Apokalipsis—Ano Ini?

“ANG Apokalipsis!” Ano ang madumduman mo kon mabatian mo ina nga ekspresyon? Ini bala adlaw sang paghukom? Kalaglagan? Inaway Kalibutanon III? Katapusan sang kalibutan? Kon ining mga laragway sa kaisipan magaluntad, wala ka nagaisahanon sa sina nga bahin. Ginalaragway sang siensia kag sang mga pamantalaan ang kabuhi sang tawo subong makasulubo. Gani makalilibog bala nga ginaangot sang madamo ang apokalipsis sa pagkapapas sang tawo bangod sang makapahamak nga hitabo?

“Ang apokalipsis indi lamang biblikanhon nga paglaraway kundi nangin isa gid ka posibilidad,” paandam ni Sekretaryo-Heneral Javier Pérez de Cuéllar sang NU sa iya pamuno nga pamulongpulong. “Wala pa gid matabo sa inagihan sang tawo nga ginbutang kita sa makitid nga kiliran sa ulot sang kapahamakan kag kaluwasan.” Ano ang iya ginapatuhoyan? Amo ini ang nuklear nga inaway nga nagaluntad bangod sang paggrabe sa karon nga palumba sa mga armas. Nagapalig-on sang iya paandam sa Nasyones Unidas, nagsiling sia nga “mga 500,000 ka mga sientipiko sa bug-os nga kalibutan ang nagahugod sang ila ihibalo sa pagpanalawsaw sing hinganiban nga mas masibud kag mas makamamatay.”

Alisto man ang iban sa kahimtangan karon. Si Hans Jonas, isa ka retirado nga propesor sa pilosopiya sa New School for Social Research, nagsiling nga ang iya panguna nga ginakahadlokan amo ang “apokalipsis nga nagapamahog gikan sa kinaugali sang wala ginatuyo nga mga dinamiko sang teknikal nga sibilisasyon.” Ginaangot niya ang apokalipsis sa ‘pagkawalay unod, polusyon, pagkahapay sang planeta, kag sa pamahog sang hinali nga kalaglagan paagi sa bomba atomika.’

Sing kaanggid, ang istoryador nga si Golo Mann nagsiling: “Indi mahimo nga may isa pa kita ka inaway. Ang inaway isa ka sayop nga tinaga. Dapat naton idumili ang termino nga ‘Inaway Kalibutanon III’ kag isiling sa baylo ang apokalipsis ukon kalaglagan.”—Die Welt sang Hamburg, Agosto 30, 1985.

Huo, ginakilala sang tawo nga yara na sia sa bibi sang kalaglagan. Apang sugdan bala niya ang apokalipsis? Indi suno sa Biblia, nga nagasiling nga “si Jehova nga Dios, ang Labing Gamhanan”—indi ang tawo—“ang magalaglag sa mga nagalaglag sa duta.” (Bugna 11:17, 18) Busa, ang paghangop sa kon ano ang apokalipsis gikan sa punto de vista sang Biblia magahatag sa imo sing tuhay nga pagtamod, isa nga bag-o gid kag mas masanag.

Kon Ano Gid Ini

Ang apokalipsis ginlaragway sa isa ka sulat sa mga taga-Tesalonica. Didto si apostol Pablo nagasiling: “Ginakabig sang Dios nga matarong ang pagbalus sing kapipit-an sa mga nagapapiot . . . apang, sa inyo nga mga ginapapiotan, ang paghatag sing kapahuwayan kaupod namon sa pagpahayag [ukon, apokalipsis] ni Ginuong Jesus gikan sa langit kaupod sang iya gamhanan nga mga manugtonda sa nagadabdab nga kalayo, nga nagatimalus sa mga wala nagakilala sa Dios kag sa mga wala nagatuman sang maayong balita sang aton Ginuong Jesus. Sila magaantos sing silot nga amo ang dayon nga kalaglagan.”—2 Tesalonica 1:6-10.

Busa, ang apokalipsis amo ang pagpahayag ni Jesus sa panag-on sang “dakung kapipit-an.” (Mateo 24:21) Suno sa An Expository Dictionary of New Testament Words ni W. E. Vine, ang Griegong tinaga nga a·po·kaʹlypsis nagapatuhoy “kay Ginuong Jesucristo kon magakari Sia sa pagtuman sang mga paghukom sang Dios.” Bisan diin pa, ginapatuhoyan sang Biblia ining pagpahayag, ukon apokalipsis, subong ang “inaway sang dakung adlaw sang Dios nga Labing Gamhanan” sa Armagedon.—Bugna 16:14, 16; 19:11-21.a

Matuod, nahanungod sa apokalipsis, nahangpan naton nga ang Biblia nagahambal tuhoy sa “kapipit-an,” “pagtimalus,” kag “silot.” Apang, nagahambal man ini tuhoy sa “kapahuwayan” para sa mga wala sing sala nga ginapapiotan. Ang Pulong sang Dios nagapanaad sa aton nga “sa dili madugay, kag ang malauton wala na.” (Salmo 37:10) Gani ang apokalipsis magahilway sa katawhan sang tanan malauton nga mga impluensia. Mangin dag-on ini sang daku nga pagbalhin padulong sa mas maayo nga mga kahimtangan para sa mga bunayag sing tagipusuon—indi isa ka hitabo para kahadlokan nila.

Busa, sa baylo sang sa bug-os nga kalaglagan sang tanan, ukon pagkapapas, ang apokalipsis mangin matarong nga solusyon sa mga problema sang tawo. Ang ideya tuhoy sa pagkabuhi sa bag-o nga dag-on—isa ka dag-on sang pagkamatarong, paghidait kag kalig-onan—nagaganyat bala sa imo kag sa imo panimalay?

Apang malapit na bala kita sa apokalipsis sang Biblia? Kon amo, may paagi bala kita sa paghibalo sang iya eksakto nga tion?

[Footnote]