“Ang Tion nga Nabilin Ginpalip-ot”

1. Ngaa ginahunahuna sang iban nga diutay na lamang ang tion para sa katawhan?

DIUTAY na lamang ang tion para sining sistema sang mga butang. Ang isa ka rason kon ngaa ang iban nakalab-ot sa sining konklusion amo nga ang pagluntad mismo sang tawo nabutang sa katalagman. Ti, tuman gid kalapit ang nuklear nga kahapayan amo kon ngaa masiling nga “tatlo na lamang ka minutos kag magtungang-gab-i”!

2. Ano ang ginsiling sang isa ka dyurnalista tuhoy sa nuklear nga katalagman?

² Nagasulat sa topiko nga “Ang landing sang Bomba,” ang Australiano nga dyurnalista nga si Nick Brash nagsiling: “Ang isa ka dinamita nga nagabug-at sing tunga ka kilo bastante na sa pagpawasaag sa tawo. Apang ang tinago nga nuklear katumbas karon sa apat ka tonilada ka dinamita sa kada tawo, babayi kag bata sa duta. Kapin sa $500 bilyones ang ginpuhonan sa nuclear nga mga hinganiban kag kapin sa $40 bilyones ang pagagastuhon sa mga hinganiban sa palibot sang kalibutan sini nga tuig [1983]. Makahalawhaw ini nga kadamuon sang sobra nga pagpatay. Katumbas ini sang pagpiswit sa isa ka lamok sing 10 ka lata sang [hilo] Mortein.”—The Sun Weekend Magazine (Melbourne, Australia), Abril 23, 1983.

3. Ano ang masiling tuhoy sa posible nga mga epekto sang nuklear nga inaway?

³ Mabudlay handurawon ang posible nga epekto sang nuklear nga inaway. Luwas sa kamatayon sang ginatos ka milyon, sa pagkatabo sang tugob-globo nga inaway, sa epekto sa ekolohiya kag iban pa, yara man ang mabudlay patihan nga kagamo sa sosyal, politikal kag ekonomiko nga hilikuton sa bug-os nga duta. Sa katunayan, si Dr. Brian Martin, isa ka pisista kag mananalawsaw sa Australian National University, nagbaton: “Wala sing nahibal-an nga mapaktan nga may pagsalig ang bug-os tugob-globo nga epekto sang nuklear nga inaway.”

4. (a) Ngaa makasiguro kita nga ang katawhan indi papason sa isa ka nuklear nga kahapayan? (b) Paano naton nahibal-an nga diutay na lamang ang tion para sa karon nga sistema sang mga butang?

⁴ Daw madulom matuod ang palaabuton. Apang dumduma, mga mahigugmaon sa Dios! Bisan pa diutay na lamang ang tion para sa karon nga Sistema sang mga butang, indi pagalaglagon sang tawo ang iya kaugalingon sa magamo nuklear nga kahapayan. Makapat-od kita sina, kay si Jehova, “ang naghuman kag naghimu” sang duta, “wala magtuga sini subong magumon, ginhuman niya ini agod puy-an.” (Isaias 45:18, (Byington) Sa pagkamatuod, agod luwason ang katawhan gikan sa sining kalaglagan, ang gilayon labaw sa tawo nga buhat dapat nga himuon agod tapuson ining Sistema, kag ang iya man nuklear nga pagkabuang. Sing malipayon, ang Manunuga sang planeta nga Duta kag sang katawhan magalaglag sa dili madugay sining malaut, mahikugon nga sistema. Malip-ot na lamang ang iya tion bangod “ang dakung adlaw ni Jehova” malapit na! (Sofonias 1:14-18) Apang, daw ano ka makapaumpaw mahibal-an nga sa sining madasig nagapakari nga adlaw sang paghusay, ‘amligan ni Jehova ang tanan nga nagahigugma sa iya, apang laglagon niya ang tanan nga mga malauton’!—Salmo 145:20.

