Ang Promisa kay Jehova

Pagligad sang mga duha ka bulan sugod sang naghalin ang mga Israelinhon sa Egipto, nakalab-ot sila sa Bukid Sinai kag nagkampo didto. Si Moises ara sa bukid sang si Jehova naghambal sa iya: ‘Ginluwas ko ang mga Israelinhon. Kon tumanon nila ako kag ang akon mga kasuguan, mangin espesyal ko sila nga katawhan.’ Nagbalik si Moises sa mga Israelinhon kag ginsugid sa ila ang ginsiling ni Jehova. Ano ang ila reaksion? Nagsabat sila: ‘Himuon namon ang tanan nga ginsiling ni Jehova.’

Nagtaklad liwat si Moises sa bukid. Si Jehova nagsiling sa iya didto: ‘Sa ikatlo nga adlaw, maistorya ako sa imo. Hambala ang mga tawo nga indi magsaka sa Bukid Sinai.’ Nagpanaug si Moises sa bukid kag ginsilingan ang mga Israelinhon nga magpreparar sa pagpamati kay Jehova.

Pagligad sang tatlo ka adlaw, nakita sang mga Israelinhon nga nagapangilat kag may madamol nga panganod sa bukid. Nabatian man nila ang mabaskog nga daguob kag tunog sang budyong. Dayon nagpanaug si Jehova sa bukid paagi sa kalayo. Nagakurog ang mga Israelinhon sa kahadlok. Nag-uyog sing mabaskog ang bilog nga bukid kag nagtub-ok ang aso. Nagabaskog nga nagabaskog ang tunog sang budyong. Dayon ang Dios nagsiling: ‘Ako si Jehova. Indi kamo dapat magsimba sa iban nga dios.’

Nagtaklad liwat si Moises sa bukid, kag ginhatagan sia ni Jehova sing mga kasuguan para sa mga Israelinhon parte sa kon paano nila Sia dapat simbahon kag kon ano ang dapat nila himuon. Ginsulat ni Moises ang mga kasuguan kag ginbasa ini sa mga Israelinhon. Nagpromisa sila: ‘Himuon namon ang tanan nga ginsiling ni Jehova.’ Nagpromisa sila sa Dios. Pero tumanon gid man bala nila ini?