Ginalab-ot Paagi sa mga Kamot nga Nagasinyas
KUTOB sang Hunyo 1995 kag tubtob sang tig-ilinit, ang mga Saksi ni Jehova sa teritoryo sang sanga sang Estados Unidos naghiwat sing 181 ka distrito nga kombension nga may tema “Malipayon nga mga Dumalayaw.” Sa duha sini—isa sa sidlangan kag isa sa katundan—ang bug-os nga programa ginpresentar sing direkta sa American Sign Language. Sa amo labi nga nangin maathag ang programa—kay ang direkta nga pagpaathag sa mga bungol sa sign language mas madali mahangpan sangsa ipatpat ang ginahambal nga pulong.
Nagtambong ang mga delegado gikan sa 11 ka may sign-language nga kongregasyon kag mga 30 ka grupo sang sign-language sa iban nga bahin sang Estados Unidos. Apang nagtambong man ang mga delegado gikan sa Britanya, Canada, Denmark, Dominican Republic, Ecuador, Alemanya, Japan, Mexico, Norway, Puerto Rico, kag Rusya. Busa, makita ang internasyonal nga paghiliupod.
May gintakod nga mga video monitor agod ang programa mahimo makita sa closed-circuit nga telebisyon. Apang, ang pila sang mga delegado lunsay bungol kag bulag. Paano ining mga tawo makabenepisyo sa programa? Makatalandog gid ang pagtan-aw sa kapin sa isa ka gatos nga boluntaryo nga nagabulosbulos agod ipaalinton sa ila ang programa sa tagsa ka adlaw paagi sa tactile (touch) nga pagbadbad.
Sa sining duha ka kombension, 36 ang nagsimbulo sang ila dedikasyon kay Jehova nga Dios paagi sa bawtismo. Ang isa pa ka talalupangdon nga hitabo amo ang drama, nga Pagpadungog sa mga Takus sa Ila Katigulangon. Makakulunyag gid kaayo ang pagpresentar sini nga drama sing bug-os sa sign language, nga nagahatag sa mga bungol nga mga katapo nga makapakigbahin sing daku sa presentasyon!
Nian ginpaguwa ang bag-o nga bulig sa pagtuon sa Biblia, Ang Ihibalo nga Nagadul-ong sa Kabuhi nga Walay Katapusan. Nalipay ang mga kombensionista sa paghibalo nga ang sign language nga bersion sining libro matigayon sa videotape! Ginpaguwa sa kombension ang Tomo 1, nga nagalakip sang unang tatlo ka kapitulo. Igasunod ang lima pa ka tomo. “Nagapasalamat gid kami sing daku sa sining bag-o nga video,” siling sang isa ka delegado gikan sa Ohio. “Makabulig ini sa amon sa pagpadasig sang hilikuton sa pagbantala sa mga bungol.”
Nagpauli ang 2,621 nga nagtambong sa sining duha ka kombension nga narepreskuhan sa espirituwal. Labaw sangsa nagligad, determinado sila sa pagpalanog sang mga pinamulong sang salmista: “Ang tagsa ka butang nga may ginhawa—magdayaw kay Jah. Dayawa ninyo si Jah, kamo nga katawhan!”—Salmo 150:6.