Kon Paano Istoryahan ang mga Problema

NGAA ISA KA HANGKAT?

Kon istoryahan ninyo nga mag-asawa ang isa ka problema, daw mas nagalainay bala kamo sing buot sa tapos sang pag-istoryahanay? Kon amo, mahimo ninyo ini masolbar. Apang, dapat anay ninyo mahibaluan ang lainlain nga pamaagi sang pagkomunikar sang mga lalaki kag mga babayi.a

ANO ANG DAPAT MO MAHIBALUAN?

Kinaandan na nga mas gusto sang mga babayi nga istoryahan ang problema antes maghatag sing solusyon. Ang matuod, kon kaisa ang pag-istorya amo na ang solusyon.

“Kanami sang pamatyag ko kon mahambal ko ang akon ginabatyag kag nahibaluan nga nahangpan ako sang akon bana. Kon mapabutyag ko na ini, maayo na ang pamatyag ko—kinaandan na nga pagligad lang sang pila ka minutos sa tapos sang pag-istoryahanay.”—Sirppa.b

“Indi ako maributay kon indi ko mapaathag sa akon bana kon ano gid ang akon ginabatyag. Kon maistorya ko na ini, balewala na ini dayon sa akon.”—Ae-Jin.

“Daw trabaho ini sang isa ka detektib. Samtang ginasugid ko ini, ginaanalisar ko ang problema kag ginatinguhaan nga hibaluon ang rason sini.”—Lurdes.

Ang mga lalaki nagapamensar dayon sing mga solusyon. Normal lang ina bangod ang pagkay-o sang mga butang nagapabatyag sa lalaki nga may pulos sia. Ang paghatag sing solusyon amo ang iya paagi agod ipakita sa iya asawa nga makabulig gid sia. Gani maluyahan sing buot ang mga bana kon indi pagbatunon ang ila mga solusyon. “Indi ko mahangpan kon ngaa istoryahan pa ang problema kon wala ka nagapaabot nga masolbar ini!” siling sang bana nga si Kirk.

Pero “ang paghangop dapat mangibabaw sa laygay,” paandam sang libro nga The Seven Principles for Making Marriage Work. “Kinahanglan mo pahibaluon ang imo tiayon nga nahangpan mo gid sia kag nabatyagan mo ang iya nabatyagan antes ka maghatag sing solusyon. Sa masami, wala gid man nagapangayo sing solusyon ang imo asawa—pamatii lang sia sing maayo.”

ANO ANG MAHIMO MO?

Para sa mga bana: Mangin kinabatasan nga mamati kag hangpon ang ginabatyag sang imo asawa. Ang bana nga si Tomás nagsiling: “Kon kaisa sa tapos makapamati nagapamensar ako, ‘Daw wala man ina sing pasingadtuan.’ Pero sa masami, amo lang ina ang kinahanglan sang akon asawa—manugpamati.” Ugyon sa sini ang bana nga si Stephen. “Nakita ko nga maayo gid kon pabay-an ko lang ang akon asawa nga magpabutyag sang iya ginabatyag,” siling niya. “Sa masami, pagkatapos sini, ginahambalan niya ako nga mas maayo na ang iya pamatyag.”

Tilawi ini: Sa masunod nga istoryahan ninyo nga mag-asawa ang problema, likawi nga maghatag sing laygay kon wala sia nagapangayo. Tuluka sia kag pamatii sing maayo ang iya ginahambal. Magtangotango. Ihambal ang buot silingon sang iya ginsiling agod mapakita mo nga nahangpan mo sia. “Kon kaisa, kinahanglan lang mahibaluan sang akon asawa nga nahangpan ko sia kag mabulig ako sa iya,” siling sang bana nga si Charles.—Prinsipio sa Biblia: Santiago 1:19.

Para sa mga asawa: Ihambal kon ano ang imo gusto. “Mahimo nga ginapaabot naton nga mahibaluan sang aton bana ang aton gusto,” siling sang asawa nga si Eleni, “pero kon kaisa kinahanglan naton ini athagon sa iya.” Amo ini ang panugda sang asawa nga si Ynez: “Nagasiling ako, ‘May problema ako, kag gusto ko nga pamatian mo ako. Indi ko kinahanglan nga solusyonan mo ini, gusto ko lang nga mahangpan mo kon ano ang akon ginabatyag.’”

Tilawi ini: Kon maghatag gilayon sing mga solusyon ang imo bana, indi maghinakop nga wala ka niya nahangpan. Mahimo nga gusto lang niya nga indi ka mabug-atan. “Imbes nga mainit ako,” siling sang asawa nga si Ester, “ginahunahuna ko nga nabalaka sa akon ang akon bana kag gusto niya mamati pero gusto man niya magbulig.”—Prinsipio sa Biblia: Roma 12:10.

Para sa mga asawa kag mga bana: Sa masami ginatratar naton ang iban sa paagi nga gusto naton nga trataron kita. Apang, agod maistoryahan sing epektibo ang problema, dapat mo binagbinagon kon ano nga pagtratar ang gusto sang imo tiayon. (1 Corinto 10:24) Amo ini ang ginsiling sang bana nga si Miguel: “Kon bana ka, mangin handa sa pagpamati. Kon asawa ka, mangin handa sa pagpamati kon kaisa sang mga solusyon. Kon magsugtanay kamo, pareho kamo nga makabenepisyo.”—Prinsipio sa Biblia: 1 Pedro 3:8.