Natinloan kag Makugi sa Maayong mga Buhat

‘Ginhatag ni Jesucristo ang iya kaugalingon sa pagtinlo nga sa iya kaugalingon sang katawhan nga iya, nga makugi sa maayong mga buhat.’—TITO 2:13, 14.

1. Ngaa ang mga saksi ni Jehova dapat mangin matinlo kag makugi?

SI Jehova balaan, maayo kag matadlong. Nahimu man niya kag sang iya Anak ang pinakamaayo nga buhat nga may kakugi. (Levitico 19:2; Salmo 25:8; Juan 5:17) Gani, ang tanan nga mga Saksi ni Jehova dapat mangin matinlo kag makugi sa maayong mga buhat.

2. (a) Paano gin-angot ni apostol Pablo ang katinlo sa kakugi? (b) Anong mga pamangkot ang pagabinagbinagon karon?

² Ginsambit ni apostol Pablo ang katinlo kag kakugi sang nagsulat sia nga paagi sa dibagay nga kaluoy sang Dios si Jesus “naghatag sang iya kaugalingon tungod sa aton sa pagtubos sa aton gikan sa tanan nga kalautan kag sa pagtinlo nga sa iya kaugalingon sang katawhan nga iya, nga makugi sa maayong buhat.” (Tito 2:11-14) Ano ang kinahanglan para sa mga gintinloan ni Jesus? Sa anong maayong mga buhat dapat kita magmakugi? Kag anong mga pagkamaayo ang ginaagom sang natinloan kag makugi nga mga saksi ni Jehova?

Importante nga Espirituwal nga Katinlo

3. (a) Anong talaksan sang katinlo ang dapat huptan sang mga alagad ni Jehova? (b) Paano ginpadaku ang pagkinahanglan sing katinlo sng ginhilway gikan sa Babilonia ang Judiyong mga tinapok?

³ Dapat huptan sang mga alagad ni Jehova ang mataas nga talaksan sang katinlo sa pisikal, moral kag espirituwal. (Exodo 30:17-21; Deuterononomio 23:12-14; Efeso 5:25-27; 2 Corinto 7:1) Ining sadsaran nga punto ginapadaku sang ikan-um nga siglo B.C.E., sang ginhilway ang Judiyong mga tinapok gikan sa Babilonia. (Esdras 1:1-4) Sa dili madugay magapauli sila sa ila dutang natawhan, nga nagadala sing malipayon sang balaan nga mga gamit nga ginkuha ni Hari Nabokodonosor gikan sa templo sang Dios sa Jerusalem. Daw ano ka importante nga yadtong mga gamit sa santuaryo dal-on lamang sang matinlo nga mga sumilimba ni Jehova! Sing nagakaigo nian, ginsingganan sila: “Halin kamo, halin kamo, guwa kamo gikan diri, dili kamo magtandog sang butang nga dimatinlo; guwa kamo gikan sa tunga niya, paninloi ang inyo kaugalingon, kamo nga nagadala sang mga gamit ni Jehova.” (Isaias 52:11) Yadtong mga kahigkoan gikan sa relihioso kag kahigkoan sa moral sang Babilonia.

4. Nahisuno sa 2 Corinto 6:14-17, ano ang ginakinahanglan sa tanan nga mga saksi ni Jehova?

⁴ Gin-aplikar ni apostol Pablo ina nga kinahanglanon sa katinlo sa hinaplas nga mga Cristiano nga nagbiya sang Babilonia nga Daku, ang bug-os kalibutan nga imperyo sang butig nga relihion. Nagsulat sia: “Dili kamo magpagota sing linibagon upod sa mga dimatinuohon. Kay ano bala ang pag-updanay sang pagkamatarong kag kalautan? . . . ‘Busa guwa kamo sa tunga nila kag magpain kamo gikan sa ila,’ siling ni Jehova, ‘kag dili kamo magtandog sang dimatinlo nga butang.’” (2 Corinto 6:14-17; Bugna 18:4, 5; Jeremias 51:45) Sa pagkamatuod, ginapangayo ni Jehova ang espirituwal nga katinlo sa hinaplas nga mga sumulunod ni Jesus kag sa ila mga kaupdanan, ang “dakung kadam-an.”—Bugna 7:4-9.

