Pagkahilway Gikan sa Organisado nga Krimen—“Isa Ako Anay ka Yakuza”

“PAPA, pagpauli mo, matambong kita sa miting. Pangako, indi bala?” Nabaton ko ining sulat gikan sa akon ikaduha nga anak nga babayi samtang sa bilangguan ako sa ikatlo nga tion. Regular sia nga nagatambong sa mga miting sang mga Saksi ni Jehova upod sa akon asawa. Bangod ang lamang nga naglugpay sa akon amo ang mga sulat gikan sa akon pamilya, nangako ako sa iya nga himuon ko ang iya ginapangabay.

‘Ngaa nagahimo ako sing krimen nga nagapahilayo sa akon gikan sa akon pamilya?’ hunahuna ko sa akon kaugalingon. Ginhinumdom ko ang mga adlaw sang bata pa ako. Napatay si Tatay sang 18 ka bulan pa lamang ako, gani indi ko madumduman bisan ang iya hitsura. Makaduha nga namana si Nanay pagkatapos sadto. Daku gid ang nangin epekto sa akon sining kahimtangan sa pamilya, kag sang sa hayskul ako nagsugod ako sa pagpakig-upod sa mga bugoy. Nangin masingki ako kag pirme lamang nagakadalahig sa mga inaway sa guwa sang eskwelahan. Sang yara ako sa segunda anyos sa hayskul, gin-organisar ko ang isa ka grupo sang mga estudyante agod makig-away batok sa isa pa ka grupo. Subong resulta, gin-aresto ako kag ginpadala sa correctional institution sa sulod sang isa ka tion.

Daw kaangay ako sang bola nga nagadaligdig sa pukatod padulong sa isa ka masingki nga kabuhi. Wala madugay nagporma ako sing grupo sang mga delingkwente kag nagaistambay kami sa talatapan sang isa ka grupo sang mga yakuza. Sa edad nga 18 anyos, nangin katapo ako sadto nga grupo. Sang 20 anyos ako, gin-aresto ako bangod sa nanuhaytuhay masingki nga buhat kag ginpamatbatan sing tatlo ka tuig sa bilangguan. Sang primero, ginbilanggo ako sa Nara Juvenile Prison, apang wala magbag-o ang akon paggawi. Gani ginpadala ako sa lain naman nga bilangguan, para sa mga adulto. Apang naglain pa ako tapat kag sang ulihi nagdangat ako sa Kyoto sa isa ka bilangguan para sa batinggilan nga mga kriminal.

‘Ngaa ginahimo ko ining mga krimen?’ pamangkot ko sa akon kaugalingon. Samtang ginahinumdom ko ang nagligad, narealisar ko nga bangod ini sang akon binuang nga pangatarungan. Nagdumdom ako sadto anay nga ini nga paggawi macho, pamatuod sang akon pagkalalaki. Sang makaguwa ako sa bilangguan sa edad nga 25, ginhangad ako sang akon kaupod nga mga kriminal. Nabuksan karon sa akon ang dalanon nga tinguhaan ang mas mataas nga posisyon sa kalibutan sang mga kriminal.

Ang mga Reaksion sang Akon Pamilya

Nangasawa ako sadto nga mga tion, kag wala madugay nakatigayon kami sing duha ka anak nga babayi. Apang, wala magbag-o ang akon kabuhi. Nagapakadto-pakari gihapon ako sa ulot sang akon balay kag sang pulisiya​—⁠nagapanakit ako kag nagapangilkil. Kada matabo ini nagadaku ang pagtahod sa akon sang akon kaupod nga mga gangster kag ang pagsalig sang amon agalon. Sang ulihi, ang akon magulang nga yakuza nga “utod” amo ang nangin pinuno sang gang. Nalipay ako nga nangin ikaduha ako.

‘Ano ang ginabatyag sang akon asawa kag mga anak nga babayi sa akon kabuhi?’ hunahuna ko sa akon kaugalingon. Pat-od gid nga nahuya sila nga ako isa ka kriminal nga bana kag amay. Nabilanggo ako liwat sa edad nga 30 kag liwat naman sang 32 ako. Sini nga tion, binudlayan gid ako sa tatlo ka tuig nga pamatbat sa bilangguan. Wala gintugutan ang akon mga anak nga babayi sa pagduaw sa akon. Ginkahidlawan ko ang pagpakighambal sa ila kag ang paghakos sa ila.

