Mga Kabulig sang Satanismo—Mga Droga kag Heavy Metal nga Musika

SI Carl A. Raschke, direktor sang University of Denver Institute of Humanities, nagsulat: “Indi aksidente lamang nga ang mga droga, heavy metal nga musika, kapintas, kag kasingki nangin amo tanan ang makakulugmat nga mga emblema nga nagawagayway sa ibabaw sang nahapay nga kahimtangan sang katawhan samtang nagapadulong kita sa ikatlo nga dekada sang Dag-on ni Satanas.” Nagsiling man sia: “Sarang mo masiling nga ang heavy metal nga musika para sa estilo-sang-kaugalingon nga Satanismo samtang ang ebanghelyo nga musika para naman sa Cristianismo. Diutay lamang nga mga tawo ang ginakombertir sa Cristianismo paagi lamang sa pagpamati sa ebanghelyo nga musika sa radyo. Apang ang heavy metal tuman ka gamhanan nga bulig. Ginapakamatarong sini ang makangilil-ad nga mga butang nga ginahimo na sang kabataan.”

Isa ini ka mabaskog nga pagpakamalaut sa tuman kadamo nga butang nga ginakabig sang mga pamatan-on karon subong normal lamang nga mga dibersion gikan sa makapabalaka nga mga butang sang kabuhi​—ang heavy metal nga musika kag ang mga droga. Husto bala ini nga mga panumbungon? Mahimo ayhan nga ang mga droga kag ang heavy metal nga musika posible nga mga sintoma sang Satanismo? Binagbinaga ang mga komento sang mga tawo nga nakasaksi mismo sang kasingki sang mga sumilimba ni Satanas kag sang mga nag-imbestigar sa ila.

“Mahimo indi makapakibot nga ang makapaakig nga mensahe sang heavy metal nga musika, ‘relihioso’​—kay ginadayaw sini ang mas mataas nga gahom nga nagatatap sa uniberso. Apang, ini nga gahom, indi ang Dios,” sulat ni Raschke, sa iya libro nga Painted Black. “Ini . . . ginaplano ni Satanas mismo.” Dugang pa, nagsiling sia: “Ang mga pamatan-on nga wala sing paglaum, kag may nagkunol nga konsiensia, madali mabalani sa gahom kag kasingki sang mga sataniko. . . . Ang dimapahamtang kag ginaabusuhan nga mga pamatan-on, bangod sang kalautan nga ila naeksperiensiahan sa maaga nga bahin sang ila kabuhi, nagapati nga ang Mas Mataas nga Gahom amo gid ang malaut. Ginapalig-on sang heavy metal ini nga ‘teologo’ kag ginapabakod ini sa musika.”

Suno kay Dr. Paul King sang University of Tennessee, nga nagtestigo sa atubangan sang Senado sang Estados Unidos nahanungod sa heavy metal nga musika, ang musika nga ginapasulabi sang kalabanan sang di-mapahamtang nga mga pamatan-on amo ang may “dikinaandan nga mga tema sang kasingki, dumot, pagrebelde, malaw-ay nga sekso, pag-abuso sa mga babayi, kag paghimaya kay Satanas. Kon ang estilo sang pagkabuhi sang isa nga nagahinupang nagalakip sing mga droga, mas madali nga maluyagan niya ini.” Ginahimaya kag ginadayaw sang heavy metal nga musika ang gahom sang malaut, siling ni King. Sa heavy metal nga musika, “ang kalautan ginahimaya sing labi pa sa tion sang mga konsierto,” siling niya.

Binagbinaga ang mga bunga sang makapulukaw nga mensahe sang heavy metal sa masunod nga mga hitabo.

Sa New Jersey, E.U.A., sang nagligad nga tuig, mapintas nga ginpatay sang duha ka 15-anyos nga mga pamatan-on nga lalaki si Princess nga ido nga Labrador sang isa ka pamilya. “Isa yadto ka halad para kay Satanas,” siling nila. Ginbitay nila ang ido sa iya kadena, ginsipa sia tubtob napatay, ginlalas ang iya dila kag gingamit ini sa isa ka sataniko nga rito. Gintuhog nila ang pilason nga lawas sang ido sing isa ka daku nga metal nga kaw-it kag ginpakabit ini sa ugsaran sang isa ka kaingod. Nasapwan ang sataniko nga mga marka sa ulo sang ido, kag ang pentagram (isa ka lima-taliwis nga bituon sa sulod sang tipulon​—isa ka Sataniko nga simbulo) nga nadibuho sa duta sa ubos sang lawas sang ido. Sang gab-i sang pagpatay, nagapamati sila sa Deicide (nga nagakahulugan sing pagpatay sang Dios), isa ka death metal nga banda, diin ang nagapanguna nga manugkanta nagapabugal sang pagpaantos kag pagpatay sa mga sapat.

