Pagkomunikar Paagi sa mga Sulat

ANG mga sulat nagpauswag sang kabuhi kag paggawi sang minilyon ka tawo. Ang kalabanan nga tulun-an sang Cristianong Griegong Kasulatan mga sulat sa orihinal. Makasulat man kita karon agod mapalig-on ang bag-uhan nga mga tumuluo, mapakig-angutan ang mga abyan, mapalig-on ang mga kauturan nga may pinasahi nga mga responsabilidad, mapabakod ang mga nagaatubang sa mga kabudlayan, kag mapaalinton ang mga impormasyon nga kinahanglan sa pagtatap sa mga hilikuton sang kongregasyon.​—1 Tes. 1:​1-7; 5:​27; 2 Ped. 3:​1, 2.

Ang pagsulat isa man ka epektibo nga paagi sa pagpanaksi. Sa iban nga mga duog madamo nga tawo ang nagapuyo sa estrikto-sing-seguridad nga mga apartment kag sa iban pa nga mga lugar diin indi kita makapanaksi sing hilway. Ang iban wala sa puluy-an sa kalabanan nga tion, busa indi naton sila masugilanon kon nagapanaksi kita sa pamalaybalay. Ang iban nagapuyo sa naligwin nga mga duog.

Bangod sang balatian, malain nga panahon, ukon sang curfew mahimo nga kon kaisa indi ka makahalin sa imo puluy-an. Mahimo ka bala makasulat agod maghatag sing dugang nga panaksi sa isa ka himata ukon sa isa nga imo nasugilanon sing di-pormal? Nagsaylo bala ang isa sang imo mga estudyante sa Biblia? Ang isa ka sulat gikan sa imo mahimo nga kinahanglan gid niya agod mahuptan nga buhi ang iya interes sa espirituwal. Ukon ayhan mahimo mo mapaambit ang nagakaigo nga Makasulatanhon nga impormasyon sa mga bag-o lang makasal, sa nangin mga ginikanan, ukon sa mga namatyan sang hinigugma.

Pagpanaksi Paagi sa Sulat

Kon nagapanaksi paagi sa sulat sa isa nga wala mo pa makilala, ipakilala anay ang imo kaugalingon. Mahimo mo ipaathag nga isa ikaw ka boluntaryo nga nagapakigbahin sa isa ka internasyonal nga hilikuton. Kon daw nagakaigo nga himuon ini, hinambiti nga isa ikaw sang mga Saksi ni Jehova. Pahibalua sia kon ngaa nagsulat ikaw sa baylo nga magduaw sing personal sa iya. Magsulat subong nga daw nagapakighambal ka sa tawo nga nagaatubangay kamo. Apang, suno sa panuytoy nga “pamatud-an ninyo nga maalam kamo subong sang mga man-ug apang inosente subong sang mga salampati,” hunahunaa sing maayo kon daw ano kadamo nga impormasyon ang dapat mo isugid tuhoy sa imo kaugalingon.​—Mat. 10:16.

Ilakip sa sulat kon ano ang isiling mo sa tawo kon naduaw mo kuntani sia. Mahimo mapasibu mo ang isa ka introduksion gikan sa Reasoning nga libro ukon maggamit sing isa ka Makasulatanhon nga presentasyon gikan sa bag-o nga isyu sang Ang Aton Ministeryo sa Ginharian. Mahimo ka makapamangkot kag palig-unon ang tawo nga hunahunaon ini. Ang pila ka manugbantala nagpaathag lamang nga may yara kita wala bayad nga programa sa pagsabat sing mga pamangkot sa Biblia kag nian hinambiti ang pila ka tig-ulo sang kapitulo gikan sa isa sang aton mga balasahon nga bulig sa pagtuon. Ang isa ka halimbawa sang sulat nga ginsulat agod magpanaksi makita sa pahina 73. Mahimo magahatag ini sa imo sing pila ka ideya, apang maayo kon lainlainon mo ang kaundan. Kay kon indi, mahimo nga sa ulihi, madamong beses nga makabaton ang mga tawo sing amo gihapon nga sulat.

