Ginapalutaw ang Panguna nga mga Punto

ANO ang panguna nga mga punto sang isa ka pamulongpulong? Indi lamang ini makawiwili nga mga bahin nga ginapahapyawan sing makadali. Importante ini nga mga ideya nga ginapasangkad. Mga ideya ini nga importante sa paglab-ot sang imo tulumuron.

Ang yabi agod mapalutaw ang panguna nga mga punto amo ang maalamon nga pagpili kag pag-organisar sa materyal. Masami nga mas madamo nga impormasyon sangsa magamit ang matigayon sa pagpanalawsaw para sa isa ka pamulongpulong. Paano mo mahibaluan kon ano nga impormasyon ang imo gamiton?

Una, binagbinaga ang imo mga tagpalamati. Halos wala bala sila sing nahibaluan sa imo topiko, ukon pamilyar gid bala sila sa sini? Kalabanan bala sa ila nagaugyon sa ginasiling sang Biblia tuhoy sa sini, ukon ang iban bala may huyog nga magduhaduha? Ano nga sahi sang mga hangkat ang ila ginaatubang sa matag-adlaw nga pagkabuhi kon ginapanikasugan nila nga iaplikar ang ginasiling sang Biblia tuhoy sa topiko? Ikaduha, pat-ura nga maathag sa imo hunahuna ang imo tulumuron sa pagpamulongpulong sa sina nga mga tagpalamati tuhoy sa topiko nga ginabuko mo nga gamiton. Nagagamit sining duha ka panuytoy, binagbinaga ang materyal kag ibilin lamang kon ano gid ang nagakabagay nga gamiton.

Kon ginhatagan ka sing sadsaran nga balayan nga may tema kag panguna nga mga punto, dapat sundon mo ini. Apang, ang kapuslanan sang imo presentasyon mapadaku pa kon dumdumon mo ang mga panugda sa ibabaw kon nagapasangkad sang tagsa ka panguna nga punto. Kon wala sing ginhatag nga balayan, depende na sa imo ang pagpili sang panguna nga mga punto.

Kon maathag na sa imo hunahuna ang panguna nga mga punto kag naorganisar na ang mga detalye sa idalom sini, mas mahapos para sa imo ang pagpamulongpulong. Mahimo nga makabenepisyo gid ang imo mga tagpalamati sa sini.

Nanuhaytuhay nga Paagi sa Pag-organisar Sang Imo Materyal. Mahimo sundon ang nanuhaytuhay nga metodo sa pag-organisar sang kaundan sang imo pamulongpulong. Samtang ginatun-an mo ini, masapwan mo nga ang pila sini mangin epektibo, depende sa imo tulumuron.

Ang mapasibusibuon nga metodo nagalakip sang pagbahinbahin suno sa topiko. (Ang tagsa ka panguna nga punto kinahanglanon bangod nagabulig ini agod mahangpan sang imo mga tagpalamati ang topiko ukon nagabulig sa paglab-ot sa tulumuron sang imo pamulongpulong.) Ang isa pa ka metodo amo ang kronolohiko. (Ang mga hitabo antes sang Anaw, halimbawa, mahimo sundan sang mga hitabo antes sang paglaglag sa Jerusalem sang 70 C.E., kag ini mahimo sundan sang mga hitabo sa aton adlaw.) Ang ikatlo nga metodo amo ang kabangdanan kag epekto. (Mahimo ini mapasangkad sa bisan ano nga direksion. Halimbawa, masugdan mo ini paagi sa isa ka kahimtangan karon, ang epekto, kag nian ipakita ang kabangdanan.) Ang ikap-at nga metodo nagalakip sang kabaliskaran. (Mahimo mo mapatuhay ang maayo sa malain ukon ang positibo sa negatibo.) Kon kaisa ang isa ka pamulongpulong magalakip sang kapin sa isa ka metodo.

Sang sayop nga ginsumbong si Esteban sa atubangan sang Judiyong Sanhedrin, naghatag sia sing epektibo nga pamulongpulong suno sa kronolohiko nga metodo. Samtang ginabasa mo ini sa Binuhatan 7:2-53, talupangda nga ang pagpili sa mga punto makahulugan. Una, ginpaathag ni Esteban nga nagaasoy sia sing isa ka kasaysayan nga indi mapanghiwala sang iya mga tagpalamati. Pagkatapos ginpakita niya nga bisan ginsikway si Jose sang iya mga utod, gingamit sia sang Dios agod mag-aman sing kaluwasan. Masunod, ginpakita niya nga nangin di-matinumanon ang mga Judiyo kay Moises, nga amo ang gingamit sang Dios. Naghinakop sia paagi sa pagpadaku nga ang espiritu nga kaangay sang ginpakita sang mga Judiyo sang una nga mga kaliwatan ginpakita man sang mga nagpapatay kay Jesucristo.

