Ginpaathag ang Ginasugidsugid nga Reinkarnasyon

ANG isa sang mga pagpamatok sa teoriya sang reinkarnasyon amo nga ang kalabanan nga tawo sa duta wala gid sing madumduman nga nabuhi na sila anay. Dugang pa, wala gani sila nagahunahuna nga mahimo nga nabuhi na sila sang una.

Matuod nga kon kaisa may makatilingala kita nga balatyagon nga ginapangilala naton ang isa ka tawo nga una pa lang naton nakita. Ang isa ka balay, banwa, ukon matahom nga duog mahimo nga daw pamilyar sa aton, bisan pa nahibaluan naton nga amo pa lang yadto ang una nga tion nga nakakadto kita didto. Apang, ining mga butang sarang mapaathag nga indi kinahanglan ang teoriya sang reinkarnasyon.

Halimbawa, ang pila ka lugar sa malapad nga mga duog mahimo nga daw alangay, amo kon ngaa kon magduaw kita sa isa ka bag-o nga duog, mahimo batyagon naton nga nakakadto na kita didto anay, bisan wala pa matuod. Madamo nga balay, mga opisina, mga balaligyaan, mga banwa, kag matahom nga mga duog sa pila ka bahin sang kalibutan ang kaanggid sa ila mga katumbas sa iban nga mga duog. Nga sila daw kaanggid sa aton nakita na anay indi pamatuod nga nakakadto na kita sa sina nga mga duog sa isa ka nagligad nga kabuhi. Nagaanggid lamang sila sa mga duog nga pamilyar sa aton.

Matuod man ini sa mga tawo. Ang iban daw nagaanggid gid sa iban sa panagway, nga daw may kadoble sila. Ang isa ka tawo mahimo nga may mga panghulaghulag nga nagapahanumdom sa aton sang lain nga tawo nga nagakabuhi pa ukon sang isa pa gani nga napatay na. Apang nakilal-an naton ina nga mga tawo sa karon nga pagkabuhi, indi sa nagligad nga pagluntad. Ang pagkaanggid sa hitsura ukon personalidad wala nagakahulugan nga kilala naton ining mga tawo sa nagligad nga kabuhi. Wala sing duhaduha nga kita tanan may nasal-an na nga isa ka tawo. Apang inang duha ka tawo nagakabuhi sa pareho nga tion nga nagakabuhi ikaw kag indi sa nagligad nga pagkabuhi. Wala ini sing kaangtanan sa reinkarnasyon.

Ang Impluwensia sang Paglupay

Bisan gani ang mga eksperiensia sa idalom sang paglupay sarang mapaathag nga indi kinahanglan ang teoriya sang reinkarnasyon. Ang aton pinakasulod nga panghunahuna isa ka talaguan sing impormasyon nga daku pa sangsa aton mahimo mahanduraw. Ang impormasyon nagadangat sa sining talaguan paagi sa mga libro, mga magasin, TV, radyo, kag paagi sa iban pa nga mga eksperiensia kag mga obserbasyon.

Ang kalabanan sining impormasyon ginatago sa nasuok nga bahin sang aton nasulod nga panghunahuna bangod wala naton ini ginakinahanglan sing direkta ukon sa gilayon. Ang aton pinakasulod nga panghunahuna daw kaangay sang mga libro sa librarya nga sa karon indi tanto ginakinahanglan kag gani dapat taguon sa bulutangan.

Apang, sa idalom sang paglupay, ang pangalibutan sang isa ka tawo ginabag-o amo kon ngaa nagaguwa ang nalipatan na nga mga memorya. Ginapatpat ini sang iban nga mga tawo subong isa ka nagligad nga kabuhi, apang mga eksperiensia lamang ini sa karon nga pagkabuhi nga nalipatan naton sing umalagi.

Apang, may yara pila ka kaso nga ayhan mas mabudlay ipaathag sa kinaugali nga paagi. Ang isa ka halimbawa amo kon ang isa ka tawo magsugod sa paghambal sing lain nga “hambal” sa idalom sang paglupay. Kon kaisa sarang mahangpan ang ginahambal, apang sa masami indi. Ang mga nagapati sa reinkarnasyon mahimo magasiling nga amo ini ang hambal nga ginhambal sang isa ka tawo sa iya una nga pagkabuhi.

