Si Jehova ‘Magapadali Sini’
“Ako, amo si Jehova, magapadali ako sini sa iya tion.”—ISAIAS 60:22.
1. Paano ang panimuot sang katawhan ni Jehova tuhay gikan sa kalibutan ni Satanas, kag ngaa?
KARON, ang kalipay kag kasadya makita indi lamang sa langitnon nga organisasyon ni Jehova kundi sa bug-os man nga organisasyon sang mga Saksi ni Jehova diri sa duta. Tuhay gid katama ang aton kalipay sa kadudulman nga ginaagom sang kalibutan ni Satanas. (Salmo 144:15) May bugana kita nga espirituwal nga pagkaon kag ilimnon, amo kon ngaa kita “magaamba sing malipayon bangod sang maayo nga kahimtangan sang tagipusuon.” (Isaias 65:13-19) Indi kita ignorante sa mga rason sang karon nga krisis sa bug-os nga kalibutan. Ang aton paglaum para sa temprano nga paghilway paagi sa Ginharian sang Dios ginapabakud samtang nakita naton ang mga tagna sang Biblia nga natuman sa dalayon nga pag-isip padulong sa Armagedon. Nahibaloan naton nga ining “inaway sang dakung adlaw sang Dios nga Labing Gamhanan” magaabot sing eksakto sa “gintalana nga tion,” kay ang palanan-awon “magadalidali sa katapusan, kag indi ini magbutig.”—Bugna 16:14, 16; Habacuc 2:3.
2. Ano nga mga kahimtangan ang bugana sa organisasyon ni Jehova, nagadul-ong sa anong pamangkot?
2 Subong sang sa langit, amo man sa duta may yara pagkapermanente sa teokratiko nga organisasyon ni Jehova. Dugang pa, sanglit si Jehova amo ang Tuboran sang dinamiko nga enerhiya, ‘nagadugang sia sing kusog sa mga nagalaum sa iya.’ (Isaias 40:29-31) Ang iya organisasyon buhi sing aktibidad kag dalayon nga nagahulag. (Ipaanggid ang Ezequiel 1:15-21.) Ang 47,869 ka kongregasyon sang mga Saksi ni Jehova sa 203 ka kadutaan sa bug-os nga duta organisado katama nga makaabante sing makugi sa hilikuton sang Ginharian. (Mateo 24:14) Paano nagluntad ining dinamiko tugob-globo nga organisasyon?
3. (a) Paano natuman ang Isaias 60:17 sa modernong tion? (b) Anong kaanggid nga mga kahimusan ang nagdala sing kabuganaan sa panahon sang Biblia?
3 Ang “Organisasyon” amo ang titulo sang mga artikulo nga tolon-an sa The Watchtower sang Hunyo 1 kag 15, 1938. Ginahambalan didto sing malawig ang Isaias 60:17, diin ginsilingan ni Jehova ang iya langitnon nga organisasyon, nga nagasiling: “Sa baylo sang saway magadala ako sing bulawan, kag sa baylo sang salsalon magadala ako sing pilak, kag sa baylo sang kahoy, saway, kag sa baylo sang mga bato, salsalon; kag himuon ko man nga imo mga manugdumala ang paghidait kag imo mga manugsukot ang pagkamatarong.” Nagahunahuna sining mas maayo nga kahimtangan, ang organisasyon ni Jehova sa duta ginpapagsik liwat. Subong nga ang bulawan mas hamili sa saway (kag amo man sa iban pa nga mga materyalis nga ginsambit diri), gani ang teokratiko nga kahimusan nga ginpaathag sang Watch Tower Society sa mga kongregasyon sang katawhan sang Dios sadto anay sang 1938—kag diin ginbaton nila sing bug-os tagipusuon—labi nga ginpakamaayo sang sa iban pa demokratiko nga mga paagi. Makasulatanhon ini. Gin-organisar ini sing maayo nga mahimu ang hilikuton sang Dios, subong nga ang kaanggid nga mga kahimusan nagdul-ong sing kabuganaan sang panahon ni Moises kag sa dumaan nga mga adlaw sang Cristianong kongregasyon.—Exodo 18:25; Binuhatan 6:3-7; Tito 1:5; 1 Pedro 5:1-3.