Ang iban nga tawo nagapangalag-ag nga magbasa sing malawig nga sulat gikan sa isa nga indi nila kilala. Busa maalamon nga lip-uton lang ang imo sulat. Kon ang imo sulat tuman kalawig mahimo nga matak-an sa pagbasa ang nagbaton sini. Nagakaigo nga maglakip sang naimprinta nga imbitasyon sa mga miting sa Kingdom Hall. Mahimo mo ilakip ang isa ka tract, isa ka brosyur, ukon isa ka kopya sang Ang Lalantawan ukon Magmata! kag ipaathag nga ini sarang matigayon sing regular kon luyag niya. Ukon mahimo ka mamangkot kon bala puwede sia maduaw sa iya puluy-an agod mahambalan sing dugang pa ang ginbinagbinag nga topiko.

Isa ka Malip-ot nga Panugda Tuhoy sa Porma

Tan-awa karon ang halimbawa nga sulat. Talupangda ang masunod: (1) Mahipid ini tan-awon, indi gumon. (2) Bisan madula pa ang sobre, ang ginsulatan nga tawo may ngalan gihapon kag direksion sang nagpadala sing sulat. (3) Ang katuyuan sang sulat ginpahayag sing simple kag direkta sa una nga parapo. (4) Ang tagsa ka panguna nga ideya ginabinagbinag sa tuhay nga parapo. (5) Bangod sang katuyuan sini, ang sulat indi tanto ka ordinaryo kag indi man tanto ka pormal.

Sa mas pormal nga sulat, subong sang isa nga ginapadala sang sekretaryo sang kongregasyon sa sanga talatapan, ang ngalan sang kongregasyon dapat ilakip, upod ang ngalan mismo sang sekretaryo, ang iya direksion, kag ang petsa. Ang ngalan kag direksion sang tawo ukon sang organisasyon nga ginapadalhan sang sulat dapat ilakip man. Ginasundan ini sang nagakaigo nga panamyaw. Sa pagtapos sang sulat, sa pila ka lenguahe ang ekspresyon subong sang “Ang matinahuron” ukon “Sing sinsero gid” ginabutang sa ibabaw sang pirma. Ang pirma mismo dapat ginsulat sa kamot.

Sa bisan ano nga sulat, hatagi sing igtalupangod ang nagakaigo nga pagtigbato, gramatika, pananda (punctuation) kag, siempre, ang pagkahipid. Ang paghimo sini makahatag sing dignidad sa imo sulat kag sa mensahe nga ginaunod sini.

Sa guwa sang sobre, pirme isulat ang direksion sang nagapadala​—mas maayo kon ang imo mismo direksion. Kon sa banta mo daw indi maalamon nga ihatag ang imo kaugalingon nga direksion kon nagapanaksi sa mga dumuluong paagi sa sulat, pamangkuta ang mga gulang kon magatugot sila nga gamiton mo subong direksion sang nagapadala ang lokal nga Kingdom Hall. Indi gid dapat gamiton ang direksion sang Watch Tower Society para sa sini nga katuyuan, kay ini magapahangop sing di-nagakaigo nga ang imo sulat ginpadala gikan sa mga talatapan sang Sosiedad kag mahimo tunaan sang kagumon. Kon wala sing ginbutang nga direksion sang nagpadala kag ginlakip ang literatura, mahimo man ini maghatag sing sayop nga paghangop nga ang Sosiedad amo ang nagpadala.

Pat-ura nga may nagakaigo nga selyo nga ginbutang, ilabi na kon may ginlakip nga literatura. Dumduma nga sa madamo nga pungsod kon ginalakip ang isa ka brosyur ukon isa ka magasin, ang bili sang selyo mas mataas sangsa sulat lamang.

Ang Nagakaigo nga Estilo

Kon matapos mo na ang imo sulat, basaha ini agod mabinagbinag mo ang kaundan. Daw ano ini sa palamatin-an? Mainabyanon bala ini kag mataktikanhon? Ang gugma kag kaayo amo ang pila sang mga kinaiya nga ginapanikasugan naton nga ipadayag sa aton mga pagpakig-angot sa iban. (Gal. 5:​22, 23) Kon may namutikan ikaw nga daw negatibo ukon daw indi maayo nga pagpabutyag, bag-uha ang mga tinaga.

Makadtuan sang sulat ang mga duog nga indi mo makadtuan. Bangod sini nga katunayan, importante gid ini nga galamiton sa ministeryo. Sanglit ang imo sulat nagarepresentar sa imo kag sa imo mga panindugan, hunahunaa kon ano ang ginasiling sini, kon daw ano ini tulukon, kag kon daw ano ini sa palamatin-an. Mahimo ini mag-aman sing kinahanglanon gid nga panugod, pagpabakod, ukon pagpalig-on sa isa ka hamili nga kalag padulong sa dalanon sang kabuhi.