiton nga bag-ong kalibutan. “Ang tagsa ka sibilisasyon nga nagluntad napukan sa ulihi,” panilag sang anay Sekretaryo sa Estado sang E.U. nga si Henry Kissinger. “Ang maragtas isa ka estorya sang mga napaslawan nga paninguha, sang mga handum nga wala matigayon.”

Nian, ano ang tuhoy sa bag-ong kalibutan nga kahimusan nga ginasiling sang mga lider sang kalibutan sining karong lang? Ang pagdabdab sang etniko nga kasingki naghimo nga kaladlawan sang ideya sa isa ka bag-o nga kalibutan. Halimbawa, sang nagligad nga Marso 6, ang kolumnista nga si William Ptaff nagyaguta: “Nag-abot na ang bag-ong kalibutan nga kahimusan. Nagapanghikot ini sing maayo kag bag-o gid matuod, nagapakabalaan sang pagpanakop, pagpanalakay kag etniko nga pagpapas subong ginabaton nga internasyonal nga pagginawi.”

Makalilisang ang dalagku nga kinagubot kag mga pamintas kutob sang napukan ang Komunismo. Bisan si George Bush, sang wala pa sia makapanaug sa gahom sang Enero, nag-ako: “Sa ulihi, ang bag-ong kalibutan mangin subong man ka makatalagam sa nauna.”

Rason sa Paglaum?

Nagakahulugan bala ini nga ang kahimtangan wala na sing paglaum? Ang isa ka bag-o nga kalibutan mangin isa lang bala ka damgo? Sing maathag, ang mga tawo indi makasarang sa pagtuga sing isa ka bag-o nga kalibutan. Apang ano ang tuhoy sa saad sang Manunuga sa paghimo sini? “Apang suno sa iya [Dios] saad nagahulat kita sing bag-ong mga langit kag bag-ong duta,” siling sang Biblia.​—2 Pedro 3:13.

Ang bag-ong mga langit nga ginasaad sang Dios amo ang isa ka bag-ong kagamhanan sa ibabaw sang duta. Ining bag-ong kagamhanan amo ang Ginharian sang Dios, ang iya langitnon nga panguluhan nga gintudlo ni Jesus sa katawhan nga ipangamuyo. (Mateo 6:​9, 10) Inang langitnon nga panguluhan ginahuman ni Jesucristo kag sang 144,000 nga mga masigka-gumalahom, kag ang bag-ong duta mangin isa ka bag-ong katilingban sang katawhan. Huo, magakabuhi sila sa mahimayaon nga bag-ong kalibutan nga mainunungon nga nagasakdag sa pagbulut-an sang Dios.

Ang Ginharian sang Dios nga panguluhan magagahom sa bug-os nga ginsaad nga bag-ong kalibutan. Gani ining bag-ong kalibutan mangin indi hinimuan sang tawo. “Ang ginharian sang Dios wala nagakahulugan nga isa ka hilikuton nga himuon sang tawo ukon isa ka kagamhanan nga ila patindugon,” paathag sang isa ka ensiklopedia sa Biblia. “Ang ginharian isa ka diosnon nga buhat, dili isa ka tawhanon nga binuhatan ukon binuhatan bisan sang dedikado nga mga Cristiano.”​—The Zondervan Pictorial Encyclopedia of the Bible.

Ang bag-ong kalibutan sa idalom sang Ginharian sang Dios pat-od gid nga magaabot. Makasalig ka sa saad nga magaabot ini bangod ginsaad ina sang “Dios, nga indi makabutig.” (Tito 1:2) Palihug binagbinaga kon mangin ano nga sahi sang kalibutan ang bag-ong kalibutan sang Dios.

[Picture Credit Line sa pahina 3]

Retrato sang NASA