Isikway ang Pagkadidiosnon kag Kalibutanon nga mga Kailigbon”

5. Suno sa 2 Corinto 4:2, ano dapat ang matuod sa aton ministeryo?

⁵ Una, yadtong nagaalagad subong matinlo sa espirituwal nga mga saksi ni Jehova ginpangabay nga “isikway ang pagkadidiosnon kag kalibutanon nga mga kailigbon.” (Tito 2:11, 12) Subong sang ginsiling pa gid ni Pablo: “Nasikway namon ang makahuluya kag natago nga mga paagi, nagadumili kami sang pagdaya ukon sang pagsimbog sang pulong sang Dios, kundi tungod sa kahayagan sang kamatuoran nagapakilala kami sang amon kaugalingon sa kaisipan sang tagsa ka tawo sa atubangan sang Dios.” (2 Corinto 4:2) Kaangay sang apostol, dapat pamatod-an sang karon nga mga Cristiano nga wala sila sing dagta sa ila ministeryo, nga wala sing masumbong nga kalautan ukon balatian sa ila ginahimu. (2 Corinto 8:20, 21; Salmo 101:1-8) Indi sila dapat pagtuytuyan sang kaalam sang kalibutan kag sang makagud, makasasala nga espiritu, ukon nagapahulag nga puersa.—1 Corinto 1:21; 2:12; 3:19; Efeso 2:1, 2.

6. Ano ang sarang himuon kon ginabatoan aton ang mga huyog subong sang kalautan kag dinagakaigo nga undanon nga mga kailigbon?

⁶ Agod matigayon ang ila mga tulumuron, ang mga tawo nga may kalibutanon nga espiritu masami nagaliso sa malain nga mga metodo. Apang kon himuon ini sang nagaangkon nga Cristiano, wala niya ‘pagsikwaya ang pagkadidiosnon’ kag wala sia nagaagom sing pagkasuod kay Jehova. (Hulubaton 3:31, 32) Kag kon ang isa ginagamhan sang dimatinlo undanon nga handum, wala niya ‘pagsikwaya ang kalibutanon nga mga kailigbon.’ (Galacia 5:19-21; 1 Juan 2:15-17) Apang kamusta kon aton ginasumpong ang dimakasulatanhon nga mga huyog subong sang kalautan kag indi nagakaigo undanon nga mga kailigbon? Nian nagakaigo nga mangamuyo subong sang ginhimu ni David, nga nagsiling: “Tugaha sa akon, O Dios, ang kasingkasing nga matinlo, kag bag-oha ang matarong nga espiritu sa sulod nakon. Dili ako pag-isikway gikan sa atubangan mo; kag dili pagkuhaa sa akon ang imo balaan nga espiritu.” (Salmo 51:10, 11; Juan 15:19) Kon mangamuyo kita sa sinang paagi kag himuslan sing bug-os ang bulig nga matigayon paagi sa Pulong, espiritu kag organisasyon sang Dios, matadlong naton ang aton panghunahuna kag makaalagad sing matutom subong matinlo nga mga sumilimba ni Jehova.

7. Ngaa ang dimahinulsulon nga mga makasasala dapat i-disfellowship?

⁷ Kon ang iban sa aton dimahinulsulon nga magapadayon sang dimatinlo katama nga dalanon, dapat sila i-disfellowship agod ang ngalan ni Jehova indi mapasipalahan, ang iya organisasyon mahuptan nga matinlo kag ang iya matutom nga mga alagad maamligan kag matudok ang pagkagrabe sang serioso nga sala. (Levitico 22:31-33; Deuteronomio 13:6-11) Sang nagligad nga tinuig, narealisar sang katawhan sang Dios nga ang dimahinulsulon nga makasasala indi na nagakabagay nga pakig-updan nila. Halimbawa, sang 1904 ang nahaunang presidente sang Watch Tower Society, nga si Charles Taze Russell, nagsulat: “Kuhaon sang Iglesia gikan sa iya ang pagpakig-upod sa iya kag ang bisan ano kag tanan nga tanda ukon pagpadayag sang paghiliutod.” (The New Creation, pahina 290) Sa karon man, ang katawhan ni Jehova nagatuman sa Makasulatanhon nga laygay nga “kuhaon ang malauton” gikan sa tunga nila.—1 Corinto 5:9-13.

