Mga Adlaw Subong sang “mga Adlaw ni Noe”
“Ang duta napuno sing kasingki . . . malain ini, kay ang tanan nga unod nagpakalain sang ila dalanon sa duta.”—GENESIS 6:11, 12.
1, 2. (a) Ano nga mga sahi sang kasingki ang dapat batason karon sang mga Saksi ni Jehova? (b) Sa anong mga kahimtangan ang katawhan sang Dios ginlugpayan sang paglaum nga pagkabanhaw?
KASINGKI! Subong sang adlaw ni Noe, sa karon man, ang kasingki nangin isa ka kinaandan nga tinaga. Bisan ang mga nagalakat upod sa matuod nga Dios, subong ni Noe anay, indi luwas sa kasingki. Mabaskog ini nga ginpatalupangod sa kalibutan sang natabo sang Hulyo 21 sang nagligad nga tuig, sang ang isa ka Kingdom Hall sang mga Saksi ni Jehova sa Sydney, Australia, ginguba sang bomba sa tion sang isa ka pamulongpulong publiko sa Biblia nahanungod sa katutom sa Dios kag sa pamilya. Isa ka Saksi ang napatay. Kapin sa 40 ang naospital. Ini sila tanan nakalampuwas, apang ang iban sa ila may grabe nga mga pinalian subong resulta sining kriminal nga kasingki. Ang isa ka polis nga detektib nagkomento: “May yara 110 ka tawo sa sulod kag isa gid ka milagro nga wala mapatay ang 110.”
2 Sa iban nga bahin sang duta—subong sang sa Naaminhan nga Irlandiya, Lebanon, kag El Salvador—ang mga Saksi ni Jehova nagawali sing “maayong balita” walay sapayan sang nagapadayon nga kasingki sa palibot. May pila nga napatay, ang iban sa ila samtang nagapakigbahin sa ministeryo. Sa madamo nga pungsod ang “wala ginapaabot nga mga hitabo,” subong sang mga aksidente kag linog, nagkutol man sing hamili nga mga kabuhi, nga sa amo nga mga okasyon ang katawhan ni Jehova ginlugpayan sang paglaum nga pagkabanhaw.—Manugwali 9:11; 1 Tesalonica 4:13, 14.
3. (a) Ano ang mahimo matabo sa pila sang katawhan ni Jehova, subong ginpakita sang mga hitabo kasan-o lang kag sang Lucas 21:16? (b) Paano kita makasalig sa pag-amlig sang Dios sa tion sang “dakung kapipit-an”?
3 Kasan-o lang sa Mexico, 23 tanan ka Saksi kag mga kaupod nila ang nalakip sa 5,000 nga napatay sa isa ka malaglagon nga linog. Sa Puerto Rico, pito pa ang nalakip sa 300 nga napatay sa baha kag natiphag nga duta. Nagakahulugan bala ini nga napaslawan si Jehova sa pag-amlig sa pila sang iya mga alagad? Indi gid. Indi kita puera sa mga aksidente kag mga kapahamakan. Kag tuhoy sa paghingabot, si Jesus nagpaandam sa iya mga disipulo, nga nagasiling: “Patyon nila ang iban sa inyo.” Ginatos sang aton kauturan ang napatay sa mga kamut sang Nazi nga si Hitler. Dumdumon sila tanan ni Jehova sa pagkabanhaw. Apang, kon ang gintagna nga “dakung kapipit-an” magbunal sa duta, ipakita ni Jehova nga may ikasarang sia sa pagluwas sa mga nagapanawag sa iya ngalan, subong sang iya ginhimo sang mga adlaw ni Noe.—Lucas 21:16-19; Mateo 24:14, 21, 22, 37-39; Isaias 26:20, 21; Joel 2:32; Roma 10:13.
