Ginapalig-on ang Paggamit sing Biblia

HANDUM naton nga ipatuhoy ang igtalupangod sang tanan sa Pulong sang Dios, ang Biblia. Ining sagrado nga libro amo ang basihan sang mensahe nga aton ginabantala, kag luyag naton nga mahibaluan sang mga tawo nga ang aton ginahambal, indi sa aton kaugalingon lamang, kundi gikan sa Dios. Kinahanglan nga palambuon sang mga tawo ang pagsalig sa Biblia.

Sa Ministeryo sa Latagon. Kon nagahanda para sa ministeryo sa latagon, magpili pirme sing isa ukon kapin pa nga kasulatan agod ipaambit sa mga tawo nga luyag mamati. Bisan pa ginaplano mo nga himuon ang medyo malip-ot nga pagtanyag sing literatura sa Biblia, maayo gid pirme nga magbasa sing isa ka nagakaigo nga teksto sa Biblia. Mas daku ang gahom sang Biblia sa pagtuytoy sa tulad karnero nga mga tawo sangsa bisan ano nga mahimo isiling naton. Kon ang pagbasa sa Biblia indi gid posible, ayhan luyag mo nga magkutlo gikan sa sini. Sang una nga siglo, ang mga kopya sang mga linukot nga Kasulatan indi mahapos matigayon. Apang, si Jesus kag ang iya mga apostoles nagkutlo pirme gikan sa Kasulatan. Dapat man naton panikasugan nga magsaulo sang mga kasulatan kag gamiton ini sing nagakaigo sa aton ministeryo, ayhan nagakutlo lamang sini kon kaisa.

Kon mahimo ka makabasa sing Biblia, uyati ini sa paagi nga masundan sang tagbalay ang imo pagbasa. Kon ginasundan ka sang tagbalay sa iya mismo Biblia, mahimo nga mangin paborable pa ang iya reaksion sa iya ginabasa.

Apang, dapat mo mahibaluan nga ginapatiko sang pila ka manugbadbad sang Biblia ang Pulong sang Dios. Mahimo nga ang ila mga pagbadbad wala nagahisanto sing bug-os sa orihinal nga mga lenguahe sang Biblia. Ang pila ka moderno nga pagbadbad nagdula sang personal nga ngalan sang Dios, nagpaburon sa ginasiling sang teksto sa orihinal nga lenguahe tuhoy sa kahimtangan sang mga patay, kag nagtago sang ginasiling sang Biblia tuhoy sa katuyuan sang Dios sa duta. Agod mapakita sa tawo ining mga ginhimo, ayhan kinahanglan nga ipaanggid mo ang yabi nga mga teksto gikan sa nagkalainlain nga Biblia ukon gikan sa mas nauna nga mga badbad sa amo man nga lenguahe. Sa pila ka topiko, ang Reasoning From the Scriptures nagahatag sing pagpaanggid sa nagkalainlain nga pagbadbad sang yabi nga mga ekspresyon sa mga bersikulo nga pirme ginagamit. Ang bisan sin-o nga nagahigugma sa kamatuoran magapasalamat tungod sang paghibalo sa mga katunayan.

Sa mga Miting sa Kongregasyon. Ang tanan dapat palig-unon nga gamiton ang ila mga Biblia sa mga miting sa kongregasyon. May mga kaayuhan ini sa pila ka paagi. Nagabulig ini nga mahuptan ang atension sang mga tagpalamati sa kon ano ang ginahambalan. Nagadaku pa ang epekto sang instruksion nga ginahatag sang humalambal bangod wala lamang nila ini mabatian kundi nabasa mismo ini. Kag ginapatudok sini sa hunahuna sang bag-uhan nga mga interesado nga ang Biblia amo gid ang ginahalinan sang aton mga pagpati.

Kon bala sundan sang mga tagpalamati sa ila mga Biblia ang pagbasa mo sang mga teksto sa Kasulatan magadepende sing daku sa pagpalig-on mo sa ila. Ang isa sang labing maayo nga mga metodo amo ang direkta nga pag-agda sa ila.

Depende sa imo, nga humalambal, kon diin nga teksto ang luyag mo nga padakuon paagi sa pagpabukad sini sa mga tagpalamati. Mas maayo nga basahon ang mga kasulatan nga makabulig sa imo sa pagpasangkad sang imo panguna nga mga punto. Nian, kon ginatugot sang tion, dugangi sing pila pa ka kasulatan nga nagasakdag sa imo argumento.

Sa pagkamatuod, ang pagsambit lamang sa teksto ukon pag-agda sa mga tagpalamati nga bukaron ang isa ka kasulatan masami nga indi pa tuman. Kon basahon mo ang isa ka teksto kag nian magsaylo sa lain naman nga wala pa gani makita sang imo mga tagpalamati ang nauna, indi madugayan kag maluyahan sila kag magauntat sa pagsunod sa imo sa Biblia. Magpanilag. Kon nakita na sang kadamuan ang teksto, basaha ini.

Maghunahuna sing abanse. Sambita sing abanse ang imo teksto antes basahon ini. Makapadiutay ini sa imo mauyang nga tion bangod sa paghulat sa mga tagpalamati nga pangitaon ang teksto. Bisan pa mas diutay nga materyal ang matuptupan kon hatagan mo sing tion ang tagpalamati nga pangitaon ang mga teksto, takus ang mga benepisyo.