8. Ano ang kahilabtanan sang Lucas 3:8 kag Galacia 6:1 sa kon paano pakig-angotan sang mga gulang ang mga nakasala?

⁸ Ang paghupot nga matinlo sa organisasyon ni Jehova isa ka bagay nga ginakabalak-an sing daku sang gintangdoan nga mga gulang. Sa pagkamatuod, dapat sila mangin maluluy-on kon yara ang ‘mga bunga nga takus sa paghinulsol,’ subong nga si Jehova nagakaluoy kon nagakaigo ini. (Lucas 3:8; Salmo 86:15; 130:3, 4) Kag kon ang masigkatumuluo magahimu sing sayop nga tikang antes sia makamarasmas, dapat tinguhaan sadtong may espirituwal nga kalipikasyon nga tadlungon sia “sa espiritu sang kalum-ok.”—Galacia 6:1.

Kon Paano Makabulig ang mga Gulang

9. Ano ang duha ka paagi nga mabuligan sang mga gulang ang iban nga mga Cristiano sa espirituwal?

⁹ Paano mabuligan sang mga manugtatap ang iban nga mga Cristiano nga magpabilin nga matinlo sa espirituwal? Ang isa ka paagi amo ang paghatag sing makapalig-on nga mga diskurso. Ang isa pa amo ang personal nga pagpakigsugilanon kag pagduaw. (1 Pedro 5:1-4) Sa sina nga tion, nagakaigo nga gamiton sang mga gulang ang Biblia sa pagtudlo, sa pagpahanumdom, sa paglaygay kag sa pagsaway sa mga masigkatumuluo.

10. (a) Ano dapat ang panimuot sang mga gulang sa pamulongpulong publiko? (b) Ngaa ang espirituwal nga mga manugbantay dapat mangin mapagsik nga mga estudyante sang Biblia?

¹⁰ Ang kinahanglan nga magtudlo ginpadaku sang ginlaygayan ni Pablo ang iya kaupod nga mga manugpangabudlay nga si Tito nga “Padayon nga itudlo ang nagakaigo nga putling pagtolon-an.” (Tito 2:1) Ang mapainubuson nga Cristianong mga gulang wala nagatinguha sing himaya subong mga manugpamulongpulong publiko kundi nalangkag nga gamiton sing nagakaigo ang Biblia sa pagtudlo. (Hulubaton 25:27) Sing makawiwili, ang presidente anay sang E.U. nga si John Quincy Adams nagsiling: “Sing tinuig akon ginhimu nga batasan nga basahon ang Biblia sing makaisa kada tuig.” Ang tagsa ka hari sang Israel dapat maghimu sing isa ka kopya sang kasugoan sang Dios kag “magabasa sia sini sa tanan nga adlaw sang iya kabuhi.” Ginsunod ni Josue ang amo man nga instruksion. (Deuteronomio 17:14-20; Josue 1:7, 8) Kon wala sing ihibalo nga kinahanglan, paano ina nga mga lalaki sang dumaan nga Israel makahulag sing maalamon ukon makabulig sa iban sa espirituwal? Gani kon isa ikaw ka gintangdoan nga gulang, nabasa mo na bala ang bilog nga Biblia, ayhan sing madamung beses? Sing walay duhaduha magapasangkad ini sang imo ikasarang sa paglaygay sa iban, lakip ang dedikado nga mga Cristiano nga sa ila kaugalingon nagabasa pirme sang Kasulatan. Yadtong nagaalagad subong espirituwal nga mga manugbantay dapat mangin mapagsik nga mga estudyante sang Pulong sang Dios, ang sadsaran para sa “putling pagtolon-an.”

11. (a) Anong Makasulatanhon nga mga pahanumdom ang kinahanglan sang nahaunang-siglo nga mga Cristiano sa Creta? (b) Tuhoy sa Biblikanhon nga mga pahanumdom, sa ano dapat kalipikado ang gintangdan nga mga gulang nga himuon?