4. Paano ang mga kahimtangan karon kon ipaanggid sa mga ginlaragway sa Genesis 6:11, 12?
4 Kutob sang 1914 ang kasingki nagbalingaso sa bug-os nga globo. Isa ka gatos ka milyon ka tawo ang napatay sa mga inaway kag mga pagpamatay sini nga siglo. Ang katawhan ginsalot sang mga hi-jacking sa kahanginan kag sa dagat, pagpamomba sang mga terorista, tigdamo nga pagpamatay, kag pagdumtanay sang mga rasa, kag yara sa katalagman ang katawhan bangod sang pagdamo sang nuklear nga mga hinganiban. Amo gid ini sa pagkamatuod ang “makahalanguyos nga mga tion” nga may “kalisang sang mga pungsod nga wala makahibalo sang dalan paguwa.” (2 Timoteo 3:1-5, 13; Lucas 21:25) Apang, ang katawhan ni Jehova karon nagapuyo sa tunga sang isa ka kalalat-an nga mas makatalagam sa kasingki, bisan pa sa masami ginaangot ini sa kasingki. Nagsugod ini kapin sa 4,300 ka tuig sang adlaw ni Noe. Ano ina?
Ang Pagtuo ni Noe sa Tunga sang Kalautan
5, 6. (a) Paano gindagtaan ni Satanas ang katawhan? (b) Sa anong mga paagi si Noe kag ang iya pamilya talalupangdon nga indi bahin sadtong kalibutan?
5 Kutob sang pagrebelde sa Eden, si Satanas nga Yawa nangin determinado sa “pagpatalang sa bug-os napuy-an nga duta.” (Bugna 12:9) Ginsugo ni Jehova ang lalaki kag babayi nga gamiton ang ila hinatag-sang-Dios nga gahom sa sekso sing dungganon sa sulod sang kahimusan sang pag-asawahay, agod “tugbon ang duta” sang ila sahi. (Genesis 1:28; Hebreo 13:4) Apang ginhigkoan sang Yawa ang katawhan paagi sa indi kinaugali nga sekso. Paano? Ang espiritu nga “mga anak sang Dios” nagbuylog kay Satanas sa iya pagrebelde. Ini sila nangin “mga demonyo,” kag si Satanas ang ila “manuggahom.” (Lucas 11:15). Ano ang ginhimo sang mga demonyo? Nagpanaog sila sa duta, nagsul-ob sing tawhanon nga mga lawas kag naghiusa sa maanyag nga mga anak nga babayi sang mga tawo. Ang resulta makangilid-ad!
6 Sa amo ginpanganak ang mestiso nga mga anak, undanon nga mga higante nga katunga demonyo kag katunga tawo. Amo ini ang mga Nefilim, manugpatay nga “Manugpukan” sa katawhan, subong ginapakita sang rekord: “Kag ang duta malain sa panulok sang matuod nga Dios kag ang duta napuno sing kasingki. Gani nakita sang Dios ang duta kag, yari karon! malain ini, bangod ang tanan nga unod nagpakalain sang ila dalanon sa duta.” Ang kasingki kag kalautan sa sekso naglapnag gid amo kon ngaa kay Noe lamang masiling ini: “Si Noe nagpamatuod sang iya kaugalingon nga matarong sa tunga sang iya mga kadungan. Si Noe naglakat upod sa matuod nga Dios.” Ang iya asawa, ang iya mga anak nga lalaki, kag ang ila mga asawa—amo lamang sa tanan nga katawhan—ang nagpakita sing pagtuo kag diosnon nga kahadlok. Maathag nga ang pamilya ni Noe wala madagtaan sang kalautan sa sekso sang iya adlaw.—Genesis 6:4, 9-12, Ref. Bi., footnote.
7. Subong ginpakita sang adlaw ni Noe, paano ginahukman ni Jehova ang malaut kag matarong? (Ipaanggid ang Mateo 25:40, 45, 46.)
