Relasyon sa Pamilya kag mga Abyan
Madamo ang nabudlayan sa pagtigayon sing maayo nga mga relasyon. Binagbinaga ang pila ka prinsipio sa Biblia nga makabulig sa imo para mangin maayo ang imo relasyon sa iban.
MAGSAKRIPISYO PARA SA IBAN
PRINSIPIO SA BIBLIA: ‘Pangitaa indi lamang ang inyo personal nga kaayuhan, kundi ang iya man sang iban.’—Filipos 2:4.
ANO ANG BUOT SILINGON SINI? Mangin maayo ang aton relasyon sa iban kon magpokus kita sa aton mahatag sa ila sa baylo sang aton makuha sa ila. Kon pamensaron mo lang ang imo kaugalingon, mahimo maguba ang imo relasyon sa iban. Halimbawa, ang bana ukon asawa nga kaugalingon lang ang ginauna mahimo magluib. Isa pa, wala gid sing gusto makig-abyan sa tawo nga pirme lang nagatinikal parte sa iya ginapanag-iyahan ukon nahibaluan. Gani, pareho sa ginasiling sang libro nga The Road to Character, “ang tawo nga nagauna lang sa iya kaugalingon mahimo mamroblema.”
ANO ANG MAHIMO MO?
Magbulig sa iban. Ang pagsalig kag pagbuligay amo ang pundasyon sang mabakod nga pag-abyanay. Ginapakita sang pila ka pagtuon nga ang mga tawo nga nagabulig sa iban masami nga indi ma-depress kundi may kompiansa sa kaugalingon.
Magpakita sing empatiya. Ang empatiya amo ang pagbatyag sang kasakit nga ginabatyag sang iban. Kon may empatiya ka, likawan mo nga maghambal sing masakit sa iban, pareho sang may unod nga mga lahog, sa tuyo nga sakiton ang balatyagon sang isa ka tawo.
Kon may empatiya ka, likawan mo nga pakanubuon ang iban. Gani makabulig sa imo ang empatiya nga indi magpakita sing pagpasulabi kag makig-abyan man sa iban nga lain ang kultura ukon ginhalinan.
Makig-upod sa iban. Kon pirme ka nagaupod sa iban, mas makilala mo pa gid sila. Kon gusto mo makakita sing maayo nga abyan, dapat ninyo istoryahan ang butang nga interesado sia kag importante sa iya. Dayon mamati sing maayo. Ipakita sa iya nga interesado ka sa iya mga ginakabalak-an. Ginapakita sang pagtuon sining karon lang nga ang “maayo nga pag-istoryahanay makabulig sa isa nga mangin mas malipayon.”
MAGPILI SING MAAYO NGA MGA ABYAN
PRINSIPIO SA BIBLIA: “Ang pagpakig-upod sa malain nga mga tawo nagaguba sang maayo nga moral.”—1 Corinto 15:33, footnote.
ANO ANG BUOT SILINGON SINI? Ang mga tawo nga pirme mo ginaupdan may daku nga impluwensia sa imo—maayo man ini ukon malain. Ang mga sociologist nag-ugyon nga ina nga impluwensia may epekto sa imo kabuhi. Halimbawa, nagsiling sila nga kon pirme ka nagapakig-upod sa mga tawo nga nagapanigarilyo ukon sa mga nagaplano nga magbulag sa ila bana ukon asawa, mahimo magpensar ka man nga manigarilyo kag magbulag sa imo bana ukon asawa.
ANO ANG MAHIMO MO? Makig-abyan sa mga tawo nga nagapakita sing kinaiya kag batasan nga nanamian mo ukon gusto mo ilugon. Halimbawa, makig-upod sa mga tawo nga mabuot, matinahuron, maalwan, kag maabiabihon.
IBAN PA NGA PRINSIPIO SA BIBLIA
Tan-awa ang mga video nga nabase sa Biblia nga makabulig sa mga mag-asawa, tin-edyer, kag mga bata para mangin mas malipayon ang ila pamilya
LIKAWI NGA MAGHAMBAL SING MASAKIT.
“Ang paghambal nga wala ginahunahuna sing maayo kaangay sang buno sang espada.”—HULUBATON 12:18.
MANGIN MAALWAN.
“Ang tawo nga maalwan mangin hamungaya.”—HULUBATON 11:25.
TRATUHA ANG IBAN KON PAANO MO GUSTO NGA TRATUHON KA NILA.
“Himua ninyo sa inyo isigkatawo ang tanan nga luyag ninyo nga himuon nila sa inyo.”—MATEO 7:12.