Apang, nahibaluan na nga ang paghambal sing lain nga mga hambal nagakatabo man kon ang mga tawo yara sa isa ka kahimtangan sang mistiko ukon relihioso nga pagpanganinaw. Ang mga tawo nga may subong sini nga mga eksperiensia kombinsido nga wala ini sing kaangtanan sa isa ka nagligad nga pagkabuhi kundi nga sila ginaimpluwensiahan sang dikitaon nga gahom sa karon nga pagkabuhi.

Wala nagapalareho ang mga opinyon kon ano ini nga gahom. Sa isa ka buyluganay nga deklarasyon sang Fountain Trust kag sang Church of England Evangelical Council, amo sini ang ginsiling tuhoy sa paghambal sing iban nga mga hambal: “Nahibaluan man namon nga ang kaanggid nga butang mahimo matabo sa idalom sang okulto/demonyohanon nga impluwensia.” Gani isa ka sayop nga konklusion ang silingon nga ina nga butang nagapamatuod nga nabuhi na kita anay.

Mga Eksperiensia Tuhoy sa Diutayan Lang nga Pagkapatay

Ti, ano naman ang ginasiling sang mga tawo nga mga eksperiensia nila tuhoy sa diutayan lang nga pagkapatay? Ginpatpat ini sang iban subong pamatuod nga ang isa ka tawo may kalag nga nagapadayon sa pagkabuhi sa tapos mapatay ang lawas. Apang ina nga mga eksperiensia mapaathag sing labi kaathag sa pila ka kinaugali nga mga paagi.

Sa Marso 1991 nga guwa sang Pranses nga magasin sa siensia nga Science & Vie, ang nanuhaytuhay nga mga hugna sang mga eksperiensia tuhoy sa diutayan lang nga pagkapatay ginatawag nga “isa ka kinaandan nga halimbawa sang halusinasyon” nga madugay na nakilal-an. Ang kaanggid nga mga eksperiensia wala lamang nagakatabo sa mga kahimtangan sang diutayan lang nga pagkapatay. Mahimo man ini matabo bangod sang “tuman nga kalapyo, hilanat, mga pag-atake sang kuyap, pag-abuso sa droga.”

Ang isa sa mga una gid sa pag-opera sa utok, si Wilder Penfield, nga nag-opera sa mga kuyapon nga gingamitan sing indi bug-os nga anestesya, nakahimo sing isa ka makawiwili nga tukib. Natukiban niya nga paagi sa pagpukaw sa nanuhaytuhay nga mga bahin sang utok sa kalalangan sang electrode, sarang niya mapahanabo nga ang pasyente magbatyag nga daw yara sia sa guwa sang iya kaugalingon nga lawas, nagaagi sa isa ka tanel, kag nagapakigkita sa napatay na nga mga paryente.

Ang isa ka makawiwili nga detalye sa sining bahin amo nga ang kabataan nga nakaagi sing mga eksperiensia tuhoy sa diutayan lang nga pagkapatay nagapakigkita, indi sa ila patay na nga mga paryente, kundi sa mga kaeskwela ukon mga manunudlo​—mga tawo nga nagakabuhi pa. Ginapakita sini nga ina nga mga eksperiensia may isa ka kahilabtanan sa kultura. Ang butang nga ginaeksperiensiahan may yara kaangtanan sa karon nga kabuhi, indi sa butang sa pihak sang kamatayon.

Si Dr. Richard Blacher nagsulat sa magasin nga The Journal of the American Medical Association: “Ang pagtagumatayon, ukon pag-antos sing isa ka makatalagam nga kahimtangan sa pisikal, isa ka proseso; ang kamatayon isa ka kahimtangan.” Subong isa ka halimbawa, ginsambit ni Blacher ang isa ka tawo nga sa nahauna nga tion nagasakay sa eroplano gikan sa Estados Unidos padulong sa Europa. “Ang pagsakay sa eroplano indi [pareho sa pagdangat] sa Europa,” sulat niya. Ang turista nga naghalin agod magkadto sa Europa, apang ang eroplano nga iya ginsakyan nagliso kag nagbalik pagligad lamang sang pila ka minuto, wala sing masugid tuhoy sa Europa subong nga ang isa ka tawo nga naulian gikan sa walay pangalibutan nga kahimtangan wala sing masugid tuhoy sa kamatayon.

