Kahulugan sang Balita

Satanismo Nagalapnag

“Ang pagdugang sang Sataniko nga mga ritwal kag kawili sa mabug-at nga metal nga banda sa musika . . . nagapakita sang pagsilabo sang pagsimba sa demonyo sang mga pamatan-on.” Amo sina ang siling sang The Press Democrat sang Santa Rosa, California. Pila ka butang nga gin-angot sang mga opisyales sa pagsimba kay Satanas amo ang grabe nga pangawat, pagpiang sa mga sapat kag madamu pa nga pagpatay. Ang mensahe kag simbulo ni Satanas, lakip ang numero nga 666, kilala na sa mga panghapin sang album sang plaka kag mga sulatsulat sa dingding. Ano ang pinakadaku nga nagbutong agod pukawon ang mga pamatan-on sa Satanismo? “Ang mga bata nakabaton sang tanan nga sahi sang mensahe sa [mabug-at nga metal] nga musika,” siling ni detektib Dave Daerin sang dibisyon sa kabataan sang Departamento sang San Diego County Sheriff. “May ginhiwat diri nga konsierto diin ang banda may 15,000 ka kabataan nga nagasinggit sing ‘Natas’”—nga amo ang Satan (sa Ingles) pabalik.

Ang pagkaganyat sa kahilwayan isa man ka atraksion. “Masami nga ginahunahuna ko si Satanas subong isa ka kalmado nga matahom mamayo,” paathag sang isa ka estudyante sa hayskul tuhoy sa iya kawili sa Yawa. “Sanglit kontrolado niya ang isa ka bahin sang labaw sa kinaugali, ginapabay-an ka niya nga magkinaugalingon, nga himuon kon ano ang imo luyag, samtang ang Dios may iya kaugalingon nga pagsulundan kon paano ka dapat mabuhi.”

Ini nga padugi—ang ganyat sang hilway nga buhat nga wala ginapunggan sang mapuslanon nga kasugoan sang Dios—ang nagdul-ong sa aton nahaunang ginikanan nga lapason kag lumsan ang tawhanon nga rasa sa 6,000 ka tuig sang dimapaanggiran nga pag-antos. (Genesis 3:4, 5, 13) Ginagamit man karon ni Satanas ini man nga daya, labi na kay nahibal-an niya nga malip-ot na lang ang iya tion. (Bugna 12:12; 2 Corinto 2:11) Yadtong nagabato sa iya mga pagsulay sarang makapaabot nga maagom ang “mahimayaon nga kahilwayan sang mga anak sang Dios.”—Roma 8:21.

Paglikaw sa Kamatuoran

Samtang ginabista sa atubangan sang Romanong Gobernador nga si Pilato, ginsingganan sia ni Jesus: “Tungod sini natawo ako, kag tungod sini nagkari ako sa kalibutan agod nga magsaksi ako sa kamatuoran. Ang tagsatagsa nga yara sa kamatuoran nagapamati sang akon tingog.”—Juan 18:37.

Ano ang reaksion sang mga tawo sa ideya sang relihioso nga kamatuoran? Nagasulat sa The Times sa London, ang Romanong Katoliko nga manunulat nga si Christopher Derrick nagsiling: “Ang bisan ano nga pagsambit sing relihiosong ‘kamatuoran’ nagapakita sang pila ka sahi sang pag-angkon nga nakahibalo; kag walay sapayan nga malayo, walay sapayan nga mataktikanhon, nagapasat-om ini sang posibilidad sang pagkasayop sang iban nga tawo.” Nagdugang sia: “Ang makahaladlok nga mga kamatuoran amo nga kon maghambal ikaw sing relihioso, may buot gid silingon, ginapakita mo nga ayhan may isa nga sayop; kag wala ina sing mahimu.”

Ngaa wala? Bangod ang nagapangibabaw nga panawagan karon amo ang ekumenismo, nga ginalaragway ni Derrick subong “ang sigurado nga balor,” kag nasapwan sang relihioso nga mga lider nga maayo likawan ang tanan nga pagbinahinbahin. Sa amo yara na sa tagsa ka tawo ang magpati kon ano ang “husto” para sa iya. Kamusta naman ang kamatuoran? Si Jesus nagsiling: “Kamo makakilala sang kamatuoran kag ang kamatuoran magahilway sa inyo.” Ang mga namati sa ginsiling niya mapasalamaton nga wala niya pagpalonga ang kamatuoran—nga kinahanglan agod hilwayon sila gikan sa mga tradisyon kag butig nga mga panudlo sang ila relihiosong mga lider nga nagapugong sa ila gikan sa pagtigayon sang kabuhi.—Juan 8:32; Mateo 23:13, 15.

Padayon ang Pagpangita sa Kahawaan

May intelihente bala nga kabuhi sa kahawaan? Ang pagpangita nga ginsugdan sang nagligad nga 25 ka tuig gindugangan karon. “Ang makahalawhaw nga hilikuton, nga nagadalahig sang pagtag-isaisa sa ginatos ka libo ka bituon,” report sang The New York Times, “tubtob sa karon wala sing ginapakita nga maathag nga pamatuod nga nagaluntad ang kabuhi luwas sa duta.” Apang, duha ka obserbatoryo ang nagapangabudlay sing bug-os tion sa pagpangita, subong nga ginapaandar ang bag-o kag mas sensitibo nga mga detektor. Nagapangabudlay sa teoriya nga “ang kabuhi naghalin sa iban nga kalibutan” kag nga “ang iban nga sibilisasyon mahimu nga nagatinguha sa pagpasad sing komunikasyon sa isa kag isa,” isa ka sistematiko nga pagpangita ang ginahimu—bisan pa wala sing malig-on nga kamatuoran ang nagaluntad tuhoy sa ginapuy-an nga mga planeta nga nagalibot sa bituon luwas sa aton adlaw.

Inang daku nga panikasog walay sapayan sinang diutay katama nga pamatuod nagapadaku sang hungod nga pagkahuyog nga indi pagsapakon ang katunayan nga ang extraterrestrial nga kabuhi nga labing mataas ang halintang tunay nga nagaluntad. Ang Dios kag ang iya mga angheliko nga tinuga nagaluntad sa espirituhanon nga duog. Wala lamang ginapamatod-an sang makita nga mga langit ang iya pagluntad kag pagkadios kundi amo man ang nasulat nga giya para sa impormasyon kag instruksion nga ginhatag niya sa katawhan. Biblia lamang ang dapat tan-awon sang tawo agod mahibal-an ang ginhalinan sang katawhan, ang katuyoan sang kabuhi kag palaabuton.—Salmo 14:1; 19:1; 2 Timoteo 3:16, 17.