Daw Ano ka Daku nga Tion ang Nabilin?

5. Suno sa Bugna 6:9, 10, sa ano interesado makahibalo ang hinaplas nga mga sumulunod ni Jesus?

⁵ Walay duhaduha nga magahulag ang Dios batok sa iya mga kaaway. Apang daw ano kalawig antes niya tapuson ining malaut nga sistema sang mga butang kag pahanabuon ang iya Bag-ong Kahimusan sang paghidait kag pagkamatarong? Mahimu nga isa ikaw ka saksi ni Jehova nga maluyag mahibal-an ang sabat sa sina nga pamangkot. Sa sini nga bahin, subong sang ginpatay nga hinaplas nga mga Cristiano nga ginrepresentar sa Bugna nga nagsinggit ang imo balatyagon: “Tubtob pa bala san-o, O Soberanong Ginuo nga balaan kag matuod, nga hukman mo kag balusan ang amon dugo sa mga nagapuyo sa duta?” (Bugna 6:9, 10) Huo, sing malaragwayon luyag mahibal-an sadtong mga hinaplas kon san-o timalusan sang Dios ang ila dugo. Indi katingalahan nga ang tanan nga mga Saksi ni Jehova karon malangkagon nga nagahulat sa “inaway sang dakung adlaw sang Dios nga Labing gamhanan” sa Har-Magedon!—Bugna 16:14-16.

6, 7. (a) Nahanungod sa tion, ano ang ginsiling ni Pablo sa 1 Corinto 7:29? (b) Anong ginsiling ni Pedro ang nagapadaku sa katunayan nga ining sistema may malaglagon nga katapusan?

⁶ Yadtong mga hinaplas nga mga saksi nga ginpatulo ang dugo bangod sang ila katutom kay Jehova yara sa linya nga makabaton sing balus, kay ang kasaysayan sang Biblia nagasiling: “Ginhatagan ang tagsa sa ila sing malaba nga panapton nga maputi; kag ginsilingan nga magpahuway sila anay sing diutay nga tion, tubtob nga matuman ang kadamuon sang ila masigkaulipon kag mga kautoran nga patyon subong sa ila.” (Bugna 6:11) Makapat-od kita nga ang Dios magapanghikot sa iya gintangdo nga tion. Sa katunayan, ang pinamulong ni apostol Pablo sa 1 Corinto 7:29 nagakaigo gid. Maathag nga ginsingganan niya ang mga masigkatumuluo: “Ang tion nga nabilin ginpalip-ot.”

⁷ Ang pinamulong ni Pablo wala lamang magpalig-on sa modernong-adlaw nga alagad ni Jehova kundi magpakita man nga ang kabuhi sang mga Cristiano dapat ihugod sa hilingagawon nga hilikuton nga gintangdo sang Dios sa ila. Sing kaanggid, si apostol Pedro nagsulat: “Ang katapusan sang tanan nga butang malapit na.” (1 Pedro 4:7) Nahibal-an ni Pedro nga ining sistema gintangdo nga matapos sing malaglagon. Amo ina ang aton ginapadulongan!

8. Ano ang epekto sa katawhan ni Jehova sang katunayan nga ang katapusan sining sistema malapit na?

⁸ Ginpadaku nanday Pablo kag Pedro ang katunayan nga ining sistema sang mga butang ginpamatbatan. Amo ini ang indi dapat pagkalimtan sang matuod nga mga Cristiano. Ang katapusan magaabot sa aton adlaw, kag ang tanan nga pamatuod nagapakita nga tuman na gid ini kalapit. Gani, sa adlaw-adlaw ang aton pagkabuhi dapat magpakita sina nga pagtuo. Dugang pa, ang katunayan nga nagapadulong kita sa ulihi nga mga adlaw sining sistema magapuno sa aton sing determinasyon nga himuon ang aton bug-os nga masarangan sa maayo kag tuman ka hilingagawon nga hilikuton nga pagbantala sang maayong balita subong natinloan kag makugi nga mga saksi ni Jehova.—Tito 2:13, 14.