7 Ginlaglag ni Jehova yadtong masingki, buang-sa-sekso kag demonyohanon nga kalibutan. Paagi sa daku nga Anaw, gin-anod niya ang tanan nga malaut sadto. Ang mestiso nga mga Nefilim kag ang malaut nga mga tawo nagkalamatay, samtang ang demonyo nga mga anak sang Dios anay nanginluwas kag nagbalik sa duog sang mga espiritu—sa paghulat sang paghukom sang Dios sa ila. Apang may mga naluwas sadto! Si Noe kag ang iya pamilya ginluwas. Kag ngaa? Bangod sang ila pagtuo, nga ginsakdag sang mga buhat paagi sa pagtukod sing arka kag pagbantala sing pagkamatarong sa sadtong gintagudilian nga kalibutan.—2 Pedro 2:4, 5.
Mga Tawo sa Karon, Mag-andam!
8. Sa anong mga bahin ang adlaw ni Noe nagalaragway sa aton adlaw?
8 Ang adlaw ni Noe naglaragway sa aton adlaw. Paano naton nahibaloan ini? Bueno, si Jesus nagtagna sing kaanggid nga tion sang kasingki, pagkamalinapason, kag pagkawala sing gugma subong bahin sang “tanda” nga kita nagatindog sa bibi sang “dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo.” Nagsiling man sia: “Nahanungod sadtong adlaw kag takna wala sing nakahibalo, . . . ang Amay lamang.” Nian nagdugang sia: “Subong sang mga adlaw ni Noe, amo man sa pag-abot sang Anak sang tawo. Kay subong sa sadtong mga adlaw sa wala pa ang anaw, sila nagakaon kag nagainum, nagapangasawa kag nagapamana, tubtob sa adlaw nga nagsulod si Noe sa arka; kag sila wala magtalupangod tubtob nga nag-abot ang anaw kag nagdala sa ila tanan, amo man sa pag-abot sang Anak sang tawo.”—Mateo 24:3-21, 36-39.
9. Paano naton malikawan ang nadangtan sadtong mga ‘wala magtalupangod’?
9 Huo, “sila wala magtalupangod.” Apang indi mo sila dapat ilugon. Sarang ikaw maluwas kon si Ginuong Jesus ipahayag gikan sa langit, kag itimalos ang Dios paagi sa paglaglag sing dayon sa “mga wala nagakilala sa Dios kag sa mga wala nagatuman sang maayong balita nahanungod sa aton Ginuong Jesus.” (2 Tesalonica 1:7, 8) Indi mo dapat ilugon ang kalibutanon nga mga tawo nga ang ila lamang ginakabalak-an sa kabuhi amo ang pagpahamuot sa kaugalingon, pagtinguha sing kilala nga karera ukon materyal nga manggad, nga wala ginadumdom ang Dios. Sa pagkamatuod, ang “ila dios amo ang ila tiyan.”—Filipos 3:19.
“Dumti ang Malaut”
10, 11. (a) Agod mahamut-an sang Dios, ano nga mga bisyo ang dapat likawan? (b) Ano nga hinganiban ang dapat naton isul-ob, kag ngaa?
10 Sa sining katapusan nga mga adlaw, ang kabuhi sang madamo nga tawo nasentro sa sekso, kasal man ukon indi. Kag para sa madamo nga kasal na, ang diborsio ukon pagkanselar sang pag-asawahay kinaandan na. Ginasikway ang maathag nga mga paandam sang mga disipulo ni Jesus, madamo sa Cristiandad ang nagapatuyang sa homoseksuwalidad. Ang iban sini sa ila “nagabaton sa ila kaugalingon sang silot” sa porma sang AIDS kag sang iban pa nga balatian nga ginapaliton sang sekso. Apang, may yara paglaum nga maluwas para sa sina nga mga tawo. Dumduma, si Jesus may kahamuot nga naghambal tuhoy sa mga pampam nga nagtinlo sang ila kabuhi kag nagtuo sa iya, tuhay sa bugalon kag indi mahinulsulon nga relihioso nga mga lider sang iya adlaw.—Roma 1:26, 27; 2 Pedro 2:9, 10; Judas 6, 7; Mateo 21:31, 32.
