Ginpadyaan Sila Tungod sang Paglakat nga Walay Kasawayan

SI Jehova nagapakamaayo kag nagapadya sa iya matutom nga mga alagad. Ayhan dapat sila maghulat sing pila ka tion agod makita kon paano ginatuman ang mga katuyuan sang Dios, apang daw ano nga kalipay kon maagom ang iya pagpakamaayo!

Gin-ilustrar ini sing maayo mga duha ka libo ka tuig ang nakaligad sa kaso sang Judiyong saserdote nga si Zacarias kag sang iya asawa, nga si Elisabet, nga lunsay sa panimalay ni Aaron. Nanaad ang Dios nga pakamaayuhon niya ang mga Israelinhon sing mga anak kon mag-alagad sila sa iya sing matutom. Nagsiling sia nga ang mga anak isa ka padya. (Levitico 26:9; Salmo 127:⁠3) Apang, sanday Zacarias kag Elisabet wala sing anak kag tigulang na.​—⁠Lucas 1:​1-7.

Ang Kasulatan nagasiling nga sanday Zacarias kag Elisabet “lunsay matarong sa atubangan sang Dios bangod sang paglakat nga walay kasawayan suno sa tanan nga sugo kag legal nga pagsulundan ni Jehova.” (Lucas 1:⁠6) Ginhigugma nila katama ang Dios sa bagay nga indi mabug-at para sa ila ang maglakat sa matarong nga dalanon kag magsunod sa iya mga sugo.​—⁠1 Juan 5:⁠3.

Wala Ginapaabot nga mga Pagpakamaayo

Balikan naton ang talipuspusan nga tigpamulak ukon maaga nga bahin sang tig-ilinit sang tuig 3 B.C.E. Si Herodes nga Daku ang nagagahom subong hari sa Judea. Isa ka adlaw, ang saserdote nga si Zacarias nagsulod sa Balaan sang templo sang Jerusalem. Samtang ang mga tawo nagatipon sa pagpangamuyo sa guwa sang santuaryo, nagsunog sia sing incienso sa bulawan nga halaran. Ayhan ginkabig nga labing dungganon sa adlaw-adlaw nga mga serbisyo, ginahimo ini sa tapos madulot ang mga halad. Ang isa ka saserdote may amo sini nga pribilehiyo makaisa lamang sa iya bug-os nga kabuhi.

Nahayanghag si Zacarias sa iya nakita. Ti, ang anghel ni Jehova nagatindog sa tuo nga bahin sang halaran sang incienso! Ang tigulang nga saserdote nalisang kag hinadlukan. Apang ang anghel nagsiling: “Dili ka mahadlok, Zacarias, kay ang imo pag-ampo ginpamatian, kag ang imo asawa nga si Elisabet magaanak sing lalaki sa imo, kag tawgon mo ang iya ngalan Juan.” Huo, ginpamatian ni Jehova ang hanuot nga mga pangamuyo nanday Elisabeth kag Zacarias.​—⁠Lucas 1:​8-13.

Ang anghel nagadugang: “Magaagom ka sing kalipay kag kasadya, kag madamo ang magakalipay sa iya pagkatawo; kay mangin daku sia sa atubangan ni Jehova. Kag indi sia mag-inom sing alak ukon ilimnon nga masingkal, kag mapun-an sia sang balaan nga espiritu kutob pa sa tiyan sang iya iloy.” Si Juan mangin bug-os kabuhi nga Nazareo nga napun-an sang balaan nga espiritu sang Dios. Ang anghel nagapadayon: “Madamo sang anak sang Israel ang palisuon niya kay Jehova nga ila Dios. Subong man, magauna sia sa iya sa espiritu kag sa gahom ni Elias, sa pagpaliso sang mga tagipusuon sang mga ginikanan sa mga anak kag sang mga malalison sa kaalam sang mga matarong, sa paghanda kay Jehova sing katawhan nga naaman.”​—⁠Lucas 1:​14-17.

Si Zacarias namangkot: “Paano ko bala mapat-od ini? Kay ako tigulang na kag ang akon asawa tigulang na sa mga tuig.” Ang anghel nagsabat: “Ako si Gabriel, nga nagatindog sa atubangan sang Dios, kag ginpadala ako sa paghambal sa imo kag sa pagtunda sining maayong balita. Kag, yari karon! magaapa ka kag indi makahambal tubtob sa adlaw nga mahanabo ining mga butang, bangod nga wala ka magtuo sa akon mga pulong, nga tumanon sa ila gintalana nga tion.” Sang pagguwa ni Zacarias sa santuaryo, indi sia makahambal, kag ginhantop sang mga tawo nga nakakita sia sing labaw sa kinaugali nga palanan-awon. Ang lamang nga mahimo niya amo ang pagsinyas, nagagamit sing mga kumpas sa pagpaalinton sang iya panghunahuna. Sang matapos ang iya pangpubliko nga pag-alagad, nagpauli sia.​—⁠Lucas 1:​18-23.

