Ang Kabuhi kag Ministeryo ni Jesus

Natawo ang Manughanda sang Dalan

HALOS handa na si Elizabeth para sa iya lapsag. Sang nagligad nga tatlo ka bulan si Maria kaupod niya. Apang karon panahon na para kay Maria nga magpaalam kag magbiyahe sing malawig pauli sa Nasaret. Sa mga anum ka bulan sia, man, magabata.

Wala madugay nga nakahalin si Maria, si Elizabeth nagbata. Daw ano nga kasadya sang ang pagbun-ag madinalag-on kag si Elizabeth kag ang lapsag maayo sing kahimtangan! Sang ginpakita ni Elizabeth ang iya bata sa iya mga kaingod kag mga himata, sila tanan nagkalipay upod sa iya.

Suno sa kasugoan sang Dios, ang bata nga lalaki sang Israel dapat sirkunsidahon sa ikawalo nga adlaw pagkabun-ag niya. Sa sini nga okasyon ang mga abyan kag mga himata nagkari sa pagduaw. Nagsiling sila nga ang bata dapat hingalanan sunod sa iya amay, si Zacarias. Apang si Elizabeth naghambal. ‘Indi!’ siling niya. ‘Tawgon sia nga Juan.’ Dumduma, amo ini ang ngalan nga siling ni anghel Gabriel ihatag sa bata.

Apang, ang ila mga abyan nagpamatok: ‘Wala sing isa sa aton mga himata ang may amo sina nga ngalan.’ Nian, naggamit sang senyas, ginpamangkot nila kon ano ang luyag sang iya amay nga ihingalan sa bata. Nangabay sing sululatan nga tapitapi, si Zacarias, sa kakibot sang tanan, nagsulat: ‘Ang iya ngalan amo si Juan.’

Sa sina ang panghambal ni Zacarias milagruso nga nabalik. Madumduman mo nga nadula niya ang iya ikasarang sa paghambal sang wala niya pagpatihi ang pahibalo sang manugtonda nga si Elizabeth magabata. Bueno, sang makahambal na si Zacarias, ang tanan nga nagapuyo sa kasilingan natingala kag nagsiling sa ila kaugalingon: ‘Mangin ano gid ayhan ini nga bata?’

Si Zacarias napuno karon sang balaan nga espiritu, kag gintagna niya ang nahanungod sa iya anak: ‘Pagatawgon sia nga manalagna sang Labing Mataas, kag magauna sia kay Jehova kag magahanda sing dalan para sa iya. Pagasugiran niya ang mga tawo nga maluwas sila paagi sa pagpatawad sa ila mga sala.’

Sa sini nga tion si Maria, nga dalaga gihapon, nagpauli sa Nasaret. Ano ang matabo sa iya kon mahibal-an na nga nagamabdos sia? Lucas 1:56-80; Levitico 12:2, 3.

◆ Pila ka bulan ang magulang ni Juan kay Jesus?

◆ Ano ang natabo sang si Juan walo ka adlaw ang edad?

◆ Ano nga hilikuton ang gintagna nga himuon ni Juan?