Mapat-od Bala sang mga Tawo ang Isa ka Malipayon nga Palaabuton?

Bag-o ka lang nakasaylo sa isa ka daw mapag-on kag matahom nga balay nga human sa tisa. Ginhandum mo gid ini nga balay. Masanag gid ang imo palaabuton! Apang ano ang batyagon mo kon pagligad sang pila lamang ka tuig, ang balay amat-amat na nga nagakaguba? Sigurado gid nga malugaw-an ka. Apang wala ka nagaisahanon. Amo man sini ang nagakatabo sa pila ka balay sa inyo lugar. Sang gin-imbestigahan, nakita nga ang kabangdanan sini amo ang indi maayo nga desinyo kag mapigaw nga mga tisa.

KAANGAY sina nga balay, ang kalibutan may daku man nga problema. Walay sapayan sang mga pag-eksperimento sa katilingban kag pulitika kag sa makahalawhaw nga mga pag-uswag sa siensia kag teknolohiya, ang sadsaran nga istruktura sang katilingban daw nagakarumpag. Sa pila ka kadutaan, ang paglapas sa kasuguan ordinaryo na lamang nga ginahimo kada adlaw. Indi ayhan nga sa ulihi bangod sa daku nga handum kag panikasog sang mga tawo nga maagom ang madinalag-on nga gobierno matigayon gid nila ini? Binagbinaga ang ginsiling sang pila ka awtoridad tuhoy sa nahimo na sang katawhan.

“Gintilawan Na Naton ang Tanan”

Sa panikasog nga mapauswag ang kahimtangan sang kalibutan, ang maalam nga mga tawo kaangay ni Plato, isa ka Griegong pilosopo, kag ni Karl Marx, isa ka Aleman nga pilosopo sa pulitika kag sosyalista, nagpanugda sing madamo nga ideolohiya sa pulitika. Ti, ano ang resulta? Ang isa ka artikulo sa magasin nga New Statesman nagsiling: “Wala naton nadula ang kaimulon ukon napaluntad ang bug-os kalibutan nga paghidait. Sa pagkamatuod, kabaliskaran pa gani ang nangin resulta. Indi man sini buot silingon nga wala kita nagtinguha. Gintilawan na naton ang tanan halin sa komunismo tubtob sa kapitalismo. Gintinguhaan naton nga pauntaton ang inaway paagi sa pagtukod sang Liga de Nasyones tubtob sa pagtipon sing madamo nga nuklear nga mga hinganiban. Indi makatarunganon nga magpati kita nga mapauntat naton ang inaway kay daw nagaginirahay gihapon sa aton mga siudad.” Ang artikulo nagpadayon pa: “Sa umpisa sang [ika-20 nga] siglo nagpati gid kita nga maluwas kita sang mga sientipiko apang pagkatapos sining siglo, indi na naton mapatihan ang bisan ano nga ihambal nila.”

Sang 2001, ang retirado nga propesor sa ekonomiya kag social history sa London University nga si Eric Hobsbawm nagsulat nga ang mga gobierno “nagaatubang sang tion nga ang ginapanghimo sang tawo nag-apektar gid sing daku sa kinaugali kag sa globo.” Ang solusyon, ukon pagpahaganhagan sa sining mga problema “indi matigayon paagi sa eleksion ukon surbe. Indi ini maayo para sa palaabuton sang demokrasya ukon sang globo.”

Napanan-aw sang sientipiko kag awtor nga si Stephen Hawking ang daku nga kalalat-an nga magaabot sa katawhan amo nga namangkot sia: “Sa kalibutan nga puno sing problema sa pulitika, sa katilingban kag sa palibot, paano makapabilin nga buhi ang tawo sa masunod nga 100 ka tuig?”

Ngaa Wala Nagmadinalag-on ang Tawo?

Ang Biblia lamang ang makapaathag kon ngaa napaslawan ang tawo sa paggahom sa iya kaugalingon. Prangka sini nga ginasugid sa aton ang limitasyon sang tawo. Binagbinaga halimbawa ang apat ka importante nga kamatuoran.

