Isa Ka Bug-os Kalibutan nga Solusyon—Posible Bala?
NAGAUGYON ang mga eksperto nga ang anos (TB) isa ka bug-os kalibutan nga problema nga nagakinahanglan sing bug-os kalibutan nga solusyon. Wala sing isa ka pungsod ang makakontrol sa anos kon silahanon lamang, kay minilyon ka tawo ang nagatabok sa internasyonal nga mga dulunan kada semana.
Nagapati ang madamo nga agod mahanabo ang internasyonal nga pagbuligay, kinahanglan nga buligan sang manggaranon nga mga pungsod ang imol nga mga pungsod, nga amo ang pinakagrabe nga naapektuhan sang anos. Subong sang ginsiling ni Dr. Arata Kochi, “para sa kaayuhan sang manggaranon nga mga pungsod nga buligan ang imol nga mga pungsod sa pagpakig-away batok sa anos, antes ini magdangat sa ila mismo pungsod.”
Apang ang manggaranon nga mga pungsod, bangod nagapangatubang sang ila ginakabig nga mas hilingagawon nga mga prioridad kag mga problema, wala maghulag sa gilayon. Ang pila ka imol nga mga pungsod mismo masami nga nagapatumbaya sang pag-atipan para sa ikaayong lawas, ginagasto ang kuwarta, sa baylo, sa ila mga armas. Sang tunga-tunga sang katuigan 1996, 10 porsiento lamang sang mga anuson sa kalibutan ang ginbulong paagi sa DOTS nga estratehiya, tuman ka diutay agod mapunggan ang paggrabe sang epidemya.
Ang WHO nagsiling: “Ang ihibalo kag ang barato lamang nga mga bulong para sa anos nagaluntad sa sulod sang mga dekada. Ang ginakinahanglan sang kalibutan karon amo ang aksion sang mga tawo nga may gahom, impluwensia kag kaluoy nga magahulag agod pat-uron nga ining mga bulong ginagamit sing nagakaigo sa bug-os nga kalibutan.”
Ang Kadalag-an nga Magaabot
Makasalig bala kita nga malubad sang mga tawo nga may gahom kag impluwensia ang problema? Ang inspirado nga salmista sang Biblia nagsulat: “Dili kamo magsalig sa mga dungganon, ukon sa anak sang dutan-on nga tawo, nga sa iya wala sing kaluwasan.” Sin-o, nian, ang masaligan naton? Ang kasulatan dugang pa nga nagsiling: “Malipayon sia nga ang iya kabulig amo ang Dios ni Jacob, nga ang iya paglaum yara kay Jehova nga iya Dios, ang Magbubuhat sang langit kag duta, sang dagat, kag sang tanan nga yara sa ila.”—Salmo 146:3, 5, 6.
Subong amo ang Desinyador kag Manunuga sang duta, may gahom kag kaalam si Jehova nga Dios agod dulaon ang balatian. May kaawa bala sia? Paagi sa iya inspirado nga manalagna, si Jehova nanaad: “Pakitaan ko sing kaawa ang [akon katawhan], subong sang tawo nga nagapakita sing kaluoy sa iya anak nga nagaalagad sa iya.”—Malaquias 3:17.
Ang nagahingapos nga kapitulo sang Biblia nagalaragway sing isa ka palanan-awon nga ginhatag kay apostol Juan. Nakakita sia sing “mga kahoy sang kabuhi nga nagapatubas sing napulog-duha ka bunga, nga nagapatubas sang iya bunga sa tagsa ka bulan.” Ining simbuliko nga mga kahoy kag ang mga bunga nga ila ginapatubas nagalaragway sa mga aman sang Dios para sa matinumanon nga mga tawo agod magkabuhi sila sing dayon sa duta.—Bugna 22:2.
Sa pagpadayon, si Juan nagsulat: “Ang mga dahon sang kahoy bulong sa mga pungsod.” Ang simbuliko nga mga dahon nagalaragway sa mga pagpakamaayo gikan sa Dios nga magaresulta sa pag-ayo sang katawhan, sa espirituwal kag sa pisikal. Sa amo, mapat-od naton nga sa matarong nga bag-ong kalibutan sa idalom sang paggahom sang Dios, ang anos mapapas sing bug-os kag sing dayon.—Bugna 21:3, 4.
[Blurb sa pahina 8]
Nagsaad ang Dios sing permanente nga pag-ayo para sa katawhan