Ang Pagtindog kag Pagkapukan sang Satanismo
Ang sataniko nga mga rito ginadumalahan sang mga pari nga may itom nga mga kunop didto sa madulom nga silong, nga nagapangadi sa atubangan sang nagapos nga mga biktima sa ibabaw sang altar, nga may nagapiraw-piraw nga mga kandila nga nagabanaag sing mahagnok nga mga landong sa mga dingding samtang ang ila pagsimba sa ila dios, nga si Satanas, nagapadayon. Gintingob sang sekreto nga ihibalo tuhoy sa isa ka tanhaga nga labaw sa kinaugali, ang lamharon nga mga umalambit sa sining paglakbay padulong sa duog sang okulto ginakunyag. Nagapalapit sila sa altar nga may indi mapaathag nga balatyagon nga pinasahi gid sila.
Isa bala ini ka walay halit, magataliwan nga luyagluyag lamang? Ukon isa bala ini ka demonyohanon nga kalautan nga nagalapnag sa katilingban karon?
MADAMO na ang nasulat sa mga pamantalaan, mga magasin, kag mga libro tuhoy sa makangilidlis nga mga buhat sang sataniko nga mga kulto. Ang mga detalye sang lapnag nga pagpanghikot sang mapintas nga sataniko nga mga grupo ginapalayag sa pungsudnon nga telebisyon kag radyo. Nangin isa ini ka daku nga problema sang pulisiya sa diutay kag daku nga mga siudad sa Amerika, Canada, kag Europa.
Ang Satanismo may pinasahi nga pangganyat para sa mga pamatan-on karon. Ginpaathag sang tagtukod sang Church of Satan kon ngaa amo sini, nga ginreport sa magasin ’Teen sang Hunyo 1993: “Sa baylo nga suguon ang mga katapo nga punggan ang ila kinaugali nga mga sugyot, ginatudluan namon sila nga dapat nila pasundan ini. Nagalakip ini sa pisikal nga kailigbon, handum sa pagtimalos, sugyot sa pagtipon sing materyal nga mga pagkabutang.”
Pat-od gid nga nahamuot si Satanas sa sining yawan-on nga ideolohiya, sanglit supak ini sa ginbugna sang Dios nga Cristianong mga prinsipio!
Nagauswag ang Satanismo. Isa ini ka nagadaku nga katalagman, apang malapit na ini mapapas. Napamatbatan na ang dios sini. Amo man ang kalibutan ni Satanas kag ang mga sumalakdag sini, kay “ang bug-os nga kalibutan yara sa gahom sang isa nga malauton.” (1 Juan 5:19; Roma 6:16) Para sa mga sumilimba ni Satanas kag sa tanan nga iban pa nga sing hungod ukon indi nagaalagad sa mga katuyuan ni Satanas, ang mensahe ni Jehova amo: “Ang Dios nga nagahatag sing paghidait magadugmok sa madali kay Satanas sa idalom sang imo mga tiil.”—Roma 16:20.
Ano nian, ang palaabuton sang nagaantos nga katawhan gikan sa “Dios nga nagahatag sing paghidait”? Ipakita sang masunod nga tatlo ka artikulo ang pagtindog kag pagkapukan sang Satanismo kag ang mga kahimtangan sa duta nga magabulos sa sini.