Nagakasala kita tanan. “Ang tanan nakasala kag wala makalab-ot sa himaya sang Dios.” (Roma 3:23) Kon paano nga ang isa ka mapigaw nga tisa nagapahuyang kag nagapaguba sa isa ka tinukod, ang napanubli nga pagkadihimpit sang tawo nagapahuyang man sa katilingban. Nalakip sa sini ang huyog nga maghimo sing kagarukan, pagkadi-bunayag, kakagod, kag pag-abuso sa awtoridad. Indi na ini bag-o. Mga tatlo ka libo ka tuig na ang nagligad, ang isa ka maalam nga manunulat sang Biblia nagsiling: “Gingamhan sang tawo ang tawo sa iya kasamaran.”​—Manugwali 8:9, NW.

Ang mga lider sang gobierno kag mga korte sa kasuguan nagakilala sang aton pagkadihimpit kag mga kaluyahon kag ginatinguhaan nila nga mapahaganhagan ang epekto sini paagi sa paghimo sing madamo nga kasuguan. Apang, nahibaluan nila nga indi sila makahimo sing kasuguan nga makapilit sa tawo nga maghigugma sa iya isigkatawo ukon nga magtuman sa kasuguan.

Nagakapatay kita. “Dili kamo magsalig sa mga principe, ukon sa anak sang tawo, nga sa iya wala sing bulig. Kon maggowa ang iya ginhawa nagabalik sia sa iya duta; sa amo nga adlaw nagakawala ang iya mga hunahuna.” (Salmo 146:3, 4) Si Hari Solomon sang dumaan nga Israel, nga ginakabig subong isa sa labing maalam nga hari, nagsiling nga walay pulos ang iya ginpangabudlayan. Nagsulat sia: “Gindumtan ko ang tanan ko nga kinabudlayan nga ginpangabudlayan ko sa idalom sang adlaw, nga bayaan ko para sa tawo nga magasunod sa akon. Kag sin-o ang nakahibalo kon sia mangin maalamon ukon buangbuang? Apang magadumala sia sa tanan ko nga kinabudlayan . . . Ini man walay pulos.”​—Manugwali 2:18, 19, NW.

Indi kita makagahom sing madinalag-on sa aton kaugalingon. “Ang dalanon sang tawo wala sa iya kaugalingon, wala sa tawo nga nagalakat sa pagmando sang iya mga tikang.” (Jeremias 10:23) Bisan pa kon himpit kita, ginatudlo sang Biblia nga suno sa orihinal nga katuyuan sang Dios, ang mga tawo wala sing hatag-Dios nga kinamatarong nga gamhan ang ila kaugalingon ukon sing ikasarang nga himuon ini sing epektibo. Halimbawa, ngaa abi nairitar ang mga tawo kon hambalan sila sang iban ukon sang isa ka grupo kon ano ang dapat nila himuon ukon kon ang iban nga tawo magpatuman sing moral nga talaksan para sa ila? Ang sabat: Gintuga kita nga magpatuytoy sa mas mataas nga awtoridad sangsa aton. Inang Awtoridad amo ang Dios.​—Isaias 33:22; Binuhatan 4:19; 5:29.

Ang mga tawo ginaimpluwensiahan sang di-makita nga gumalahom. “Ang bug-os nga kalibutan yara sa gahom sang isa nga malauton”​—si Satanas nga Yawa. (1 Juan 5:19) Halimbawa, kon ang nagadumala sang isa ka kompanya nagahimo sing ilegal kag maimpluwensia, ano ang mahimo sang isa ka ordinaryo nga empleyado agod matadlong ang mga butang? Daw wala gid. Amo man sini ang kahimtangan karon tuhoy sa di-malubad nga mga problema nga tuga sang di-makita nga mga gumalahom sining kalibutan, nga amo ang malaut nga espiritu nga mga tinuga nga yara sa idalom ni Satanas. Ginalaragway sang Biblia ining mga gumalahom subong “mga panguluhan,” “mga awtoridad,” “mga manuggahom sang kalibutan sining kadudulman,” kag “malaut nga mga puersa nga espiritu sa langitnon nga mga duog.”​—Efeso 6:12.