Sang hingapusan ko na nga tuig sa bilangguan, nagsugod ang akon asawa sa pagtuon sa Biblia upod sa mga Saksi ni Jehova. Ginasulat niya sa akon kada adlaw ang kamatuoran nga ginatun-an niya. ‘Ano ining kamatuoran nga ginahambal sang akon asawa?’ palibog ko. Ginbasa ko ang bug-os nga Biblia samtang sa bilangguan ako. Ginbinagbinag ko ang ginasiling sang akon asawa sa iya mga sulat tuhoy sa paglaum sa palaabuton kag tuhoy sa katuyuan sang Dios.

Ang paglaum nga magapuyo sing dayon ang katawhan sa Paraiso sa duta nagganyat sa akon bangod nahadlok gid ako mapatay. Ang pirme ko ginahunahuna anay amo, ‘Kon mapatay ka, ikaw ang pierde.’ Sa akon pagbinagbinag sang nagligad, narealisar ko nga ang kahadlok sa kamatayon amo ang nagtiklod sa akon nga halitan ang iban antes nila ako mahalitan. Ang mga sulat sang akon asawa nakabulig man sa akon nga makita ang pagkawalay pulos sang akon tulumuron nga mag-uswag sa kalibutan sang mga gangster.

Sa gihapon, wala ako mapahulag nga tun-an ang kamatuoran. Gindedikar sang akon asawa ang iya kaugalingon kay Jehova kag nangin isa sang iya bawtismado nga mga Saksi. Bisan pa nag-ugyon ako sa sulat nga makadto ako sa ila mga miting, wala ako sing plano nga mangin isa sang mga Saksi ni Jehova. Daw subong bala nga sa pamatyag ko ginbiyaan ako sang akon asawa kag mga anak nga babayi.

Pagguwa sa Bilangguan

Ang adlaw nag-abot sang ulihi nga mangin hilway ako. Sa gawang sang Nagoya Prison, madamo nga gangster ang nagalinya agod magsug-alaw sa akon. Apang, sa daku nga kadam-an sang mga tawo, ang ginapangita ko lamang amo ang akon asawa kag mga anak nga babayi. Nakahibi ako sang makita ko ang akon mga anak nga babayi nga nagdaku na pagligad sang tatlo ka tuig kag anom ka bulan.

Pagligad sang duha ka adlaw nga nakapauli na ako, gintuman ko ang akon pangako sa akon ikaduha nga anak nga babayi kag nagtambong ako sa isa ka miting sang mga Saksi ni Jehova. Nakibot ako sang makita ko ang masadya nga panimuot sang tanan nga nagatambong. Mainit ako nga gin-abiabi sang mga Saksi, apang nasaw-ahan ako nga kaupod nila. Sang mahibal-an ko sang ulihi nga ang mga nagtamyaw sa akon nakahibalo nga isa ako ka kriminal, naglibog ang akon ulo. Apang nabatyagan ko ang ila pagkamainabyanon kag naganyat ako sa napasad sa Biblia nga pamulongpulong nga ginhatag sadto. Tuhoy yadto sa mga tawo nga magakabuhi sing dayon sa Paraiso sa duta.

Ang paghunahuna nga ang akon asawa kag mga anak nga babayi maluwas pasulod sa Paraiso kag ako malaglag nagtublag gid sa akon. Namalandong ako sing maayo kon ano ang himuon ko agod magkabuhi sing dayon upod sang akon pamilya. Ginbinagbinag ko nga mag-untat sa akon pagkabuhi subong isa ka gangster, kag nagsugod ako sa pagtuon sa Biblia.

Pagkahilway Gikan sa Akon Pagkabuhi Subong Kriminal

Nag-untat ako sa pagtambong sa mga miting sang gang kag sa pagpakig-upod sa yakuza. Binudlayan ako sa pagbag-o sang akon panghunahuna. Ginapasiyo ko anay ang akon daku kag imported nga awto para lamang sa sini​—⁠agod magpabugal. Tatlo ka tuig pa ang nagligad antes ko gin-islan ang akon awto sing ordinaryo lamang nga modelo. May huyog ako anay nga magpahapos sa paghimo sing mga butang. Apang, samtang ginatun-an ko ang kamatuoran, nakita ko nga dapat ako magbag-o. Walay sapayan, subong sang ginasiling sang Jeremias 17:​9, “ang tagipusuon malimbungon labaw sa tanan nga butang kag desperado.” Nahibaluan ko kon ano ang husto apang nabudlayan ako sa pag-aplikar sang akon ginatun-an. Daw subong sang isa ka daku nga bukid ang akon problema. Naglibog ang akon ulo, kag madamong beses nga naghunahuna ako nga untatan ang pagtuon kag kalimtan ang ideya nga mangin isa ako sang mga Saksi ni Jehova.