¹¹ Ginsilingan man ni Pablo si Tito: “Padayon sila nga pahanumdoma nga magpasakop kag magtuman sa mga pangulohan kag mga awtoridad subong mga gumalahom, nga maghanda sa tagsa ka maayong buluhaton, nga dili maghambal sing malaut nahanungod kay bisan sin-o, nga maglikaw sa pagkamapinuyason, nga magmalulo, kag magpakita sang himpit nga pagtahod ayon sa tanan nga tawo.” (Tito 3:1, 2) Yadtong espisipiko nga mga pahanumdom kinahanglanon sang nahaunang siglo nga mga Cristiano sa isla sang Creta. Sing kaanggid, kon magautwas ang problema karon, dapat nga matudlo sang mga gulang ang nagakaigo Makasulatanhon nga mga pahanumdom. Kag kabay nga pirme kita magpinasalamaton kon ginapatalupangod sa aton ang mga pahanumdom ni Jehova.—Salmo 119:99, 129.

12. (a) Ano ang buot silingon sang paglaygay? (b) Sa anong panimuot dapat ihatag ang laygay?

¹² Ginsilingan man si Tito: “Padayon nga laygayi ang mga pamatan-on nga lalaki nga magmaligdong sa hunahuna.” (Tito 2:6) Ang paglaygay nagakahulugan nga “ipalihug sing makusog; ilaygay ukon ipaandam sing makugi.” (The World Book Dictionary) Bangod sang iya matuodtuod nga gugma kag kabalaka, wala pagpunggi ni Pablo ang kinahanglan nga laygay. Sa katunayan, sarang sia makasiling sa mga gulang sa Efeso: “Magmata, kag pahanumdoma nga sa tatlo ka tuig, gab-i kag adlaw, wala ako mag-untat sa pagpahanumdom [paglaygay] sa kada isa nga may luha.” (Binuhatan 20:31; ipaanggid ang The Riverside New Testament.) Ang karon nga mga gulang nga nagapadayag sang amo man nga panimuot, kag nga nagahatag sing nagakaigo nga pahanumdom ukon laygay, pagpakamaayo matuod sa kongregasyon!

13. (a) Ano ang himuon kon nagasaway? (b) Sa anong panimuot dapat magahatag sing pagsaway ang mga gulang?

¹³ Ginsambit man ni Pablo ang pagsaway, nagapalig-on kay Tito: “Padayon sila nga sabdonga sing matigdas, agod nga magmaayo sila sa pagtuo, nga indi magmatinalupangdon sa patopato nga mga sugilanon nga Jinudiyo ukon sa mga sugo sang mga tawo nga nagasikway sang kamatuoran.” (Tito 1:13, 14) Ang pagsabdong amo “ang pagpatalupangod sa kinabatasan nga indi paghalong upod ang tinutuyo nga tadlungon ukon buligan,” ukon “ang pagpabutyag sang pagkadikahamuot sa” isa ka tawo bangod sang iya pinamulong ukon ginabuhat. (Webster’s New Collegiate Dictionary) Naghambal si Pablo tuhoy sa pagsaway, apang nga may dungganon nga katuyoan—“agod nga magmaayo sila sa pagtuo. Amo man karon, ginalikawan sang mga gulang ang dicristiano nga pagkawalay kaluoy. Indi kasubong sa palareklamo nga mga apostata, wala ginatinguhaan sang matuod nga Cristianong mga gulang nga mangin “agalon” sa pagtuo kag pagkabuhi sang iban nga mga tumuluo kundi magaalagad subong mga manugtatap kag mga masigkamanugpangabudlay para sa ila kalipay, nagabulig sa ila nga magtindog nga malig-on sa ila pagtuo.—2 Corinto 1:24; 1 Corinto 4:1, 2.

14. Ano ang magabulig sa aton agod magapabilin nga matinlo sa espirituwal?

¹⁴ Ang pagpamatuod sa panudlo, pahanumdom, laygay kag sabdong sang Biblia magabulig sa aton nga magpabilin nga matinlo sa espirituwal. Nagahimu ini sa aton nga nagakabagay sa balaan nga pag-alagad sa Dios. Apang sa anong espiritu kita dapat magahimu sina nga pag-alagad?

‘Magmakugi sa Maayong mga Buhat’

15. (a) Paano isaysay ang kakugi? (b) Ano ang painakamaayo nga hilikuton ang sarang himuon sang Cristiano?