Indi Maggamit Sing Tuman Kadamo nga Panguna nga Punto. Pila lamang ang kinahanglanon sa pagpasangkad sang bisan ano nga tema. Sa kalabanan nga kaso, sarang ini maisip sa isa lamang ka kamot. Matuod ini bisan nga magapamulongpulong ka man sa sulod sang 5 ka minuto, 10 ka minuto, 30 ka minuto, ukon mas malawig pa. Indi pagtinguhai nga palutawon ang tuman kadamo nga punto. Pila lamang ka punto ang sarang mahangpan sang imo mga tagpalamati gikan sa isa ka pamulongpulong. Kag kon mas malawig ang pamulongpulong, dapat labi nga mapadaku kag maathag ang yabi nga mga punto.

Walay sapayan kon daw ano kadamo nga panguna nga punto ang imo ginagamit, pat-ura nga pasangkaron sing nagakaigo ang kada isa. Hatagi sing bastante nga tion ang mga tagpalamati sa pagbinagbinag sang tagsa ka punto agod mapatudok ini sing maayo sa ila hunahuna.

Dapat makita sa imo pamulongpulong ang pagkasimple. Wala ini pirme nagasandig sa kadamuon sang materyal nga ginapresentar. Kon ang imo mga ideya maathag nga ginagrupo sa idalom sang pila lamang ka panguna nga mga uluhan kag ginapasangkad mo ini sing isa-isa, ang pamulongpulong mahapos masundan kag mabudlay malimtan.

Palutawa ang Imo Panguna nga mga Punto. Kon naorganisar sing nagakaigo ang imo materyal, indi mangin mabudlay ang pagpadaku sa importansia sang imo panguna nga mga punto paagi sa imo pamulongpulong.

Ang panguna nga paagi sa pagpalutaw sang panguna nga punto amo ang pagpresentar sang mga pamatuod, mga kasulatan, kag iban pa nga materyal sa paagi nga napatuhoy gid ini sa panguna nga ideya kag ginapadaku ini. Ang tanan nga ikaduha nga mga punto dapat magpaathag, magpamatuod, ukon magpadaku sa panguna nga punto. Indi pag-idugang ang wala sing labot nga mga ideya bangod lamang makawiwili ini. Samtang ginapasangkad mo ang ikaduha nga mga punto, ipakita sing maathag ang kaangtanan sini sa panguna nga punto nga ginasakdag sini. Indi pag-itugyan sa mga tagpalamati ang paghaumhaum sini. Ang kaangtanan mapakita paagi sa pagsulit sang yabi nga mga tinaga nga nagapabutyag sang panguna nga ideya ukon paagi sa pagsulit sing ideya sang panguna nga punto sa pulupanag-on.

Ang pila ka humalambal nagapadaku sang panguna nga mga punto paagi sa pagnumero sini. Bisan pa isa ini ka paagi sa pagpalutaw sang panguna nga mga punto, indi ini dapat magbulos sa mahalungon nga pagpili kag lohiko nga pagpasangkad sang materyal mismo.

Mahimo pakamaayuhon mo nga sambiton lamang ang imo panguna nga punto sa pagsugod gid antes mo ipresentar ang nagasakdag nga argumento. Magabulig ini sa mga tagpalamati nga mahangpan ang importansia sang magasunod, kag magapadaku man ini sa sining panguna nga punto. Mahimo mo mapalutaw ang punto paagi sa pagsumaryo sini pagkatapos nga mapasangkad ini sing bug-os.

Sa Ministeryo sa Latagon. Ang mga prinsipio nga ginbinagbinag sa ibabaw wala lamang naaplikar sa pormal nga mga diskurso kundi sa imo man mga pagpakighambal sa ministeryo sa latagon. Kon nagahanda, binagbinaga ang bisan anong dalagku nga hitabo nga ginahunahuna sang mga tawo sa sina nga duog. Magpili sang isa ka tema nga nagahatag sing kahigayunan sa pagpakita kon paano ang paglaum nga ginahatag sang Biblia magalubad sini nga kahimtangan. Magpili sing ayhan duha ka panguna nga punto agod pasangkaron ina nga tema. Mamat-od kon ano nga mga kasulatan ang imo gamiton sa pagsakdag sina nga mga punto. Nian planuha kon paano mo sugdan ang imo pagpakighambal. Ini nga paghanda nagatugot sang pagpasibusibu nga kinahanglanon sa paghambalanay. Nagabulig man ini sa imo nga makasiling sang pila ka butang nga madumduman sang mga tagbalay.