Nian, gin-agda sang nagatudlo sa akon sing Biblia ang isa ka nagalakbay nga manugtatap nga may pareho nga nagligad sa akon nga magpamulongpulong publiko sa amon kongregasyon. Halin sa Akita, nga 400 milyas ang kalayuon, nagkari sia sa Suzuka agod palig-unon ako. Pagkatapos sadto, sa kada tion nga matak-an ako kag nagahunahuna sa pag-untat, ginapadalhan niya ako sing sulat, nga nagapamangkot kon padayon ako nga nagalakat sa dalanon sang Ginuo.

Padayon ako nga nangamuyo kay Jehova nga buligan ako sa pag-utod sang akon tanan nga kaangtanan sa yakuza. Nagsalig ako nga sabton ni Jehova ang akon pangamuyo. Sang Abril 1987, nakaguwa ako sang ulihi gikan sa organisasyon sang yakuza. Bangod ang akon negosyo sa luwas kada bulan nagapahilayo sa akon gikan sa akon pamilya, gin-islan ko ang akon trabaho sing pagdyanitor. Sa sining trabaho hilway ako kada hapon para sa espirituwal nga mga hilikuton. Sa una nga tion, nakabaton ako sing sweldo. Manubo lamang yadto, apang malipayon gid ako.

Sang ikaduha ako nga tawo sa organisasyon sang yakuza, bugana ako sa materyal, apang karon may espirituwal nga kamanggaran ako nga wala nagalubad. Kilala ko si Jehova. Nahibaluan ko ang iya mga katuyuan. May mga prinsipio ako sa kabuhi. May matuod ako nga mga abyan nga nagaulikid. Sa kalibutan sang mga yakuza, ang mga gangster daw mainulikdon kon tulukon, apang nahibaluan ko nga wala sing yakuza, bisan isa lang, ang magasakripisyo sang iya kaugalingon para sa iban.

Sang Agosto 1988, ginsimbolohan ko ang akon dedikasyon kay Jehova paagi sa pagpabawtismo sa tubig, kag sang nagsunod nga bulan, nagsugod ako sa paghinguyang sing dimagkubos 60 ka oras kada bulan sa pagsugid sa iban tuhoy sa maayong balita nga nagbag-o sang akon kabuhi. Nagaalagad ako subong bug-os tion nga ministro sugod sang Marso 1989 kag ginhatagan karon sing pribilehiyo sa pag-alagad subong ministeryal nga alagad sa kongregasyon.

Nadula ko ang kalabanan nga relikya sang kabuhi ko anay subong yakuza. Apang, may isa pa nga nabilin. Amo ini ang pika sa akon lawas nga nagapahanumdom sa akon, subong man sa akon pamilya kag sa iban, sang akon nagligad subong yakuza. Isa ka bes, ang akon kamagulangan nga anak nga babayi nagpauli halin sa eskwelahan nga nagahibi, kag nagasiling nga indi na sia mag-eskwela bangod ginsingganan sia sang iya mga abyan nga isa ako anay ka yakuza kag may mga pika. Ginpaathag ko ini sa akon mga anak nga babayi, kag nahangpan na nila ang kahimtangan. Ginapaabot ko ang adlaw nga ang duta mangin isa ka paraiso kag ang akon unod mangin “linghod pa sangsa bata.” Nian ang akon pika kag ang 20 ka tuig nga nagligad sang akon kabuhi subong yakuza mangin mga butang sang nagligad. (Job 33:​25; Bugna 21:4)​—⁠Panugiron ni Yasuo Kataoka.

[Retrato sa pahina 11]

Ginapaabot ko ang adlaw nga mapanas man ang akon mga pika

[Retrato sa pahina 13]

Sa Kingdom Hall upod sa akon pamilya