11 Ang bisan sin-o sa katawhan ni Jehova nga nadagtaan, ukon ginasulay sa pagpatuyang, sa imoral nga mga buhat dapat magmata kag magsul-ob sang bug-os nga hinganib nga ginaaman sang Dios! (Efeso 6:11-18) Sa pagkamatuod ini nga mga adlaw “subong sang mga adlaw ni Noe.” Inang “nagangurob nga leon,” ang Yawa, kag ang iya malaut nga mga demonyo nagapulaw sa pagpain kag sa pagsiod sa mga alagad sang Dios. Dapat kita magtindog batok sa sina nga mga kaaway, malig-on sa pagtuo.—1 Pedro 5:8, 9.
12. Ngaa importante nga sundon ang laygay sang Salmo 97:10?
12 Makapakibot nga ang iban sang mga kilala anay sa organisasyon ni Jehova nagpadaug sa imoral nga mga buhat, lakip ang homoseksuwalidad, pagbaylohanay sing asawa, kag seksuwal nga pag-abuso sa bata. Talupangda man, nga sang nagligad nga tuig, 36,638 ka indibiduwal ang gindisfellowship gikan sa Cristianong kongregasyon, ang kalabanan sa ila bangod sang imoralidad. Ang organisasyon ni Jehova dapat tipigan nga matinlo! (1 Corinto 5:9-13) Tion ini para sa mga gulang, ministerial nga mga alagad sa kongregasyon, kag sa pagkamatuod sang tanan naton nga kauturan nga mga lalaki kag mga babayi nga likawan ang bisan anong kahimtangan nga makadul-ong sa imoralidad. Ang katutom sa mga talaksan ni Jehova pagapadyaan, subong ginasiling sang Salmo 97:10: “O kamo nga nagahigugma kay Jehova, dumti ang malaut. Sia nagatipig sang mga kalag sang matutom sa iya; ginaluwas niya sila sa kamut sang mga malauton.”
13. Ano ang maalamon nga laygay nanday apostol Pablo kag Pedro?
13 Sa pat-od nga tion, laglagon sang “dakung kapipit-an” ang tanan “nga makangilil-ad sa ila kahigkoan.” Dapat tinguhaan gid naton nga dumtan, huo, kangil-aran, kag likawan ang kalautan sang kalibutan! Dapat kita ‘magpalagyo sa pagkamakihilawason’! (Bugna 21:8; 1 Corinto 6:9, 10, 18) Si apostol Pedro, sa tapos magpaandam batok sa mga apostata nga nagsab-ug sing duhaduha kag nahanungod sa pagkamatuod sang “adlaw ni Jehova,” nagapalig-on sa aton sa “mga balaan nga buhat sang paggawi kag mga buhat sang diosnon nga debosyon.” Sia nagadugang: “Apang may yara bag-ong mga langit kag bag-ong duta nga aton ginahulat suno sa iya saad, kag sa sini magapuyo ang pagkamatarong. Busa, mga hinigugma, sanglit nagahulat kamo sini, himoa ang inyo labing masarangan nga masapwan kamo niya sa ulihi nga wala sing dagta kag kasawayan kag sa paghidait.” Daw ano, kon amo, ka makalilipay nga makasulod sa “bag-ong duta,” nga sa diin ‘himuon [sang Dios] nga bag-o ang tanan nga butang’ kag matinlo.—2 Pedro 3:3-7, 10-14; Bugna 21:1, 4, 5.
