Isa Ka Kalibutan nga Wala sing Krimen—Paano?
ANG pagpakig-away batok sa organisado nga krimen ginahimo sa bug-os nga kalibutan. “Talalupangdon ang pag-uswag batok sa Mafia sa sulod sang malip-ot lamang nga tion,” siling sang U.S.News & World Report, “bangod labi na sa isa ka sugo, ang Racketeer Influenced and Corrupt Organizations Act, ukon RICO.” Sa sini nga sugo ang mga organisasyon sang mga kriminal sarang madakop pasad sa paagisod nga buhat sang pagpangilkil, indi lamang indibiduwal nga mga buhat. Ini kag ang impormasyon nga ginakuha paagi sa patago nga koneksion sa telepono kag gikan sa informer nga mga katapo sang gang nga luyag magsungka sa awtoridad amo ang isa ka kabangdanan sang madinalag-on nga pagpakig-away batok sa Mafia sa Estados Unidos.
Ang awtoridad sa Italya nagapakig-away man batok sa mga gang. Sa mga duog subong sang Sicily, Sardinia, kag Calabria, diin mabakod ang organisado nga krimen, may mga soldado nga nagapatrolya sa publiko nga mga tinukod kag sa importante nga mga duog agod punggan ang pagsalakay sang mga kriminal. Ginatamod ini sang panguluhan nga kaangay sang inaway sibil. Maayuayo ang resulta sini sa Italya, bangod nabilanggo ang kilala nga mga ulo sang mga sindikato kag akusado ang anay primer ministro bangod sang iya ginakunukuno nga mga koneksion sa Mafia.
Sa Japan nangin estrikto ang panguluhan sa yakuza sang ginpatuman sini ang Anti-Organized Crime Law sang Marso 1, 1992. Sa idalom sining kasuguan, sa tion nga makilala ang isa ka organisasyon sang mga kriminal, ginadumilian ini gikan sa 11 ka buhat sang masingki nga pagpamigos, lakip ang pagpangayo sing hamham, sing kuwarta nga bayad sa proteksion nga ginahatag, kag sing kuwarta nga bayad sa pagpasilabot sa paghusay sang mga sinuay. Paagi sa pagpatuman sining kasuguan, katuyuan sang panguluhan nga utdon ang tanan nga paagi nga ginaganaran sang mga sindikato. Daku gid ang nangin epekto sang kasuguan sa mga organisasyon sang mga kriminal. Ang iban nga mga grupo nagbinulagay, kag naghikog ang isa ka agalon sang mga kriminal—ayhan bangod sang estrikto nga pagpatuman sa kasuguan.
Sa pagkamatuod, ang mga panguluhan kag ang mga ahensia nga nagapatuman sang kasuguan mabaskog nga nagapakig-away batok sa organisado nga krimen. Sa gihapon, ang Mainichi Daily News, sang magreport tuhoy sa komperensia sang mga hukom kag mga pulis gikan sa bug-os nga kalibutan nga ginhiwat sang 1994, nagsiling: “Ang organisado nga krimen nagabaskog kag nagamanggaranon sa halos tanan nga bahin sang kalibutan, nga nagaganar sing tubtob sa 1 trilyon dolyares kada tuig.” Makapasubo nga limitado lamang ang panikasog sang tawo sa pagdula sang mga sindikato sang mga kriminal gikan sa nawong sang duta. Ang isa ka rason sini amo nga sa madamo nga kaso ang hustisya mahinay kag indi sigurado. Para sa madamo nga tawo, ang kasuguan masami nga daw nagapabor sa kriminal, indi sa biktima. Ang Biblia nagsiling sang nagligad nga mga 3,000 ka tuig: “Bangod nga ang pamatbat batok sa malain nga buhat wala ginahikot sing madali, amo kon ngaa ang tagipusuon sang mga anak sang mga tawo natuhoy sing bug-os sa ila sa paghimo sing malain.”—Manugwali 8:11.
Pagguwa Gikan sa Organisasyon sang mga Kriminal
Dugang sa pagsumpo sa organisado nga krimen gikan sa guwa, nagtinguha ang mga panguluhan nga buligan ang mga sa sulod sini sa pagguwa gikan sa sindikato sang mga kriminal. Indi ini mahapos nga himuon. Suno sa isa ka dumaan nga hulubaton, “ang lamang nga paagi agod makaguwa sa Mafia amo ang lungon.” Agod makahalin ang isa ka katapo gikan sa organisasyon sang yakuza, dapat sia magbayad sing daku nga kantidad ukon ipautod ang iya kamalingkingan ukon ang bahin sini. Dugang pa sa kahadlok sa mahimo matabo kon utdon ang koneksion sa kalibutan sang mga kriminal, dapat atubangon sang luyag magbag-o nga gangster ang katunayan sang bunayag kag desente nga pagkabuhi. Ang iya aplikasyon para sa trabaho masami nga indi pagbatunon. Apang, sa pila ka pungsod, may yara direkta nga linya sang telepono ang pulisiya nga bukas sa tanan nga oras agod magbulig sa mga gangster nga luyag magbag-o kag nabudlayan sa pagpangita sing desente nga trabaho.
