Ginpaathag sang Propesor sang Financial Accounting ang Iya Pagtuo

Sugiri kami sang imo kabuhi sang una.

Ginpadaku ako sang akon palasimba, bunayag, kag mapisan nga mga ginikanan. Ginpalig-on nila ako nga mag-eskwela sing maayo, amo nga nagtuon ako sing komersio sa University of New South Wales. Nanamian gali ako mag-research, gani amo ini ang ginpili ko nga propesyon.

Ano ang imo gina-research?

Gusto ko gid mahangpan kon ano ang nagakatabo sa stock market.a Puede diri makabakal kag makabaligya sang share sa mga kompanya, kag ang ginansia gamiton para ikapital sa ila mga negosyo. Lakip sa akon ginatun-an ang mga butang nga nagaapektar sa bili sang share sang kompanya.

Ano ang mga halimbawa sini?

Dapat regular nga ginareport sang mga kompanya ang ila kita. Ginabinagbinag sang mga manugkapital ini nga mga report para mahibaluan ang kahimtangan sa pinansial sang kompanya. Pero lainlain ang pamaagi sang mga kompanya sa pagreport. Gani para sa mga kritiko, mangin kabangdanan ini nga matago sang mga kompanya ang ila matuod nga kahimtangan sa pinansial kag ginakita. Paano mahibaluan sang mga manugkapital ang eksakto kag kompleto nga impormasyon? Ano nga mga impormasyon ang dapat hibaluon sang mga may awtoridad para magpanghikot sing eksakto ang financial market? Ginatinguhaan namon nga hibaluon ang mga sabat sa sini.

Ano ang imo relihion sang una?

Regular kami sang akon mga ginikanan nga nagasimba sa Presbyterian Church. Pero wala ako nagpadayon sang tin-edyer na ako. Nagapati ako sa Manunuga kag ginatahod ko ang Biblia pero nagaduhaduha ako kon bala ang relihion makabulig sa mga problema sang kabuhi. Para sa akon ang relihion daw pagtilipon lang sang mga tawo. Nakasimba ako sa dalagku nga simbahan sa Europa kag natingala ako kon ngaa manggaranon sila samtang ang kalibutan puno sang kaimulon. Naligban gid ako sa sini, gani wala na ako nagsalig sa relihion.

Ngaa nagbag-o ang imo pagtamod?

Nagtuon sa Biblia ang akon asawa nga si Jennifer upod sa mga Saksi ni Jehova kag nagtambong man sia sa mga miting, gani napensaran ko nga mag-upod para usisaon ini. Dayon narealisar ko nga wala gid gali ako sing nabal-an sa Biblia. Daw indi ako makapati! Gani nagtuon man ako sa Biblia upod sa mga Saksi.

Nagdayaw gid ako sa ila paagi sang pagtuon. Nagapamangkot sila, nagatipon kag nagausisa sang mga pamatuod, dayon nagapangatarungan suno sa sini. Amo gid sini ang akon paagi sa pag-research! Sang ulihi nagpabawtismo si Jennifer. Pagligad sang pila ka tuig, sang 1999, nagpabawtismo man ako subong Saksi ni Jehova.

Nakapabakod bala sang imo pagsalig sa Biblia ang imo natun-an sa ekonomiya?

Huo. Halimbawa, ang mga problema sang mga ekonomista subong nasolbar sang Kasuguan nga ginhatag sang Dios sa Israel sadto. Ginapatuman sang Kasuguan nga ang mga Israelinhon magpain sang ila patubas para sa mga imol (isa ka sahi sang buhis kag insurance), magpahulam sa mga nagakinahanglan nga wala sing saka (pagpat-od nga makautang), kag ipasag-uli sa manunubli ang duta kada ika-50 nga tuig (pag-amlig sa mga kinamatarong sa propiedad). (Levitico 19:9, 10; 25:10, 35-37; Deuteronomio 24:19-21) Ini kag ang iban pa nga aman nakabulig sa ila sa tatlo ka importante nga paagi: (1) Nagbulig sa ila kon may problema sila sa pinansial, (2) nagbulig sa ila nga indi mag-imol tubtob san-o, kag (3) nagpahaganhagan sang indi pag-alalangay sa pinansial—kag ini tanan 3,000 ka tuig na antes pa magsugod ang pagtuon sa ekonomiya.

Ginatudlo man sang Biblia ang mga kinaiya kag batasan para mangin balanse ang ekonomiya. Halimbawa, ginatudlo sini nga mangin bunayag sila, masaligan, maluluy-on, kag maalwan. (Deuteronomio 15:7-11; 25:15; Salmo 15) Sining bag-o lang nga krisis sa pinansial sa bilog nga kalibutan, ang pila ka eskwelahan kag mga organisasyon nagpalig-on sa mga negosyante nga manumpa nga sakdagon ang pila ka bunayag nga talaksan. Pero kon ako ang pamangkuton, labaw katama ang talaksan sang Biblia sa moral kon ikumparar sa sini.

Ano ang epekto sa imo sang imo pagtuo?

Siling ni Jennifer, mas makatarunganon na ako subong. Sang una gusto ko perpekto ang tanan kag para sa akon duha lang ang pililian, husto ukon sala. Amo siguro nga maayo ako sa mga prinsipio sang accounting! Ang mga prinsipio sa Biblia nakabulig gid sa akon nga mangin balanse. Mas malipayon na ako subong kag amo man ang akon pamilya. Nasadyahan man kami magsugid sa iban sang kaalam sa Biblia. Ang pagtuon sa Biblia amo ang pinakamaayo nga “ginkapitalan” ko.