Sa California, ang duha ka magnobyo, nga, suno sa ila mga abyan, nagsalimuang sa pagsimba kay Satanas, mapintas nga nagpatay sa iloy sang babayi paagi sa pagbuno sa iya kag paglampos sa iya sing tubo. Sa amo man nga duog, isa pa ka pamatan-on ang nangamuyo kay Satanas kag dayon gintiro niya ang iya amay. Ang pulisiya nga nagaimbestigar sa krimen nakombinsi nga ang dapat basulon amo ang heavy metal nga musika. “Ang matuod, ang musika nagatudlo nga indi ka dapat mamati sa imo mga ginikanan, kag dapat ikaw magkabuhi suno sa luyag mo,” siling sang isa ka pulis nga awtoridad.

Sa Inglaterra, ang mga biktima sang paagisod nga pagpanglugos sang isa ka gang, nagreport sa pulisiya nga ang isa sa mga manuglugos may pika nga tanda sang isa ka heavy metal nga banda nga ang ila mga liriko nagaunod sing mga mensahe tuhoy sa paglugos kag kasingki.

Sa Arkansas, E.U.A., nagtinguha ang isa ka taga-uma nga tin-edyer nga patyon ang iya mga ginikanan paagi sa pagbatuta sa ila kag dayon guluton sila sing sundang. Nasapwan sang pulisiya sa iya audiocassette player ang isa ka tape nga nahanda na agod patokaron ang isa ka kanta sang heavy metal nga banda nga, “Altar of Sacrifice,” nga ang mga liriko sini nagasinggit: “Nagahulat ang mataas nga saserdote, nagauyat sing daga, nagapaagay sang dugo sang isa ka ulay nga babayi. Pagpatay ni Satanas, seremonyal nga kamatayon, sunda ang tanan niya nga sugo. Magsulod sa ginharian ni Satanas . . . Tun-i ang balaan nga mga pulong sang pagdayaw, ‘Dayawa si Satanas.’ ”

Tuhoy sa mga liriko sang iban pa nga mga kanta nga ginakanta sang nagasinggitan nga mga katapo sang heavy metal nga mga banda​—sa masami ginasunodsunod sang ila mga humalangad sa mga konsierto sa magaris nga pag-inudyak, ukon ginapamatian sa audiocassette nga mga tape sa sulod sang mga inoras​—ano ang impluwensia sini nga mga mensahe sa dalal-on nga mga pamatan-on? Binagbinaga, halimbawa, ining mga liriko: “Si Satanas nga aton agalon sa kalautan nagatuytoy sa aton sa tagsa ka una nga tikang,” kag “Paagaya ang imo dugo, palataya ini sa akon. Uyati ang akon kamot kag buy-i ang imo kabuhi . . . Napaagay mo na ang dugo. Akon na ang kalag mo.”

“Kon ginapatihan naton nga ang pornograpiya makapukaw sa isa ka manug-abuso sa bata,” sulat ni Carl Raschke, “ngaa indi binagbinagon ang ideya nga ang mga liriko nga nagasinggit sing patya, utda, pianga, paantusa, papasa makatiklod sa isa ka buangbuang nga himuon ina gid nga mga buhat?”

Ang mga mananalawsaw bisan diin nagapati nga ang pag-abuso sa droga kag Satanismo magkaupod. Ang isa anay ka detektib batok sa mga bisyo nga si David Toma nanganduhoy nga “wala pa gid sia sing nasumalang nga isa ka sumilimba ni Satanas nga wala nagadroga.” Ang paggamit sing droga, report sang magasin nga ’Teen, nagapagrabe sang kahimtangan para sa mga tin-edyer “nga nagaliso sa pagsimba sa yawa, nagapabudlay sa iya sing dugang pa nga makilala kon ano ang matuod gid kag kon ano ang daw matuod lamang tan-awon kon yara sa idalom sang impluwensia sang mga droga kag alkohol.”

“May kaangtanan ang heavy metal sa lakas nga paggamit sing droga kon paano nga ang mga loterya may kaangtanan sa masupog nga mga sugarol,” siling ni Raschke. “Ang mga nagahinupang nga nagasandig sa kemikal nagapili sing isa ka estilo sang pagkabuhi nga matinaastaason, mapintas, kawatan kag nagapasobra sa sekso​—ini tanan ginapabaskog pa sang pagsinggitan sang metal nga mga grupo.”

Sa wala sing duhaduha, ang isa ka pamatan-on madali nga mabiktima ni Satanas kon ang kaligdong ginahaw-as sa iya utok kag ginabuslan sang tiko kag masingki nga mga panghunahuna.

[Blurb sa pahina 8]

Ang isa madali nga mabiktima ni Satanas kon ang kaligdong ginahaw-as gikan sa utok kag nagasulod ang katikuan kag kasingki

[Retrato sa Pahina 7]

Ano ang ginapasulod ninyo sa inyo hunahuna?