Rason sa Pagkasadya

Suno gid sa ginsaad, si Elisabet may rason sa pagkasadya sang ulihi. Nagmabdos sia, nagdula sang pasipala sa pagkabaw-as. Nalipay man ang iya paryente nga si Maria, kay ini man nga anghel, nga si Gabriel, nagsiling sa iya: “Yari karon! magapanamkon ka sa imo tiyan kag magaanak sing lalaki, kag tawgon mo ang iya ngalan Jesus. Mangin daku sia kag tawgon nga Anak sang Labing Mataas; kag si Jehova nga Dios magahatag sa iya sang trono sang iya amay nga si David.” Si Maria handa magtungod sa papel sang “ulipon nga babayi ni Jehova.”​—⁠Lucas 1:​24-38.

Si Maria nagkadto sing dalidali sa puluy-an nanday Zacarias kag Elisabet sa isa ka siudad sa kabakuluran sang Judea. Pagkabati sang panamyaw ni Maria, ang bata nagkibo sa tiyan ni Elisabet. Sa idalom sang impluwensia sang balaan nga espiritu sang Dios, si Elisabet nagsinggit sing mabaskog: “Bulahan ka sa tunga sang mga babayi, kag bulahan ang bunga sang imo tiyan! Kag paano bala ining pribilehiyo akon, nga ang iloy sang akon Ginuo magkari sa akon? Kag, yari karon! sang nag-abot ang tingog sang imo pag-abiabi sa akon mga igdulungog, ang bata sa akon tiyan nagkibo sa daku nga kalipay. Malipayon sia nga nagtuo, bangod may bug-os nga katumanan yadtong mga butang nga ginpamulong sa iya gikan kay Jehova.” Si Maria naghulag nga may daku nga kasadya. Nagpabilin sia kaupod ni Elisabet sing mga tatlo ka bulan.​—⁠Lucas 1:​39-56.

Si Juan Nabun-ag

Sa gintalana nga tion nabun-ag ang isa ka bata nga lalaki sa tigulang nga sanday Elisabet kag Zacarias. Sang ikawalo nga adlaw, ang bata ginsirkunsidar. Luyag sang mga himata nga tawgon ang bata nga Zacarias, apang si Elisabet nagsiling: “Indi, sa pagkamatuod! kundi tawgon sia Juan.” Nag-ugyon bala ang iya apa gihapon nga bana? Nagsulat sia sa tapitapi: “Ang iya ngalan si Juan.” Sa gilayon, ang dila ni Zacarias nagtugak, kag nakahambal sia, nga nagapakamaayo kay Jehova.​—⁠Lucas 1:​57-66.

Napuno sang balaan nga espiritu, ang malipayon nga saserdote nagapanagna. Nagapamulong sia subong nga daw ang ginsaad nga Manluluwas​—⁠‘ang sungay sang kaluwasan sang balay ni David’⁠—​ginbangon na nahisanto sa katipan upod kay Abraham nahanungod sa Binhi nga magapakamaayo sa tanan nga mga pungsod. (Genesis 22:​15-18) Subong mensahero sang Mesias, ang nabun-ag sing milagruso nga anak ni Zacarias mismo ‘magauna kay Jehova sa paghatag sing ihibalo sang kaluwasan sa iya katawhan.’ Sa pagligad sang mga tuig, si Juan nagpadayon sa pagtubo kag nagbakod sa espiritu.​—⁠Lucas 1:​67-80.

Ginpadyaan sing Bugana

Sanday Zacarias kag Elisabeth maayong mga halimbawa sang pagtuo kag pailob. Padayon sila nga nag-alagad kay Jehova sing matutom bisan pa nga kinahanglan sila maghulat sa Dios, kag ang ila labing daku nga mga pagpakamaayo nag-abot lamang sang tigulang na sila.

Apang, daw ano nga pagpakamaayo ang gin-agom nanday Elisabet kag Zacarias! Sa idalom sang impluwensia sang balaan nga espiritu sang Dios, sila nga duha nagpanagna. May pribilehiyo sila nga mangin mga ginikanan kag mga manunudlo sang mensahero sang Mesias, nga si Juan Bautista. Dugang pa, ginkabig sila ni Jehova subong matarong. Subong man, yadtong nagalakat karon sa diosnon nga dalanon mahimo makatigayon sing matarong nga tindog upod sa Dios kag makabaton sing madamong ginpakamaayo nga mga padya paagi sa paglakat nga walay kasawayan sa mga sugo ni Jehova.