4. (a) Paano ginpalig-on ang mga Saksi ni Jehova para sa mga pagtilaw sang 1939-45? (b) Ano ang nagpamatuod nga ang pagpakamaayo ni Jehova yara sa sinang teokratiko nga kahimusan?
4 Busa, sang 1938, isa ka tuig antes sang pagdabdab sang Inaway Kalibutanon II, ang “mga manugdumala” kag “mga manugsukot” sang bug-os nga kongregasyon nangin “paghidait” kag “pagkamatarong.” Ang makusog, nahiusa nga organisasyonal nga kahimusan nag-abante nga may mabungahon nga pagdugang. Ginpakamaayo ni Jehova ang iya nahiusa nga mga Saksi. Ang ila kadamuon halos nagdoble, kutob sa 71,509 tubtob sa 141,606 sa ulot sang 1939 kag 1945, walay sapayan sang mga pag-ipit kag paghingabot sadtong tinuig sang inaway.
‘Wala Na sing Kasingki’
5. Tuhoy sa “paghidait,” paano ang katawhan ni Jehova tuhay gikan sa kalibutan?
5 Apang, kamusta sang pagkatapos sang Inaway Kalibutanon II nga panag-on? Wala sing paghidait sa tunga sang mga pungsod sang duta. Sa katunayan, ginreport nga kapin sa 30,000,000 ka tawo ang napatay sa “diutay” nga mga inaway nga gin-away kutob sang 1945. Mga 40 ka “de-bulsa nga mga inaway” ang gin-away sa palibot sang globo sa isa ka tion. Busa, daw ano ka malipayon kita nga mag-alagad sa isa ka organisasyon nga nagasikway sa kasingki! (Isaias 2:4; Hulubaton 20:22) Dugang pa, subong tugob-globo nga organisasyon, ginaagom naton ang paghidait sa sulod naton. Paagi sa paglakat upod sa “Dios sang paghidait,” naeksperiensiahan naton ang “paghidait sang Dios nga nagalabaw sa tanan nga panghunahuna.”—Filipos 4:7-9.
6, 7. (a) Ano ang nagapatuhay sa katawhan sang Dios? (b) Paano natuman ang Isaias 60:18 sa aton? (c) Sa anong talalupangdon nga paagi kita tuhay gikan sa butig nga mga relihionista?
6 Sanglit ang “paghidait” kag ang “pagkamatarong” nagaluntad sa tunga sang katawhan ni Jehova, tuhay gid kita katama gikan sa kalibutan ni Satanas. Nagatalupangod sini, ang iban sa aton kaingod nagsiling, ‘Ginadayaw namon kamo, apang wala namon maluyagi ang inyo relihion.’ Apang, indi bala nga ang aton relihion amo ang naghimu sa aton sa kon ano kita? Wala kita sing interes sa nagasinumpakilay nga mga ideolohiya kag mga dumot nga nagabahinbahin sa mga pungsod. Sa baylo, ang aton duha ka interes amo ang (1) tudloan ang mga mahagop sa dalanon sang kaluwasan paagi sa Ginharian ni Cristo kag (2) dayawon si Jehova, huptan ang iya ngalan sa atubangan sang tanan nga katawhan subong saksi. “Indi [kita] bahin sang kalibutan.”—Juan 17:14, 16.
7 Busa, nakig-ambit kita sa katumanan sang saad ni Jehova: “Ang pagpigos indi na mabatian sa imo duta, ang kamingaw upod ang kalaglagan upod sa imo ginsakpan. Kag tawgan mo ang imo mga kuta Kaluwasan kag ang imo mga gawang Pagdayaw.” (Isaias 60:18) Ang bug-os nga kadayawan iya sang aton Dios, si Jehova! Ang relihioso nga mga lider sang Cristiandad (kag tanan sang ila apostata nga mga kaabyanan) wala nagapadungog sa sina nga ngalan—bisan tubtob sa punto sang salimpapaw nga pagtinguha nga dulaon ini gikan sa mga badbad sang Biblia. “Apang kami, sa amon bahin, magalakat sa ngalan ni Jehova nga amon Dios sa tion nga dinapat-od, bisan tubtob sa walay katapusan.”—Miqueas 4:5.