Malayo Na sa “Panag-on sang Katapusan”

9. Sa kabilogan sa diin masaku ang katawhan, kag natabo na bala ini anay?

⁹ Gintagna ni Jesucristo nga sa iya dimakita nga presensia ang mga tawo mangin masaku sa mga hilikuton sa kabuhi. Tublagon sila, subong sang mga tawo sa adlaw anay ni Noe kag Lot. “Mangin amo man ini sa adlaw nga ipahayag ang Anak sang tawo,” siling ni Jesus, nagapatuhoy sa panahon sang iya dimakita nga presensia, kon ang malaut nga sistema pagalaglagon.—Lucas 17:26-30.

10, 11. Ano nga pamatuod ang ginrepresentar diri agod ipakita nga ang katapusan sining sistema malapit na?

¹⁰ Binagbinaga man ang mga tagna nga narekord sa Mateo 24, Marcos 13 kag Lucas 21. Gintagna ni Jesus ang mga butang nga indi gid kontrolado sang tawo—mga butang subong sang kamatay kag dalagkung mga linog. Dugang pa, yara ang “nagadugang nga pagkamalinapason” kutob sang 1914. Ang mga balita karon, labi na sa dalagkung mga siudad, isa na lamang ka report tuhoy sa krimen kag kalautan. May labi pa sang sa sining nagadugang nga estadistika sa krimen, kay ang espiritu sang dipagtahod sa legal nga mga pagdumili nagapangibabaw karon, kag ang gugma sang kalabanan nagabugnaw.—Mateo 24:12.

¹¹ Dugang pa, maathag karon ang “kalisang sang mga pungsod” bangod ang mga tawo wala makahibalo sang dalan paguwa tuhoy sa ila madamung mga kabudlayan. (Lucas 21:25, 26) Subong man, nagadiutay na ang kadamuon sadtong ‘sining kaliwatan’ sang 1914, nga indi magataliwan antes ang katumanan sang tanan nga gintagna ni Jesus sa aton tion. (Mateo 24:34) May isa pa ka maathag nga tanda nga ang katapusan sining sistema malapit na.

12. Walay duhaduha, ano ang pinakadakung pamatuod nga malayo na kita sa “panag-on sang katapusan”?

¹² Madamung dugang nga pamatuod ang mahatag agod pamatod-an nga malayo na kita sa “panag-on sang katapusan.” (Daniel 12:4) Apang walay duhaduha nga ang pinakadakung pamatuod nga malapit na kita sa katapusan sining sistema amo ang bug-os kalibutan nga hilikuton sa pagbantala sang Ginharian nga ginahimu sang mga Saksi ni Jehova. Wala pa gid anay nga ang subong sini natabo. Sa pagkamatuod, sa 205 ka kadutaan sa palibot sang globo kapin sa 2,650,000 ka saksi ni Jehova ang makugi nga nagabuhat sang maayong buhat sang pagpalapnag sa makalilipay nga mensahe nga si Cristo nagagahom na sa Ginharian kutob sang 1914. Kag ginpahayag ni Jesus nga kon ining maayong balita sang Ginharian naibantala sa tanan napuy-an nga duta, ugaling “magaabot ang katapusan.”—Mateo 24:14.

Pagkabuhi Nahisuno sa Laygay sang Biblia

13. Paano naton dapat tamdon ang ginsiling ni Pablo nga ‘ang mga may asawa magpuyo subong nga walay asawa’?

¹³ Bangod ang nabilin nga tion maathag nga ginpalip-ot kag ang katapusan malapit na, ang katawhan ni Jehova dapat magkabuhi nahisuno sa laygay sang Biblia, subong sang ginsiling ni apostol Pablo sa 1 Corinto 7:29-31. Pagkatapos mahambal nga “ang tion nga nabilin ginpalip-ot,” nagsulat sia: “Kutob karon ang mga may asawa magpuyo subong nga walay asawa.” Indi diri buot silingon sang apostol nga pabay-an sang Cristianong bana ang iya asawa. Indi, kundi samtang matutom nga ginaatipan sang lalaki ang iya mga responsabilidad sa pag-asawahay, dapat niya unahon sa tagipusuon kag hunahuna ang iya kaangtanan sa Dios, nagatinguha nga ang iya pag-asawahay nagaamot sa sini.