Pamatii ang Dugang Pa ‘Nagapaandam nga mga Halimbawa’
14. Ngaa temporaryo lamang ang pagtinlo sadto sang Anaw?
14 Sa tapos malaglag sa duta sang daku nga Anaw ang tanan nga kahigkoan sang mga demonyo kag sang mga tawo, ginsulit ni Jehova ang sugo nga ginhatag sang ginsuguran kay Adan, paagi sa pagsiling kay Noe kag sa iya mga anak: “Magmabungahon kag magbuad kag tugbon ang duta.” (Genesis 9:1) Sa isa ka malaragwayon nga paagi ginhimo nila ini, 70 ka “pamilya”—isa ka malaragwayon himpit nga numero—nga nalista sa Genesis kapitulo 10. Apang ang katawhan nagaantos gihapon sang mga epekto sang sala nga napanubli kay Adan. Kag sa liwat ang impluwensia sang mga demonyo nagdul-ong sa mga tawo sa paglugdang sa seksuwal nga kalautan.
15. Ano ang aton maton-an gikan sa paghukom sang Dios sa Sodoma?
15 Sang ulihi, ang “abyan” ni Jehova nga si Abraham, kag ang hinablos ni Abraham nga si Lot nagsaylo sa duog sang Canaan. Ginpili ni Lot ang Distrito sang Jordan, nga “subong sang katamnan ni Jehova.” Apang amo gid bala yadto sa moral? Indi gid! Ang siudad sang Sodoma, nga ginpuy-an ni Lot, kag ang kaingod nga Gomorra nalatom sang homoseksuwalidad. Wala gani sing bisan napulo lamang ka matarong nga tawo didto. Bangod sini, ginpadangat ni Jehova sa sadtong mga siudad ang “hukom nga silot sang dayon nga kalayo.” Indi na liwat ipasag-uli yadtong malaut nga mga siudad! Ginsambit ni Jesus ang paghukom sang Dios sa Sodoma, upod sa natabo sang “mga adlaw ni Noe,” sa pagpadaku sang kinahanglanon nga magbantay kita!—Genesis 13:10; 18:32; Judas 7; Lucas 17:26-30.
16. Ano nga buhat sang mga demonyo ang nagakinahanglan sa aton nga magpakig-away sing lakas para sa pagtuo?
16 Indi magsayop! Si Satanas kag ang iya mga demonyo nagasalakay gihapon! Gintagbong sa malaragwayon nga “mga kadadalman sang pitipit nga kadudulman” kag indi na makasul-ob sing undanon nga mga lawas, determinado ang malaut nga mga espiritu sa pagdagta sa mga tawo, kag labi na sa mga alagad ni Jehova. (2 Pedro 2:4-6) Wala sing duhaduha nga gin-impluwensiahan sang mga demonyo si Canaan sa paghimo sing imoral nga buhat batok sa iya lolo nga si Noe. (Genesis 9:22-25) Pat-od nga sila gid ang nagpaluntad sang mga kangil-aran nga nangin ‘dalanon sang duta sang Canaan,’ amo kon ngaa sang ulihi ginsuka sini ang iya mga pumuluyo. (Levitico 18:3-25) Subong man, ginasugyot sang mga demonyo ang indi kinaugali nga mga buhat sa sekso nga nagahalit sa madamo gid nga komunidad karon. Sa pagpakig-away sing lakas para sa pagtuo, dapat naton pamatokan ang mga pagsalakay sang napukan nga mga anghel nga nagatiklod sa mga tawo sa ‘paghimo sing sobra nga pagpakighilawas kag magpatuyang sa dinagakaigo nga kailigbon.’—Judas 3, 6, 7.
Magtukod Para sa Kaluwasan
17. Subong ni Noe kag sang iya pamilya, paano naton mapakita ang aton kaugalingon nga indi bahin sang kalibutan?
17 Bangod sang pagkaserioso sang aton mga tion, paano naton makita ang dalan sang kaluwasan? Bueno, paano naluwas si Noe kag ang iya pamilya? “Bangod sa pagtuo si Noe . . . nagtagudili sa kalibutan.” (Hebreo 11:7) Gani sa karon man, ang mga Saksi ni Jehova “indi bahin” sang malauton nga kalibutan. Dugang pa, ginpakita naton ang aton pagtuo paagi sa pagdedikar sang aton kabuhi kay Jehova kag pagpabawtismo sa tubig agod mangin mga disipulo ni Jesucristo.—Juan 17:14, 16; Mateo 28:19.