8. (a) Anong pagpalig-on ang ginahatag ni Jehova sa iya katawhan sa Isaias 60:19-21? (b) Anong ‘pagsanga’ ang nagapatahom kay Jehova, kag paano?
8 Ginapalig-on kita ni Jehova nga maglakat sa iya ngalan. Sa Isaias 60:19-21, ginapasalig niya ang iya langitnon nga organisasyon nga mangin “dayon nga kapawa” sia sa iya, nga nagatabon pa sa kasanag sang adlaw kag bulan. Sing espirituwal, sia nangin ang iya katahom, nagatuman man sang iya saad tuhoy sa iya katawhan: “Ang imo katawhan man mangin matarong nga tanan; panublion nila ang duta sa gihapon, ang sanga sang akon tinanum, ang binuhatan sang akon mga kamut, agod nga himayaon ako.” Sa pagkamatuod, ginpabugana ni Jehova ang “duta,” ukon ang sakop sang hilikuton, sang iya mga saksi. Sing dugang, ‘nagsanga’ ini sing mga bunga samtang kadam-an sang mga bag-ohan ang gintipon dampig sa Ginharian kag ginbuligan nga magsuklob sang Cristianong personalidad. (Colosas 3:10, 12-14) ‘Nagapatahom’ ini kay Jehova, nagadala sing kadungganan sa iya hamili nga ngalan.
9. (a) Paano ginapakamaayo ni Jehova ang iya mga saksi sa Mexico, kag ngaa? (b) Ano ang ginsiling sang isa ka pamantalaan nahanungod sa ila integridad?
9 Ang ulihi nga halimbawa amo ang Mexico. Sa nagligad nga duha ka tuig, ang kataason sang mga manugbantala sa sina nga duta nagdugang kutob sa 113,823 tubtob sa 151,807—isa ka dalayawon nga 33 porsiento! (Ang ila 1984 nga pagsaulog sang Memoryal sang kamatayon ni Jesus gintambongan sang 695,369.) Ang aton mga kautoran sa Mexico makugi pa gid sa ila hilikuton sa latagon. Ang Monterrey nga pamantalaan sining karon lang nagtalupangod, man, sang ila integridad sa pag-atubang sa hulusayon sang pagkaneutral, nagasiling lakip sa iban nga mga butang: “Daw ano ka daku nga paghidait ang ginapukaw sa aton sang ila kalig-on kag kaisog sang pagtuo. Bisan ang ila kabataan ginsikway sa eskwelahan ginpakamaayo nila nga magmatutom sa ila pagtuo, sa ila pagpati. Mangin subong ayhan sang ano kon ang tanan sa aton nga mga Cristiano amo sina, nga wala sing kinatuhayan sa grupo kag denominasyon? Ang Mexico mangin sanga talatapan sang langit.”
10. (a) Ano ang nagapakita nga ang mga Saksi ni Jehova mabungahon bisan ginadumilian? (b) Ano nga pamangkot ang ginapautwas diri?
10 Ang mga Saksi ni Jehova padayon nga nagabuhat sining bunga sang pagdayaw, bisan sa mga kadutaan diin wala sing untat ang paghingabot. Daw ano ka makalilipay nga talupangdon sa Report sang 1984 nga Tuig sang Pag-alagad nga sa 28 ka mga pungsod diin may yara mga pagdumili kag iban pa nga paglatid sang pangulohan ang bug-os nga kadamuon sang mga manugbantala nagdugang sing 3.1 porsiento, tubtob sa un kuarto sang isa ka milyon, kag ang mga payunir nagdugang sing 23 porsiento! Mahanduraw mo bala ang pagpayunir sa idalom sadtong kahimtangan? Ang promedyo nga 6,905 sang aton mga kautoran nga lalaki kag mga kautoran nga babayi sa sining mga kadutaan nagahimu sina kada bulan! Kon ikaw hilway sa imo ginapuy-an, tinguhaan mo bala nga mangin regular payunir, ukon sa indi magkubos mag-auxiliary payunir?—Ipaanggid ang Lucas 17:5, 6.
‘Nangin Isa ka Libo’
11, 12. (a) Anong nahauna nga bahin sang saad ang ginatuman ni Jehova karon? (b) Ano nga mga halimbawa sang ‘diutay ang nangin isa ka libo’? (c) Ngaa may amo sina kadasig nga pagdugang?