14. Suno sa 1 Corinto 7:30, paano ginatamod sang mga manugbantala sang Ginharian ang personal nga mga problema, kag iban pa?

¹⁴ Sa Bersikulo 30, si Pablo padayon nga nagsiling: “Ang mga nagahibi subong nga wala sila nagahibi, kag ang mga nagakalipay subong nga wala sila nagakalipay, kag ang mga nagabakal subong nga wala sila nagaangkon sini.” Ano ang buot silingon sini? Ining inspirado nga pinamulong nagapakita sa katunayan nga ang personal nga mga bagay, nagadalahig man ini sa mga pagkabutang, mga kasubo ukon kalipay, indi amo ang dalagkung butang para sa mga ministro sang Ginharian. “Ang tion kag ang kahigayonan” nagakahanabo sa aton tanan kag sarang magabag-o sing hinali sang aton kahimtangan. (Manugwali 9:11; Santiago 4:14) Gani indi maalamon nga magmasaku sa mga kasubo, mga kabudlayan kag nanuhaytuhay nga personal nga mga problema amo kon ngaa ining mga kabalaka serioso nga magaupang sa aton ministeryo, sa aton pribilehiyo nga hilikuton sang pagbantala sang maayong balita sang Ginharian.

15. Ngaa kabuangan gid para sa isa ka Cristiano nga mag-ukod sa personal nga mga bagay nga nagadalahig sa materyal nga mga pagkabutang, kag iban pa?

¹⁵ Sa 1 Corinto 7:31, si apostol Pablo nagsiling: “[Tugoti] yadtong nagagamit sa kalibutan nga [mangin] subong sang wala nagagamit sini sing bug-os.” Bangod ang mga tawo sang kalibutan wala sing napasad sa Biblia nga paglaum, napun-an sila sing mga panghunahuna tuhoy sa ila matag-adlaw nga mga kinahanglanon kag mga ambisyon. Sing masami ginatinguhaan nila nga pahamut-an ang iban paagi sa materyal nga mga pagkabutang. Apang, subong sang gin-athag ni Pablo, “ang bugal sang kabuhi” isa pa ka pagpadayag nga “ang tanan nga butang sa kalibutan” “wala maghalin sa Amay kundi sa kalibutan.” Kag ginapasalig kita ni Juan nga “ang kalibutan nagataliwan kag amo man ang kailigbon sini, apang ang nagahimu sang kabubut-on sang Dios magapabilin sing dayon.” (1 Juan 2:16, 17) Gani, binuang gid para kay bisan sin-o nga Cristiano, nga nagalaum sing kabuhi nga walay katapusan, ang magmasaku sa personal nga mga bagay amo kon ngaa wala na sia sing tion nga nabilin para sa intereses sang Ginharian. (Mateo 6:25-32; ipaanggid ang Filipos 2:19-22; 2 Timoteo 4:10) Bisan pa indi nagakaigo nga agumon ang materyal nga mga pagkabutang kag ang pila ka maayong kalipayan, indi gid naton dapat pahanugotan ining mga butang nga mangin sentro nga butang sang aton kabuhi.—Lucas 12:15.

16. Ano sa masami ang panimuot kag tulumuron sang kalibutanon nga mga tawo, apang ano dapat ang pinakaimportante sa mga alagad ni Jehova?

