Leksion 15
Pagbulig sa Iban sa Paghimo sang Kabubut-on sang Dios
Ngaa dapat mo isugid sa iban kon ano ang imo natun-an? (1)
Kay sin-o mo mahimo masugid ang maayong balita? (2)
Ano ang epekto sang imo paggawi sa iban? (2)
San-o ka makabantala kaupod sang kongregasyon? (3)
1. Sa karon, madamo na nga maayong butang ang imo natun-an gikan sa Biblia. Ining ihibalo dapat magdul-ong sa pagpalambo mo sing Cristianong personalidad. (Efeso 4:22-24) Ining ihibalo kinahanglanon agod matigayon mo ang kabuhi nga dayon. (Juan 17:3) Apang, ang iban kinahanglan man makabati sang maayong balita agod maluwas man sila. Ang tanan matuod nga mga Cristiano dapat magpanaksi sa iban. Sugo ini sang Dios.—Roma 10:10; 1 Corinto 9:16; 1 Timoteo 4:16.
2. Makasugod ka paagi sa pagsugid sang maayong butang nga natun-an mo sa mga malapit sa imo. Isugid ini sa imo pamilya, mga abyan, mga kabutho, kag mga kaupod sa trabaho. Mangin malulo kag mapailubon samtang ginahimo mo ini. (2 Timoteo 2:24, 25) Dumduma nga ginatan-aw sa masami sang mga tawo ang paggawi sang isa sangsa ginapamatian nila kon ano ang iya ginasiling. Gani ang imo maayong paggawi mahimo makaganyat sa iban sa pagpamati sa mensahe nga imo ginabantala.—Mateo 5:16; 1 Pedro 3:1, 2, 16.
3. Sa ulihi, mahimo ka mangin kalipikado sa pagsugod sa pagbantala kaupod sang lokal nga kongregasyon sang mga Saksi ni Jehova. Isa ini ka importante nga tikang sang imo pag-uswag. (Mateo 24:14) Daw ano nga kalipay kon may mabuligan ka nga mangin isa ka alagad ni Jehova kag makatigayon sing kabuhi nga dayon!—1 Tesalonica 2:19, 20.