11 Bangod sang iya kaugalingon hamili nga ngalan, si Jehova naghatag sing tatlo ka panaad. (Isaias 60:22) Una ginsilingan niya kita: “Ang diutay mangin isa ka libo.” Samtang imo ginabasa ang tagsa ka Yearbook of Jehovah’s Witnesses, natalupangdan mo bala kon paano ang pagsugod ginhimu sang isa lamang ka manugbantala sang Ginharian, ukon sang pila lamang, sa pila ka kadutaan diin may yara na karon linibo? Halimbawa, ang payunir nga utod nga lalaki nga amo ang una nga Saksi sa Chile nag-arkila sing isa ka apartment kag nag-agda sa mga tawo sa isa ka miting sang Domingo. Sang ulihi nag-abot ang isa ka interesado. Namangkot ini nga tawo, ‘Kag ang iban, san-o sila maabot?’ Ginpasalig sia sang payunir: “Maabot sila.” Kag nag-abot matuod sila. Pagkatapos sang 50 ka tuig, inang diutay nangin 23,985.
12 Sa Italya, ang mga Saksi ni Jehova mapait nga ginhingabot sang pasista nga pangulohan ni Mussolini. Sang pagkatapos sang inaway nga tuig sang 1946, 120 lamang sa ila ang nagareport nga nagaalagad. Apang dumduma nga 120 lamang ang nagtambong sa Pentecostes sang tuig 33 C.E. Kag hunahunaa lamang kon ano ang ginsugdan sadto nga tion! (Binuhatan 1:15; 2:1-4, 41) Karon, sa iban nga bahin, ang espiritu ni Jehova ginbubo sa Italya. Sa sulod sang 38 ka tuig ang mga manugbantala nagdugang tubtob sa kataason nga 119,408, sa katapusan nga report, nga tuman kalapit sa isa ka libo ka pilo nga pagdugang. Kaangay sa tuman kadamu nga Katoliko nga mga pungsod sa palibot sang duta, ang mga Saksi sa Italya nagaeksperiensia sing talalupangdon nga pagdugang.—Ipaanggid ang Salmo 69:9; Isaias 63:14.
“Isa ka Mabakud nga Pungsod”
13, 14. (a) Paano natuman ang ikaduha nga bahin sang saad ni Jehova? (b) May kahilabtanan sini, paano maaplikar ang 1 Pedro 2:9 kag Isaias 59:21? (c) Ano ang naghatag sa aton pagbantala sing daku pa nga kusog?
13 Ang ikaduha nga bahin sang tatlo ka saad ni Jehova amo ini: “Ang magamay [mangin] isa ka mabakud nga pungsod.” “Magamay” ini sa pagkamatuod, naalaplaag nga nagkalabilin sang mga hinaplas, nga ginpasag-uli sa “duta” nga ginakahamut-an ni Jehova sang 1919. Apang nagmuad ini tubtob ang bug-os nga espirituwal nga Israel nagsulod—ang bug-os nga kadamuon sang 144,000 ka mga manunubli sang Ginharian. (Roma 11:25, 26) Sa pagkamatuod, subong bahin sang “balaan nga pungsod” sang Dios, ang hinaplas nga nagkalabilin sa duta ginpaguwa gikan sa kadudulman pasulod sa iya makatilingala nga kapawa. Nagkalipay sila nga ipahayag sa luwas ang kaayo sang ila Dios, si Jehova. (1 Pedro 2:9) Bisan pa diutay sa kadamuon, ginpabakud sila paagi sa espiritu sang Dios. “‘Para sa akon, amo ini ang akon katipan upod sa ila,’ siling ni Jehova. ‘Ang akon espiritu yara sa imo kag ang akon mga pulong ibutang ko sa imo baba—indi ini sila pagakuhaon sa imo baba ukon gikan sa baba sang imo kaanakan ukon gikan sa baba sang kaanakan sang imo kaanakan,’ siling ni Jehova, ‘kutob karon tubtob sa tion nga dinapat-od.’”—Isaias 59:21.
