Mga Pamatan-on nga Lalaki, Nagatinguha Bala Kamo?
1. San-o dapat sugdan sang mga pamatan-on nga lalaki ang pag-aplikar sang ginasiling sang 1 Timoteo 3:1?
1 “Kon ang bisan sin-o nga lalaki nagatinguha . . . , nagahandum sia sang maayo nga buhat.” (1 Tim. 3:1) Ini nga pinamulong nagapalig-on sa mga utod nga lalaki nga magtinguha nga lab-uton ang mga pribilehiyo sa kongregasyon. San-o mo ini himuon? Kon adulto ka na? Sa pagkamatuod, mas maayo kon sugdan mo ini samtang pamatan-on ka pa. Makatigayon ka sing mga paghanas kag mapakita mo nga kalipikado ka nga itangdo subong ministeryal nga alagad kon maghamtong ka na. (1 Tim. 3:10) Mga bawtismado nga pamatan-on nga lalaki, paano ninyo malab-ot ang mga pribilehiyo sa kongregasyon?
2. Paano mo mapalambo kag mapakita ang pagkamasinakripisyuhon?
2 Pagkamasinakripisyuhon: Dumduma nga nagalab-ut ka para sa maayo nga buhat, indi sa isa ka titulo. Gani, palambua ang handum nga buligan ang mga kauturan. Ang isa ka paagi para mahimo ini amo ang pagpamalandong sa maayo nga halimbawa ni Jesus. (Mat. 20:28; Juan 4:6, 7; 13:4, 5) Mangabay kay Jehova nga buligan ka nga mangin interesado sa iban. (1 Cor. 10:24) Makahatag ka bala sing praktikal nga bulig sa mga tigulang ukon may kasablagan sa kongregasyon? Makaboluntaryo ka bala sa pagpanghilamon, pagpanglampaso, ukon sa bisan ano nga hilikuton sa pagmentenar sang Kingdom Hall? Handa ka bala nga magtal-us kon wala ang may bahin sa Teokratikong Eskwelahan Para sa Ministeryo? Mangin malipayon ka sa pagsakripisyo para sa iban.—Binu. 20:35.
3. Daw ano ka importante ang espirituwalidad, kag paano ini mapalambo?
3 Espirituwalidad: Mas importante para sa isa ka alagad sa kongregasyon ang espirituwalidad sangsa bisan ano nga talento ukon abilidad. Ginatinguhaan sang espirituwal nga tawo nga tamdon ang mga butang kaangay sang pagtamod ni Jehova kag ni Jesus. (1 Cor. 2:15, 16) Ginapakita man niya ang “mga bunga sang espiritu.” (Gal. 5:22, 23) Makugi sia nga ebanghelisador nga ginauna ang intereses sang Ginharian. (Mat. 6:33) Mapalambo mo ang diosnon nga mga kinaiya paagi sa maayo nga rutina sang personal nga pagtuon. Mahimo nalakip sa sini ang pagbasa sang Biblia adlaw-adlaw, pagbasa sang tagsa ka isyu sang Ang Lalantawan kag Magmata!, kag paghanda kag pagtambong sa mga miting sang kongregasyon. (Sal. 1:1, 2; Heb. 10:24, 25) Sang ginapalig-on ni Pablo ang pamatan-on nga si Timoteo nga mag-uswag sa espirituwal, sia nagsulat: “Hatagi sang dalayon nga igtalupangod ang . . . imo panudlo.” (1 Tim. 4:15, 16) Gani handai sing maayo ang imo mga bahin sa Teokratikong Eskwelahan Para sa Ministeryo. Maghanda para sa ministeryo, kag regular nga makigbahin sa sini. Magpahamtang sing mga tulumuron, pareho sang pagpayunir, pag-alagad sa Bethel, ukon pag-eskwela sa Bible School for Single Brothers, kag lab-uta ini. Ang espirituwalidad makabulig sa imo nga ‘magpalagyo gikan sa mga kailigbon nga kinaandan sa pagkapamatan-on.’—2 Tim. 2:22.
4. Daw ano ka importante ang pagkamasaligan kag katutom?
4 Pagkamasaligan kag Katutom: Bangod ang mga lalaki nga gintangdo sa pagpanagtag sing pagkaon sa imol nga mga Cristiano sang unang siglo “may pamatuod” nga masaligan kag matutom, ang mga apostoles wala na nagpalibog sa sini, kag nakakonsentrar sila sa mas importante nga butang. (Binu. 6:1-4) Gani, kon hatagan ka sing asaynment sa kongregasyon, himua ini sa imo bug-os nga masarangan. Iluga si Noe, nga nagsunod sa tanan nga instruksion sa pagtukod sang arka. (Gen. 6:22) Ang katutom ginapabaloran ni Jehova kag pamatuod ini sang espirituwal nga pagkahamtong.—1 Cor. 4:2; tan-awa ang kahon nga “Ang Benepisyo sang Paghanas.”
5. Ngaa dapat magtinguha ang mga pamatan-on nga lalaki?
5 Subong sang gintagna na, ginapadali ni Jehova ang pagpanipon. (Isa. 60:22) Sa aberids, 250,000 ka tawo ang ginabawtismuhan kada tuig. Bangod madamo nga bag-uhan ang nagasulod sa kamatuoran, kinahanglanon ang kalipikado kag espirituwal nga mga lalaki sa pagtatap sa mga responsibilidad sa kongregasyon. Mas madamo na gid subong ang buluhaton sa pag-alagad kay Jehova. (1 Cor. 15:58) Mga pamatan-on nga lalaki, nagatinguha bala kamo? Kon amo, nagahandum kamo para sa maayo gid nga buhat!
[Blurb sa pahina 2]
Bangod madamo nga bag-uhan ang nagasulod sa kamatuoran, kinahanglanon ang kalipikado kag espirituwal nga mga lalaki sa pagtatap sa mga responsibilidad sa kongregasyon
[Kahon sa pahina 3]
Ang Benepisyo sang Paghanas
Ang kalipikado nga mga pamatan-on nga lalaki nagabenepisyo kon ginahatagan sila sing asaynment kag ginahanas sang mga gulang. Ang manugtatap sang sirkito nagapungko sa entablado upod sa isa ka manugbantala nga ginapalig-on niya. Natalupangdan niya ang isa ka bata nga lalaki nga nagatindog malapit sa ila. Gani ginpamangkot niya ini kon may ihambal sia sa iya. Nagsabat ang bata nga sia ang naasayn sa pag-vacuum sang entablado pagkatapos sang miting. Manugpauli na ang iya mga ginikanan, pero indi sia magpauli kay wala pa niya nahimo ang iya asaynment. Malipayon nga nagpahigad ang manugtatap sang sirkito. Nagsiling sia: “Ang mga gulang sa sina nga kongregasyon alisto sa paghanas sa kalipikado nga mga pamatan-on nga lalaki paagi sa paghatag sa ila sing mga asaynment sa kongregasyon. Bilang resulta, kinaandan na sa ila nga may ginarekomendar nga pamatan-on subong ministeryal nga alagad kon magduaw ako sa ila kongregasyon.”