Pamangkot

◼ Ngaa mapuslanon nga pangitaon sang tumalambong ang mga kasulatan kon ginaagda sang humalambal nga himuon ini sa tion sang iya diskurso?

Ang mga rason subong sang tema nga ginapaathag kag kon bala ang pamulongpulong nagalakip sang isa ka bersikulo-por-bersikulo nga pagbinagbinag sa isa ka bahin sang Pulong sang Dios magapat-od sang kadamuon sang mga kasulatan nga ipapangita sa tumalambong.

Importante nga dumdumon nga ang isa ka rason sang pagpangita sa kasulatan amo ang pamatud-an nga ang ginasiling gikan sa Biblia. (Binu. 17:11) Ang isa pa ka tulumuron amo ang pag-usisa sa Makasulatanhon nga pamatuod bilang pagsakdag sa kon ano ang ginapaathag agod ang pagtuo sang tanan ginapabakod. Ang makita kon ano gid ang ginasiling sang Biblia samtang ang panguna nga teksto ginabasa labi pa nga magatudok sa hunahuna. Dugang sa pagpangita sa mga kasulatan, ang pagkuha sing nota kag pagdungan sa mga ideya nga ginapabutyag mapuslanon.

Bisan pa ang balayan sang Sosiedad mahimo magsambit sing madamong Makasulatanhon nga mga teksto sa pagpasangkad sang isa ka tema, ginaaman ini para sa kapuslanan sang humalambal, agod buligan sia sa iya paghanda. Mahimo ini maghatag sing kinahanglanon nga impormasyon kag magabulig man sa iya nga madumduman ang sadsaran nga Makasulatanhon nga mga prinsipio kag mahangpan ang lakat sang tema. Ginapat-od sang humalambal kon ano nga mga teksto ang importante sa paghimo sang pamulongpulong kag ginaagda ang tumalambong nga sundan sia samtang ginabasa kag ginapaathag ini nga mga teksto. Ang iban nga mga teksto nga nagapamatuod sa materyal mahimo sambiton kag balikwaton, apang sa sina nga kahimtangan indi na kinahanglan nga pangitaon pa ini sang tumalambong.

Kon ang humalambal nagabasa sang pinili nga mga kasulatan, ginabasa niya ini sing direkta gikan sa Biblia, indi gikan sa print-out sang kompyuter. Kon ginaagda sang humalambal ang tumalambong sa pagbasa sing dungan, ginahatag niya sing maathag ang tulun-an sang Biblia, ang kapitulo, kag ang (mga) bersikulo. Paagi sa pagdulog sa makadali sa pagpautwas sing pamangkot ukon sa pagkomento sing malip-ot kon ngaa dapat basahon ang teksto, ginahatagan niya sing tion ang tumalambong sa pagpangita sang kasulatan. Ang pagsulit sa espesipiko nga teksto magabulig man sa tumalambong nga madumduman ini. Apang, wala ginarekomendar nga sambiton ang numero sang pahina, kay nagakalainlain ini depende sa partikular nga edisyon sang Biblia nga ginagamit sang mga indibiduwal nga nagatambong. Ang pagpangita sa mga kasulatan kon ginaagda sa paghimo sini nagabulig sa tumalambong nga makapanginpulos sa gahom sang Pulong sang Dios samtang ginapaathag ini sa diskurso.​—⁠Heb. 4:⁠12.