14 Paagi sining pinamulong ginapasalig kita ni Jehova nga ang aton pagbantala sang “maayong balita sang maayong mga butang” sigurado nga magmadinalag-on, kag tungod sini nagapangamuyo kita sing hanuot sa sining ‘adlaw ni Jehova.’ Ang aton pagbantala nakatigayon sing kusog samtang ang malaragwayon nga “kaanakan” sang hinaplas nga nagkalabilin, ang “dakung kadam-an,” kag subong man ang ila “kaanakan” (mga bag-ohan nga ila gindirekta sa organisasyon sang Dios) nagkuha sining mensahe sang kaluwasan sa ila mga baba, busa nagapahibalo sini sing dayag. Subong resulta, ang tanan nga mga kongregasyon nagpadayon sa pagtubo sa espirituwal, subong man sa kadamuon.—Roma 10:10, 15; Salmo 118:24, 25; 1 Tesalonica 3:12.
15. Nangin daw ano kadamu ang malaragwayon nga “pungsod” sang Dios, kag ngaa malipayon ini?
15 Sining ulihi nga tion, daw ano ka makatilingala nga ang bunga sang Ginharian nagdugang! Paagi sa pagdugang sing daku nga kadamuon sa “dakung kadam-an,” ang malaragwayon nga pungsod sang Dios may yara na karon kabug-osan nga 2,842,531 ka aktibo nga mga Saksi subong kataason. Ini nga “pungsod” mas madamu sang sa 92 ka mga pungsod kag geopolitikal nga mga bahin sang kalibutan. Malipayon nga ginasulit naton ang pinamulong sang matam-is nga umalamba: “Ang laygay ni Jehova nagapadayon sing malig-on sa gihapon; ang mga painonino sang iya tagipusuon sa tanan nga kaliwatan. Malipayon ang pungsod nga ang iya Dios amo si Jehova, ang katawhan nga iya ginpili nga iya panublion nga kaugalingon.”—Salmo 33:11, 12.
‘Magapadali Sini’
16, 17. (a) Ano ang nagapakita nga ang ikatlo nga bahin ni Jehova nagakatuman karon? (b) Paano ginpasundayag ang gugma sa Dios kag kay Cristo? (c) Anong malipayon nga hilikuton kag espiritu ang nagbulig sa ‘pagpadali sini’? (d) Paano maaplikar karon ang Mateo 9:35-38?
16 Ginadugang ni Jehova ang ikatlo nga bahin sini nga saad: “Ako, amo si Jehova, magapadali ako sini sa iya tion.” Samtang nagatindog kita sa bibi sang “dakung kapipit-an,” ang tion para sa sini amo KARON! (Marcos 13:10, 18, 19) Ang madasig nga pagdugang sa hilikuton sang Ginharian sa sining nagligad nga duha ka tuig nagapakita sini. Ining ‘pagpadali’ makita sa bug-os nga duta, bisan sa mga kadutaan diin ang mga Saksi ni Jehova dapat magpasundayag sang ila gugma kay Jehova nga Dios kag kay Jesucristo paagi sa pagbantala sa atubangan sang mga paghingabot ukon sa iban nga mga kahimtangan nga nagabutang sa katalagman sang ila kabuhi. Bangod sang dayon nga pagdugang sang bug-os tion nga manugbantala, ang mga payunir yara sa unahan. Daw ano nga kalipay nga makita sila nga nagaalagad kay Jehova!—Hulubaton 10:22.
17 Ining malipayon nga espiritu sang pagpayunir nagpalig-on sa mga kongregasyon sa bisan diin nga ‘padalion’ ang ila bahin sa katapusan nga pagtipon. Bisan nga may daku nga pagdugang, makasiling kita nga “ang alanyon daku, apang ang mga mangangani diutay.” Sa sining walay paglaum nga kalibutan karon, makabatyag kita sing kaluoy sa mga tawo, subong sang ginbatyag ni Jesus sang yari sia sa duta, kay sa pagkamatuod sila “ginlapyo kag nag-alaplaag subong sang mga karnero nga wala sing manugbantay.” Gani kita “nagapangayo sa Agalon sang alanyon agod magpadala sia sing mga mangangani sa iya alanyon,” kag nalipay kita nga makita ang aton mga pangamuyo nga ginsabat sing makatilingala.—Mateo 9:35-38.
18, 19. Ano ang iban nga mga report ang nagapakita nga ang bug-os kalibutan nga kaumhan “maputi na nga alanyon”?