¹⁶ Kinaandan na para sa mga kalibutanon, ukon sadtong wala sing matuod nga espirituwalidad, ang magreklamo nahanungod sa nadangatan sang ila kabuhi. (Ipaanggid ang Judas 16.) Kon sila masakiton, pirme sila magareklamo nga indi maayo ang pamatyag. Sing kaanggid, ang imol nagareklamo bangod indi sila manggaranon. Ti, ang mga butang subong sang maayong panglawas kag dakung manggad mahimu mangin nagakuha sing daku nga tion nga tulumuron sa ila kabuhi! Magapanikasog sila nga tigayunon ini, kag kon indi mahimu nga magkasubo sila sing tuman. Apang para sa dedikado nga katawhan ni Jehova ang “balaan nga pag-alagad” amo ang pinakaimportante. (Roma 12:1, 2) Matuod, bisan pa nga alagad kita ni Jehova, may mga problema kita nga atubangon. Apang wala ini nagahimu sa aton nga mga palareklamo, mga palakumod tuhoy sa nadangatan sang aton kabuhi. May hatag-Dios nga hilikuton kita nga himuon, kag ginahatagan naton sing una nga igtalupangod ining ginpakamaayo nga hilikuton. Sa pagkamatuod, malipayon kita bangod ginauna naton sa kabuhi ang intereses sang Ginharian.—Mateo 6:33.

17. Tuhoy sa posible nga mga sablag, ano dapat ang indi pagpahanugotan sang katawhan ni Jehova?

¹⁷ Ano nian, ang maalamon nga kurso para sa mga alagad ni Jehova? Bueno, sarang naton magamit ang pila ka butang kag mga serbisyo nga ginaaman sang kalibutan, apang indi gid naton pahanugotan ang mga sablag nga magapatalikod sa aton gikan sa pag-alagad sa Dios. (Lucas 21:34-36) Dumduma nga wala sa karon nga sistema ang permanente. Ang pagkamabaylobaylohon sini sarang mangin tuboran sang sablag. Huo, subong sang ginsiling ni Pablo, “Ang dagway sining kalibutan nagataliwan.” (1 Corinto 7:31) Apang indi naton dapat pahanugotan ini nga magaupang sa aton gikan sa pag-alagad kay Jehova.

Himoa ang Hilikuton sang Ginuo sing Maukod

18. (a) Sanglit yari na kita sa “panag-on sang katapusan” kutob sang 1914?, sa anong hilikuton dapat naton pun-on ang aton kabuhi? (b) Kon magpabilin kita nga masaku sa hilikuton sang Ginuo, ano ang mahimu nga matabo sa mga problema sa kabuhi?

¹⁸ Nakahantup sa espirituwal, ginakilala naton ang madamu nga pamatuod nga yari na kita sa “panag-on sang katapusan” kutob sang 1914. Kon amo, indi gid naton luyag gamiton sing bug-os ang kalibutan subong nga daw may mawasi kita kon indi naton himuon ina. Sa baylo, pun-on naton ang aton kabuhi sang “hilikuton sang Ginuo.” Dapat kita nga ‘bugana sing hilimuon sa hilikuton sang Ginuo, nakahibalo nga indi nga walay pulos ang aton pagpangabudlay sa Ginuo.’ (1 Corinto 15:58) Gani mag-ukod sa pagbantala kag pagtudlo sa kamatuoran sang Ginharian. Kon amo ano ang matabo sa mga problema sa kabuhi? Ti, mapahigad sila kag mangin indi importante, indi makalilibog!

19. Ano ang buot silingon sang ‘magbatas tubtob sa katapusan’?

¹⁹ Sang naghatag sang iya dakung tagna nahanungod sa ulihi nga mga adlaw sining sistema, nagsiling si Jesus nga ang iya mga sumulunod “pagadumtan sang kalibutan” tungod sang iya ngalan. “Apang,” dugang niya, “sia nga nagabatas tubtob sa katapusan maluwas.” (Marcos 13:10-13) Para sa aton subong mga indibiduwal nga dedikado kay Jehova, ang “katapusan” mahimu nga amo “ang konklusion sang sistema sang mga butang” ukon ang aton mismo kamatayon, ayhan sa tapos mag-antos sa kamut sang mga manughingabot. (Mateo 24:3) Ano man ang matabo, limitado ang aton tion nga himuon ang hilikuton sang Dios. Busa, indi bala kita mangin maukod kag makugi sa pagbantala sang mensahe sang Ginharian? Walay duhaduha, dapat gid!