Apang wala lamang ginabuyagyag sang Biblia ang kapaslawan sang tawo kag ang di-makita nga mga gumalahom sang kalibutan. Nagaaman man ini sa aton sing maayong balita paagi sa paghatag sing sigurado nga solusyon sa tanan naton nga problema, gani may mabakod kita nga paglaum.

Magaluwas ang Aton Manunuga!

Kon pabay-an lang kita, indi gid kita makakita sing solusyon sa sining mga problema. Bisan ang pinakamaalam, pinakagamhanan, ukon pinakamanggaranon nga tawo wala sing mahimo agod mabag-o ang bisan isa lamang sa apat ka kamatuoran nga ginsambit sa sining artikulo.a Apang ipakita sa masunod nga artikulo nga wala kita ginkalimtan ukon ginbiyaan sang aton Manunuga. Sa pagkamatuod, subong ang may kinamatarong nga Soberano sang bug-os nga duta, dulaon niya ang tanan nga balagbag sa aton kalipay. (1 Juan 4:8) Isa pa, malapit na niya ini himuon. Paano naton ini mahibaluan?

Subong sang ginpaathag sang nagligad nga gua sining magasin, ang mga hitabo sa kalibutan kag mga kahimtangan sa katilingban amo ang nagapaathag nga yara na kita sa “katapusan nga mga adlaw” sining karon nga sistema sang mga butang. (2 Timoteo 3:1; Mateo 24:3-7) Ang katapusan indi mag-abot paagi sa bomba nuklear ukon pagtupa sang asteroid ukon sa bisan ano man nga paagi nga magalaglag indi lamang sa malain kundi pati man sa maayo nga mga tawo. Sa baylo, amo ini ang pagpanglaglag sang Dios nga ang puntariya lamang amo ang mga malauton, lakip yadtong mga nagaduso gid nga magpadayon ang paggahom sang tawo. (Salmo 37:10; 2 Pedro 3:7) Sa amo man nga tion, dulaon sang Dios ang tanan nga pag-antos nga tuga sining mga nagapamatok sa Dios.b​—2 Tesalonica 1:6-9.

Pagkatapos sini, lubaron sang Manunuga ang tanan nga problema sang gobierno paagi sa paghatag sing bug-os nga awtoridad sa panguluhan nga ginatawag nga “ginharian sang Dios.” (Lucas 4:43) Tan-awon naton karon kon paano ining bug-os kalibutan nga panguluhan magapabag-o sang aton pagtamod sa palaabuton.

[Mga nota]

[Kahon/​Retrato sa pahina 5]

MAPIGAW NGA “MGA TISA” SANG KATILINGBAN

◼ Nagakasala kita tanan.

◼ Nagakapatay kita.

◼ Indi kita makagahom sing madinalag-on sa aton kaugalingon.

◼ Ang mga tawo ginaimpluwensiahan sang di-makita nga gumalahom.

[Kahon sa pahina 6]

INDI MAGUBA SANG MGA TAWO ANG DUTA!

Ang katuyuan sang Manunuga nga ang duta mangin hilway sa katalagman kag malinong nga puluy-an sang mahinadlukon sa Dios nga mga tawo ginasakdag gid sang Biblia. Binagbinaga ang masunod nga mga teksto.

“Ikaw nagpasad sang mga sadsaran sang duta, agud nga ini indi mationg sa gihapon.”​—Salmo 104:5.

“Ginpalig-on mo ang duta, kag nagapadayon ini.”​—Salmo 119:90.

“Ang isa ka kaliwatan nagataliwan, kag ang isa pa ka kaliwatan nagaabut, apang ang duta nagapabilin sa gihapon.”​—Manugwali 1:4.

“Ang duta matugub sang pagkilala sa GINOO subong nga ang mga tubig nagatabon sang dagat.”​—Isaias 11:9.

“[Si Jehova amo ang] naghum an sang duta kag naghimo sini nga nagpalig-on sini; wala sia magtuga sini nga walay pulus, nga naghuman sini nga pagpuy-an!”​—Isaias 45:18.