18 Binagbinaga ang isa lamang sining makapulokaw nga mga halimbawa: Sang Abril sang 1984, ang Ecuador nagreport sing 1,048 ka auxiliary payunir sa latagon, 106 porsiento nga labaw sang sa nagligad nga Abril. Sang Hunyo ini nga pungsod nagreport sing 12,238 ka pagtuon sang Biblia sa balay, 24-porsiento nga pagdugang para sa tuig, kag 8,044 ka manugbantala, 17-porsiento nga pagdugang. Ang nagtambong sa Memoryal nagtimbuok tubtob sa 40,728, ang ratio nga kapin sa 5 para sa isa ka manugbantala. Gikan sa palibot sang aton globo yara man ang kaanggid nga mga report, kag ang bug-os kalibutan nga tumalambong nga 7,416,974 sang ginsaulog ang Memoryal sang Abril 15, 1984, nagapakita nga ang kaumhan “maputi na nga alanyon” yadtong tipunon “para sa kabuhi nga walay katapusan.”—Juan 4:35, 36.
19 Sing masami ‘ginapadali ini’ ni Jehova sa talalupangdon nga paagi. Ang isa ka nagalakbay nga manugtatap nagsulat sini gikan sa kagulangan sang naaminhan nga Papua New Guinea: “Ang isa ka tawo nga napakig-angotan sang espesyal payunir nagpauli sa iya nabaw-ing nga puluy-an sa isa ka minuro sa bukid. Pila ka tuig sang ulihi, nagpakita sia liwat sa isa ka sirkito nga asambleya—nga may isa ka pangabay. Ining wala pa mabawtismohi nga tawo nagpanaksi sa iya minuro kag sa palibot nga ‘kagulangan’ sing tuman ka epektibo amo kon ngaa ang mga gulang sang minuro maluyag karon nga ang mga Saksi ni Jehova magkari kag atipanon ang espirituwal nga mga intereses sang bug-os nga duog.” Basta natanum na ang binhi, ang Dios amo ang ‘padayon nga nagapatubo sini.’—1 Corinto 3:6.
20. Paano ginpasangkad ang mga sanga sang Watch Tower agod tatapon ang mga pagdugang?
20 Sa madamu nga paagi, ginhanda ni Jehova ang iya katawhan para sa isa ka daku nga pagdugang nga nagakatabo karon. Nagakasadya kita nga, sang ulihi nga tinuig, makatilingala nga gin-atipan ni Jehova ang pagpasangkad sa mga sanga talatapan sang Watch Tower. Karon, ining mga sanga nasangkapan agod buligan ang madamu nga panong sang “mga pating.”
21. Paano kita padayon nga makigbahin sa ‘pagpadali sini’?
21 Busa, makigbahin kita tanan sa pagpasilak sa kapawa sang maayong balita sang Ginharian sa minilyon pa! Tudloan naton ang tanan nga “mga pating” padulong sa dalan sang “kaluwasan” sa likod sang maamligon nga mga dingding sang organisasyon ni Jehova kag dugang nga “dayawon” sia sa iya mga gawang. Ipangamuyo naton nga ang Soberanong Ginuong si Jehova kag ang pangulo sang Cristianong kongregasyon, ang aton hinigugma nga si Hari Jesucristo, padayon nga “magapadali sini” samtang ang pagbantala sang Ginharian nagaabante na sa iya putokputokan!
Pagrepaso Sini nga Pagtuon:
◻ Anong talalupangdon nga katumanan sang Isaias 60:17 ang natabo sang 1938?
◻ Suno sa Isaias 60:18, ano ang aton mga intereses?
◻ Paano ang mga balita gikan sa latagon ‘nagapatahom’ kay Jehova?
◻ Paano ang tatlo ka saad sang Isaias 60:22 nagapadulong sa putokputokan?
[Laragway sa pahina 18]
Ang mga panghapin sang Watchtower sang katuigan 1930 nagalaragway sang palanan-awon tuhoy sa dinamiko nga organisasyon ni Jehova
[Laragway sa pahina 21]
Ang maayo nga espiritu sa pagpayunir nagbulig sa ‘pagpadali’ sa hilikuton sa pagpangani