18. Ano ang ginlaragway sang pagtukod sing arka?
18 Dugang pa, nagapakigbahin kita sa hilikuton ni Jehova para sa karon nga adlaw, isa ka espirituwal nga hilikuton sa pagtukod nga ginatuytuyan sang Daku Pa nga Noe, si Jesucristo. Subong duog sang kalig-onan kag kaluwasan, ang arka nagalaragway sa espirituwal nga paraiso nga gintukod ni Jehova sa tunga sang iya mga sumilimba kutob sang 1919. Isa ini ka kahimtangan sang napasag-uli nga mahidaiton nga kaangtanan sa Dios. Amo ini ang Iya kahimusan para sa kaluwasan sang antitipiko nga pamilya sang Daku Pa nga Noe sa “dakung kapipit-an.”—Mateo 24:21; 1 Corinto 3:9, 11; 2 Corinto 12:3, 4; Bugna 7:13, 14.
19. Ano ang ginlaragway ni Noe, sang mga katapo sang iya pamilya, kag sang ila hilikuton?
19 “Si Noe nakapahamuot sa mga mata ni Jehova.” Ginalaragway gid niya si Jesucristo, nga naglakat sing mapainubuson upod sa Dios diri sa duta, wala maghimo sing bisan ano sa iya kaugalingon nga pagbuot! (Genesis 6:8; Mateo 17:1, 5; Juan 8:28) Lunsay sila mga manugbantala sing pagkamatarong—isa ka maayong halimbawa para sa tanan nga saksi ni Jehova. Kag mapat-od naton nga ang asawa ni Noe, nga nagalaragway sa nagkalabilin nga mga hinaplas sa duta karon, halimbawa sa pagkamapinasakupon. (2 Pedro 2:5; Lucas 4:14-19; Efeso 5:21-24) Kon binagbinagon naton kon daw ano ka daku nga hilikuton ang pagtukod sing arka sang kaluwasan, mahanduraw naton kon daw ano ka malipayon ang tigulang na nga si Noe nga ginbuligan sia sang iya tatlo ka mabaskog nga mga anak nga lalaki kag sang ila mga asawa! Nagakaigo nga nagalaragway ini sila sa “dakung kadam-an” karon nga nagaabaga sang daku nga bahin sang espirituwal nga hilikuton sa pagtukod sa tion sang nagahingapos nga pag-isip padulong sa antitipiko nga Anaw.—Bugna 7:9, 15.
20, 21. (a) Anong masanag nga palaabuton ang nagahulat sa natinloan nga duta? (b) Ano nga kalipay ang maeksperiensiahan bisan karon?
20 Kon natinloan na ang duta, handa na nga himuon nga isa ka literal nga paraiso, ang mga ginalaragway sang mga anak nga lalaki kag ugangan nga mga babayi ni Noe mahimo nga sa sulod sang isa ka tion manganak sa pagkamatarong. Nian paagi sa milagro sang pagkabanhaw matuman ang pagtugob sa duta sing mga tawo. Ang tanan nga nagabaton sang pribilehiyo nga mangin “iban nga mga karnero” ni Jesus ipasag-uli sa kahimpitan, kag kon maluwas sa katapusan nga pagtilaw sa tapos matugyan ni Cristo ang Ginharian sa iya Amay, ini sila ipahayag nga matarong para sa dayon nga kabuhi.—Juan 5:28, 29; 10:16; 1 Corinto 15:24-26; Salmo 37:29; Bugna 20:7, 8.