Kon sa aton pa, ang mga tawo nga nakaeksperiensia sing diutayan lang nga pagkapatay wala gid mapatay. Nakaeksperiensia sila sing isa ka butang samtang buhi pa sila. Kag ang isa ka tawo buhi pa gihapon bisan pa mga segundo na lamang ang kalayuon niya gikan sa iya kamatayon. Diutayan lang sila mapatay apang indi pa patay.

Bisan gani ang mga tawo nga ang ila tagipusuon nagdulog sa makadali apang nasalbar pa wala gid sing madumduman gikan sa sadto nga mga tinion nga sila walay pangalibutan kag masiling nga “patay” na. Ang ila madumduman, kon may yara man, amo ang kon ano ang natabo samtang nagapadulong sa sinang malip-ot nga pagdulog sang tagipusuon, indi sa tion sang pagdulog sini.

Ang ginbalhag nga mga eksperiensia tuhoy sa diutayan lang nga pagkapatay halos pirme ginalaragway nga positibo, bisan pa nahibaluan nga may negatibo nga mga eksperiensia nga nagakatabo man. Ang Pranses nga saykoanalista nga si Catherine Lemaire nagpaathag sini: “Ang mga tawo nga wala makaeksperiensia sing [diutayan lang nga pagkapatay] nga nagabagay sa bitula nga ginapatuman sang IANDS [International Association for Near-Death Studies] wala sing interes sa pagsugid sang ila sugilanon.”

Wala sing Madumduman

Ang kamatuoran amo nga wala kita sing naeksperiensiahan nga kabuhi luwas sa aton ginakabuhi karon, sa nagligad man nga pagkabuhi ukon sa pagkabuhi sa pihak sang kamatayon. Busa, wala kita sing matuod nga madumduman tuhoy sa bisan ano luwas sa kabuhi nga aton aktuwal nga ginkabuhi.

Ang mga nagapati sa reinkarnasyon nagasiling nga ang kahulugan gid sang ibun-ag liwat amo ang pagtigayon sing isa ka bag-o nga kahigayunan sa pagpauswag sang aton kahimtangan. Kon matuod gid nga pila na ka kabuhi ang naagihan naton anay, apang nalipatan naton ini, ina nga pagkalipat sa nagligad mangin isa ka daku nga sablag. Makabenepisyo kita sa sini kon madumduman naton ang aton mga sala anay.

Subong man, ang mga nagasakdag sa ginatawag nga reinkarnasyon nga terapiya nagapati nga malandas mo ang mga problema karon kon, paagi sa paglupay, madumduman mo ang imo naagihan nga mga pagkabuhi anay. Ang teoriya nagasiling nga nagakabun-ag kita liwat agod pauswagon ang isa ka butang, apang nalipatan naton kon ano ina nga butang.

Ang pagkadula sing ikasarang sa pagdumdom sa karon nga pagkabuhi ginakabig nga isa ka sablag. Pat-od nga amo man sa sini nga kaso. Ang pagpamatok nga ina nga pagkalipat indi importante, kay ang maayo lamang nga mga tawo ang nagakabun-ag liwat subong mga tawo, indi isa ka maayo nga argumento sa karon nga adlaw kag dag-on nga ang kalautan nagapangibabaw sa kalibutan sing kapin sa bisan anong tion. Kon ang maayo lamang nga mga tawo ang nagakabun-ag liwat subong mga tawo, sa diin naghalin ang tanan nga malauton nga mga tawo? Indi bala nga dapat nagadiutay ang malauton nga mga tawo? Ang kamatuoran amo: Wala sing bisan sin-o, maayo ukon malain, ang nagaeksperiensia sing reinkarnasyon agod mag-umpisa sing bag-o naman nga kabuhi subong isa ka tawo ukon lain.

Apang, mahimo magasiling ikaw, ‘Indi bala isa ka panudlo sang Biblia ang reinkarnasyon?’ Binagbinagon naton ining pamangkot sa masunod nga artikulo.

[Blurb sa pahina 6]

Ang aton pinakasulod nga hunahuna daw kaangay sang isa ka librarya sang impormasyon nga ginatago anay apang mahimo dumdumon sa ulihi

[Blurb sa pahina 7]

“Ang kamatayon isa ka kahimtangan, indi isa ka proseso.”—Dr. Richard Blacher sa The Journal of the American Medical Association