Tion Na para Maghulag!

20. Paano ginpakita sang mga Israelinhon nga ginhilway gikan sa Babilonia ang ila kabalaka sa pagsimba kay Jehova?

²⁰ Sang ang Judiyong mga tinapok ginhilway gikan sa pagkabihag sa Babilonia sang ikan-um nga siglo B.C.E., dapat sila mamat-od. Magabalik bala sila sa ila dutang natawhan kag ipasag-uli ang pagsimba ni Jehova didto, ukon magapabilin bala sila sa Babilonia? Ang mga Israelinhon nga nagpabilin sa sina nga siudad indi gid man mga malauton, kay ang tigulang nga si Daniel isa sa ila. Sarang nila mahatagan ang nagbalalik nga nagkalabilin sing materyal kag moral nga suporta kag sarang man makapadala sing “boluntaryo nga dulot” para sa balay ni Jehova sa Jerusalem. (Esdras 1:2-4) Sa amo sarang sila makabulig agod pauswagon ang matuod nga pagsimba. Daw ano ka malipayon siguro ang tanan nga mga sumilimba ni Jehova samtang ang nagkalabilin nagbalik na sa ila dutang natawhan, nga dala ang balaan nga mga gamit agod gamiton sa templo ni Jehova! Kag ang mga nagdala sang mga gamit sang santuaryo dapat magasiguro nga gintinloan nila ang ila kaugalingon sang tanan posible nga kadagtaan sang relihioso kag moral nga kahigkoan sang Babilonia.—Isaias 52:11.

21. (a) Anong mga pamangkot ang ginpresentar agod imo binagbinagon? (b) Sanglit “ang tion nga nabilin ginpalip-ot,” ano ang matuod sa mga kahigayonan nga ipalapnag ang maayong balita?

²¹ Subong man bala ikaw nga nabalaka sa matuod nga pagsimba sa sadtong ginhilway nga mga Israelinhon mga 25 ka siglo na ang nagligad? Ginakabig mo bala nga malipayon nga pribilehiyo ang maghimu sing balaan nga pag-alagad kay Jehova subong bahin sang natinloan kag makugi nga organisasyon nga nagapadungog sa iya balaan nga ngalan? Sarang mo bala mahantupan ang madamung mga pamatuod nga nagakabuhi kita malayo na sa “panag-on sang katapusan”? Kon huo ang imo sabat sa sining mga pamangkot, nian siguraduha nga ginahimu mo ang positibo nga aksion karon mismo. Magkonsentrar sa pag-una sang intereses sang Ginharian sa imo kabuhi. Sanglit “ang tion nga nabilin ginpalip-ot,” mas daku pa gid ang importansia sang aton karon kahigayonan nga ipalapnag ang maayong balita. Bulahan ang tanan nga nagahugod sang ila kabuhi palibot sang Ginharian subong matutom nga mga saksi ni Jehova nga madamu sing hilimuon sa pagbantala sang maayong balita samtang may tion pa!

Ano nga Sabat ang Ihatag Mo?

◻ Ngaa diutay na lamang ang tion para sa sining sistema sang mga butang?

◻ Paano naton nahibal-an nga malayo na kita sa “panag-on sang katapusan”?

◻ Kon magmasaku kita sa hilikuton sang Ginuo, ano ang mahimu matabo sa mga problema?

◻ Sanglit malapit na ang katapusan, sa palibot sang ano naton dapat ihugod ang aton kabuhi?