“Stroke!”

ANG nagapanguna nga kabangdanan sang kamatayon kag nagadugay nga pagkabaldado sa industriyalisado nga mga pungsod sa Nakatundan amo ang stroke. Ang Ingles mismo nga tinaga nga “stroke” nagapahangop sang hinali nga “atake sa utok.” Sa primero, mahimo nga maayo ang imo pamatyagan, apang sa hinali lang, daw subong bala nga naigo ikaw sang kilat​—⁠ang mabaskog nga stroke mahimo nga hinali kag makapabag-o sing daku sang imo kabuhi. Mapintas nga nagabalda kag nagalupog sa imo, mahimo nga dulaon sini ang imo ikasarang sa paghambal, halitan ang imo mga emosyon, bag-uhon ang imo personalidad kag ikasarang sa pagdesisyon, kag magtuga sa imo sing daw wala untat nga paghimakas nga mabalik ang imo anay normal nga kabuhi kag sang imo pamilya.

Binagbinaga si Ellen Morgan.⁠a Sang Mierkoles, si Ellen isa pa ka mapagros, aktibo nga babayi nga nagaedad sing 64-anyos. Sang Huebes, samtang nagapamalaklon upod sa iya bana, hinali nga indi makahambal si Ellen, kag nagkiwi ang iya guya. Nagluya ang iya lawas, kag daw hubog nga nagdulingduling. Gin-atake si Ellen sang grabe nga stroke!

Subong resulta sang stroke, naparalisado sing tuman si Ellen amo nga indi niya masarangan himuon bisan ang pinakasimple nga mga butang, subong sang pagpaligo ukon pag-ilis sing bayo. Bangod indi makasulat, makagansilyo, ukon makapanahi, pirme sia nagahilibion kag ginalapyo sing tuman. Sa sulod sining bug-os nga tion, wala maapektuhan ang panghunahuna ni Ellen; apang, nahuya sia kon sa banta niya nga ginakabig sia sang iban nga kulangkulang. Sang ulihi, nagpaathag si Ellen: “Diutay lamang ang nakahibalo kon ano ang epekto sining hinali nga pagbag-o sa emosyonal ukon sikolohikal nga kahimtangan sang isa. Nabatyagan ko nga daw amo na yadto ang katapusan sang akon pagkatawo.”

Ano ang ginatunaan sang stroke? Palareho bala ang epekto sang stroke sa tanan nga tawo? Paano nalandas sang mga nastroke ini nga balatian? Paano ini nalandas sang mga pamilya sang nastroke? Ano ang sarang naton mahimo agod makabulig? Ginausisa sang Magmata! ina nga mga pamangkot kag ginapaathag sa imo ang kabuhi sang mga nastroke kag sang ila mga pamilya nga nagabulig sa ila.

[Mga footnote]