21 Daw ano nga mga kalipay ang nagahulat sa matutom nga mga sumilimba ni Jehova! Apang daku nga kalipay ang masapwan bisan karon paagi sa bug-os tagipusuon nga pagpakigbahin sa pagtukod sing modernong-adlaw nga arka para sa kaluwasan. Paano ina nga hilikuton nagauswag? Ang aton masunod nga tolon-an magahatag sing sabat.
PAANO MO SABTON?
◻ Paano ang mga hitabo sa wala pa ang Anaw dapat magpaandam sa aton?
◻ Ano nga mga leksion ang dapat maton-an naton gikan sa Mateo 24:37-39?
◻ Ngaa importante gid nga ‘dumtan ang malaut’?
◻ Paano kita makapakigbahin sa pagtukod sing antitipiko nga arka?
[Kahon sa pahina 11]
SUBONG SANG ‘ADLAW NI NOE’—
“40 porsiento lamang sang mga manunudlo sing relihion sa kolehiyo . . . ang nagapati nga imoral para sa indi kasal nga lalaki kag babayi nga maghiusa sa sekso.”—Saturday Oklahoman & Times, Disiembre 29, 1984
[Kahon sa pahina 12]
Importante Bala ang mga Prinsipio sang Biblia?
Ang isa ka pari sang Episcopal namati sa serbisyo sa lubong nga gindumalahan sang isa sang mga Saksi ni Jehova. Pagkatapos, sa pangagda sang pari, duha ka ministro sang Watch Tower Society ang nagtambong sa paghambalanay upod sa pila ka klerigo sa Brooklyn Heights, Siudad sang Nueva York.
Nag-utwas ang pamangkot tuhoy sa homoseksuwalidad. Ginpaathag sang mga Saksi nga ginadumilian ini sang Biblia kag nga ginadisfellowship sang mga Saksi ang mga tawo nga nagabuhat sing bisan ano nga sahi sang imoralidad. (Roma 1:24-27; 1 Corinto 6:9, 10; Judas 7) Ginpamangkot sang mga Saksi ang mga klerigo nahanungod sa ila tindog sa sini nga butang kag nabaton nila ang masunod nga mga sabat:
Ministro sang Congregationalists: “Sa banta ko may ekskomunikasyon kami sa kasugoan sang amon iglesia,apang sa akon bug-os nga kabuhi, wala ako sing madumduman nga ginsunod namon ina nga sugo!”
Pari sang Episcopal: “Kon sundon namon ina nga sugo, wala sing parokyano nga [mabilin] sa amon.”
Katoliko nga monsinyor: “Kon sundon namon ina nga sugo, wala sing pari nga [mabilin] sa amon.”
Bisan pa kon sobra ang ginkomento sining mga klerigo, malipayon ang mga Saksi ni Jehova nahanungod sa ila malig-on nga tindog sa pagtipig sa kongregasyon nga matinlo. Sila “indi bahin sang kalibutan.”—Juan 15:19.
[Kahon sa pahina 13]
SUBONG SANG ‘ADLAW NI NOE’—
“Ang isa ka publiko nga eskwelahan sa Siudad sang Nueva York para sa homoseksuwal nga mga estudyante sa hayskol nagbukas sa Manhattan.” Ang manunudlo sini nagsiling: “Luyag namon ang isa ka palibot nga sa diin ang mga agi kag mga tomboy nga pamatan-on indi pagsunlugon sang indi hamtong nga mga tin-edyer.”—The New York Times, Hunyo 6, 1985
[Kahon sa pahina 14]
SUBONG SANG ‘ADLAW NI NOE’—
“Ang mga katapo sang Riverside Church nag-aprobar kahapon sing isa ka pagsulundan pabor sa mga agi nga nagabaton sang homoseksuwal nga mga relasyon subong bahin sang Cristianong pamilya.”—New York Post, Hunyo 3, 1985