¹⁵ Subong organisado nga hubon sang dedikado nga mga Cristiano, ang mga Saksi ni Jehova “makugi sa maayong mga buhat.” Ang kakugi amo ang “kalangkag kag hanuot nga interes sa paghingamo sang pila ka butang.” (Websbter’s New Collegiate Dictionary) Suno sa sulat ni Pablo kay Tito, dapat himud-osan sang tanan nga mga Cristiano ang masangkad nga kadakuon sang “maayong mga buhat.” Halimbawa, ang pamatan-on nga mga babayi dapat mangin putli, mga manugpangabudlay sa balay kag mapinasakupon sa ila mga bana. Dapat si Tito mangin “huwaran sang maayong mga buhat,” wala nagapakita sing kalautan sa iya panudlo, nagagamit sing maayo nga hambal, kag iban pa. (Tito 2:1-14) Sa pagkamatuod, ang pinakamaayo nga buhat nga mahimu sang isa ka Cristiano amo ang pagbulig sa iban nga maton-an ang tuhoy sa Dios kag maalagad Sia. Kon isa ikaw ka saksi ni Jehova, makugi gid bala ikaw sa paghimu sining ‘maayong buhat’? Ang nahaunang siglo nga mga Cristiano nagpasundayag sing kakugi sa pag-ebanghelyo, bisan sa atubang sang paghingabot.—Binuhatan 11:19-21.

16. (a) Ano ang sadsaran nga rason nga yara ang Cristianong kongregasyon? (b) Ano ang ginsiling tuhoy sa ebanghelyo nga hilikuton sang mga Saksi ni Jehova?

¹⁶ Walay sapayan sang paghingabot sa mga Saksi ni Jehova karon, ginapahulag sila sang espiritu sang Dios nga himuon ang hilikuton nga pagbantala sang Ginharian—nga isa ka sadsaran nga rason sang pagluntad sang Cristianong kongregasyon. (Mateo 24:14; 28:19, 20; Isaias 61:1, 2) Kaangay sang dumaan nga mga Cristiano, makugi nila nga ginahimu ang maayong buhat sang pagbantala sang “maayong balit” sa pamalaybalay kag sa iban nga paagi. (Binuhatan 5:41, 42; 20:20, 21) Sa iya libro nga Evangelism, Inc., si G. W. Target nagahinun-anon sang mga metodo sa pagpanaksi nga nagalakip sang “ebanghelismo sa ganhaan” kag nagsiling nga “ginatawag gani ini sang iban nga amo ang pinakakumon nga metodo—labi na pagkatapos sang pinakaulihi nga pagduaw sang mga Saksi ni Jehova. . . . Ang iban nagalagas, apang ang mga Saksi ni Jehova ang nagapanguna sa latagon.” Nahanungod sa paggamit sang literatura pasad sa Biblia, si Target nagbaton: “Sa liwat, ang mga Saksi ni Jehova [amo ang] nagapanguna sa latagon. . . . Kon ipaanggid, . . . diutay lamang nga denominasyon ang nagabalhag sang pang-ebanghelyo nga bagay.” Sa pagkamatuod, ang Cristianong mga literatura nga ginhimu paagi sa bulig sang balaan nga espiritu sang Dios kag matigayon sa mga Saksi ni Jehova sa isa ka kontribusyon nagabulig sa mga katulad-karnero sa bug-os nga duta nga maton-an kag himuon ang balaan nga kabubut-on.

17. Paano mapamatod-an nga ginhimu sang Dios nga madinalag-on ang pagbantala nga hilikuton sang mga Saksi ni Jehova?

¹⁷ Ginhimu ni Jehova nga madinalag-on ang pagbantala nga hilikuton sang dumaan nga mga Cristiano. Sa amo nahuman sa lainlain nga duog ang mga kongregasyon—sa Roma, Corinto, Efeso, Filipos, Colosas, Tesalonica kag iban pa. Sing kaanggid, ginahimu ni Jehova nga madinalag-on ang pagbantala nga hilikuton sang iya modernong-adlaw nga mga alagad, amo kon ngaa nga kapin sa 46,000 ka kongregasyon sang mga Saksi ni Jehova ang makita karon sa bug-os nga kalibutan. Iya sang Dios ang kadayawan sinang makatilingala nga pag-uswag.—Isaias 60:22; 1 Corinto 3:6, 7.