Agod masarangan ang mga pag-ipit gikan sa pamilya sang mga gangster kag ang pag-ihig-ihig sang katilingban, kinahanglan sang isa ka kriminal ang mabaskog nga motibasyon agod magbag-o sia. Ano ang makapahulag sa iya? Mahimo nga amo ang gugma sa iya pamilya, ang paghandum sing isa ka malinong nga kabuhi, ukon ang handum sa paghimo sing husto. Apang, ang sugilanon ni Yasuo Kataoka sa masunod nga artikulo nagailustrar sing maayo sang pinakamabaskog nga motibasyon.
Si Yasuo Kataoka isa ka kinaandan nga halimbawa sang ginatos nga nagbag-o sang ila kabuhi sing bug-os. Ang ila anay sapatsapaton nga mga kinaiya ginbuslan sing bag-ong nga personalidad nga “gintuga suno sa kabubut-on sang Dios sa matuod nga pagkamatarong kag katutom.” (Efeso 4:24) Karon, ang mga tawo nga kaangay sang mga lobo anay malinong nga nagapuyo sa tunga sang malum-ok sing panghunahuna, katulad-kordero nga mga banwahanon, kag nagabulig pa sila sa iban!—Isaias 11:6.
Manginpalos Gikan sa Espiritu sang Kalibutan
Subong sang nasambit sa nagligad nga artikulo, indi lamang ang tanan nga sindikato sang mga kriminal ang yara sa dikitaon nga paggahom ni Satanas nga Yawa kundi ang bug-os nga kalibutan. Ang mga tawo wala gani nakahisayod sini, apang gin-organisar ni Satanas ang kalibutan agod tumanon ang iya malaut nga mga katuyuan. Subong nga ang mga sindikato sang mga kriminal nagahatag sing manggad kag tulad-pamilya nga sistema, nagapakunukuno sia nga isa ka maalwan nga agalon paagi sa paghatag sa katawhan sing kamanggaran, kalipayan, kag pagbatyag nga nahiusa sila. Bisan pa mahimo wala mo mahisayri ini, mahimo nga nadaya ikaw sang iya malaut nga mga pahito. (Roma 1:28-32) Ang Biblia nagasugid sa aton nga ang “pagpakig-abyan sa kalibutan pagpakig-away sa Dios.” (Santiago 4:4) Makatalagam ang pagpakig-abyan sa sining kalibutan nga yara sa idalom sang impluwensia ni Satanas. Ang Manunuga sang uniberso may kasuldadusan sang mga anghel sa idalom ni Jesucristo nga handa sa pagdakop kay Satanas kag sa iya mga demonyo agod dulaon sa kalibutan ang ila malaut nga impluwensia.—Bugna 11:18; 16:14, 16; 20:1-3.
Gani, paano ikaw makaguwa gikan sa idalom sang impluwensia sang kalibutan ni Satanas? Indi paagi sa pagpain sang kaugalingon gikan sa katilingban kundi paagi sa pagpalayo gikan sa mga panimuot kag panghunahuna nga nagapangibabaw sa kalibutan karon. Agod mahimo ini, dapat mo pamatukan ang nagapamahog nga mga taktika ni Satanas kag batuan ang ang mga pangganyat nga ginatanyag niya agod makontrol ang katawhan. (Efeso 6:11, 12) Magadalahig ini sing mga sakripisyo, apang mahimo ikaw makaguwa subong sang iban kon determinado ikaw kag kon batunon mo ang bulig nga ginatanyag sang mga Saksi ni Jehova.
Ano ang magasunod sa tapos dulaon sang Dios ang krimen sa sining magamo nga kalibutan? “Tuhoy sa kaliwat sang mga malauton, sila sa pagkamatuod pagautdon,” siling sang Biblia, kag nagpadayon ini: “Ang mga matarong magapanag-iya sang duta, kag magapuyo sa sini tubtob sa walay katubtuban.” (Salmo 37:28, 29) Nian, wala na sing rason nga magkurog sa mga tawo nga may sapatsapaton nga mga kinaiya anay, kay sila bag-uhon sang “ihibalo ni Jehova,” nga magatugob sa duta.—Isaias 11:9; Ezequiel 34:28.
Ina nga pagbag-o nangin matuod na karon, subong ginapakita sang masunod nga sugilanon sa kabuhi sang isa anay ka katapo sang yakuza sa Japan.
[Retrato sa pahina 10]
Sa bag-ong kalibutan sang Dios, magakalipay ang tanan sa binuhatan sang ila mga kamot