Report sang mga Manugbantala sang Ginharian

Teokratiko nga Pagsangkad sa Venezuela

SA SULOD sang pila ka adlaw tumalagsahon nga masingkal ang init. Natingala ang mga nagalalabay sang makita nila ang mga tawo nga nagapangabudlay sa idalom sang nagabiti nga adlaw samtang ang bisan sin-o mahimo nga magarelaks sa handong ukon air-conditioned nga kuarto. Sing amat-amat, ang balayan sang isa ka bag-o nga tinukod nagsugod sa paglutaw. Sa sulod sang tatlo ka bulan kag tunga, natapos sang mga tawo ang isa ka apat-sing-panalgan nga tinukod—ang bag-o nga dugang sa tinukod sang sanga sang Watch Tower Society sa La Victoria, Venezuela.

Ang matuod ikaduha na ini nga tion nga ang sanga sa Venezuela ginpasangkad sugod sang ginbuksan ini sang 1946, sang 13 lamang ang manugbantala sang Ginharian sa pungsod. Sang 1977 ang ila kadamuon nag-uswag sa kapin sa 13,000. Busa, ang isa ka bag-o nga tinukod sang sanga natapos kag gindedikar sa La Victoria sadto nga tuig. Kutob sadto, ang kadamuon sang mga Saksi sa pungsod nagkapin sa doble. Tion na liwat para sa pagpasangkad.

Ang bag-o nga dugang (natuo nga likod sa laragway), nga kapin sa 20,000 pie kuadrada (1,900 metro kuadrada) ang salog nga espasyo, kapin sa doble sang bug-os nga kapasidad sa sanga. Ang alagyan sa natuo nga punta nagadul-ong sa garahe sa ubos sang tinukod nga makaunod sing 15 ka awto. Ang imprintahan ginsaylo gikan sa 1977 nga tinukod (ang malaba nga tinukod sa sentro) padulong sa una nga panalgan sang bag-o nga dugang, nga sa diin nahamtang man ang maintenance shop kag ang carpenter shop kag ang pila ka opisina. Ang nabilin nga bahin sang tinukod amo ang ginapuy-an sang panimalay Bethel.

Ang bag-o nga tinukod may kaugalingon nga tangke sang tubig kag generator para sa emerhensya nga koryente, bangod masunson ang kakulang sing tubig kag pagkapatay sang koryente sa sini nga bahin sang kalibutan. Kag agod himuslan sing bug-os ang wala sing untat nga silak sang adlaw kag dapya sang hangin, ang lalabhan yara sa ibabaw sang tinukod.

Ano ang ginahunahuna sang lokal nga mga tawo sa bag-o nga tinukod? Bisan ginakanugunan sang iban ang matahom anay nga hardin diri, madamo ang nagabatyag nga ang tinukod nagadugang sa talahuron nga dagway sang palibot. Ang isa ka kilala nga arkitekto, nga nakabati nahanungod sa tinukod kag nagkadto agod makita niya ini, nagsiling sa kauturan: “Amo ini ang pinakamatahom nga tinukod sa La Victoria.” Nagdayaw man ang enhinyero sang munisipyo, nga malipayon nga naghatag sing permiso kag nagsiling: “Isa ka kadungganan nga maghatag ako sing permiso nga istaran ang tinukod nga kaangay sini.”

Ang mga Saksi sa Venezuela nalipay sang Abril 21, 1985, sang 15,802 sa ila ang nagtipon sa kaiping nga Valencia para sa dedikasyon, kag 38,059 ang nagtipon sa lima pa ka siudad agod mamati sa programa paagi sa mga linya nga gin-angot sa telepono. Ang nagtambong kapin pa sa bug-os nga kadamuon sang manugbantala sa sadto nga pungsod. Nagapasalamat sila kag malipayon bangod sining balaan nga aman sa pagsangkap sa ila sing maayo pa para sa maid-id nga pagbantala sing maayong balita sang Ginharian sa wala pa mag-abot ang katapusan sining sistema.—Mateo 24:14.