Ang Aton Madamung mga pagpakamaayo

18-20. Ano ang pila ka pagpakamaayo nga ginaagom sang mga alagad sang Dios?

¹⁸ Sa pagkamatuod, madamu ang mga pagpakamaayo kag mga benepisyo sang matinlo kag makugi nga pag-alagad nga ginaagom sang katawhan ni Jehova karon. (Hulubaton 10:22) Halimbawa, subong natinloan nga mga alagad sang Dios, nalipay kita nga pahamut-an sia. (1 Pedro 1:13-16) Ginhilway kita sang balaan nga kamatuoran gikan sa Babilonia nga Daku, ang bug-os kalibutan nga imperyo sang butig nga relihion. (Bugna 18:4, 5) Indi kita mga biktima sang disparatis, kahadlok sa patay kag iban pa. (Manugwali 9:5, 10; Juan 8:32) Ang ‘paghidait sang Dios, nagabantay sang aton mga ikasarang kag painoino.’ (Filipos 4:6, 7, 13) Ang pagtipon sing tayuyon upod sa matinlo nga mga sumilimba nagahatag sa aton sing balatyagon sang kalig-onan, kaangay sang iya sang “panong sa toril.” (Miqueas 2:12) Ang pagpanag-iya sang balaan nga espiritu nagahimu sa aton nga ipasundayag ang bunga sang gugma, kalipay, paghidait, pagbatas, kalulo, kaayo, pagtuo, kalum-ok kag pagpugong sa kaugalingon. (Galacia 5:22, 23) Ginapahalipay gid kita sini nga tanan!

¹⁹ Subong makugi nga mga manugbantala sang Ginharian, ginaalagad naton ang bug-os Uniberso nga Soberano—ang pinakamaayo nga pribilehiyo nga matigayon sang bisan sin-o. Aton ang “balaan nga hilikuton sang maayong balita.” Ti, wala na sing iban pa dutan-on nga panikasog ang nagadala sing mas daku nga kalipay sang sa pagpahayag sang mensahe sang “malipayon nga Dios” kag sa pagbulig sa iban nga mahibaloan ang nahanungod sa iya!—Roma 15:16; 1 Timoteo 1:11.

²⁰ Ang suod nga kaangtanan sa Dios amo ang isa pa sang aton madamung mga pagpakamaayo. Sarang kita makapangamuyo sa iya upod ang pagsalig nga pamatian niya kita. (1 Juan 5:14, 15) Daw ano katahom ang mangin suod kay Jehova! Subong sang ginasiling sang salmista: “Maayo sa akon nga magpalapit sa Dios. Ginhimu ko nga akon dalangpan ang Soberanong Ginuong si Jehova, agod nga masugid ko ang tanan mong binuhatan.”—Salmo 73:28.

21. Tuhoy sa natinloan kag makugi nga katawhan ni Jehova, ano dapat ang aton mangin determinasyon?

²¹ Bangod sang aton madamung mga pagpakamaayo subong natinloan kag makugi nga katawhan sang Dios, nian, mangin determinado kita nga magpabilin nga matinlo sa espirituwal kag magpagsik upod ang diosnon nga kakugi. Kon magpabilin kita nga amo sina, makasiguro kita nga si Jehova magsakdag kag magatuytoy sa aton subong iya mga saksi. Dugang pa, ang katinlo kag kakugi sa balaan nga pag-alagad sa Dios sa sining katapusan nga mga adlaw, paagi sa iya dibagay nga kaluoy, magabukas sing dalan para sa aton nga ihinguyang ang walay katapusan sa paghimu sing matinlo kag makugi nga mga hilikuton sa kadayawan ni Jehova.

Paano Mo Sabton?

◻ Ano ang kinahanglan para sa isa agod mangin bahin sang natinloan nga katawhan ni Jehova?

◻ Paano mabuligan sang gintangdoan nga mga gulang ang iban nga magpabilin nga matinlo sa espirituwal?

◻ Sa anong maayong buhat dapat magmakugi ang katawhan sang Dios?

◻ Ano ang pila ka pagpakamaayo nga ginaagom sang natinloan kag makugi nga mga saksi ni Jehova?