Apokalipsis—San-o?

HALOS kaangay ini sang pagbasa sa pinakaulihi nga pamantalaan—mga inaway, mga linog, mga kamatay, balatian, gutom, krimen, kag kahadlok! Ining tanan nga mga hitabo kag iban pa gintagna sa Biblia. Ginatudlo sini ang tion nga ginapuy-an naton tanan subong ang “katapusan nga mga adlaw.” Nagakahulugan ini sang dag-on nga nagadul-ong sa malapit na kag ginsaad nga apokalipsis. Paano naton ini mapat-od?

Ginasaksihan mo ang katumanan sang mga tagna sang Biblia karon. “Dapat mo atubangon ang katunayan,” siling sang Biblia, “ang ulihi nga dag-on sining kalibutan mangin tion sang kagamo. Ang mga tawo magahigugma lamang sang kuarta kag sang ila kaugalingon; mangin bugalon sila, matinaastaason, kag abusado; wala sing pagtahod sa mga ginikanan, indi mapasalamaton, indi diosnon, wala sing kinaugali nga pagpalangga; mangin . . . dumuluong sila sa tanan nga kaayohan, . . . nga nagapaimportante sang ila kaugalingon. Mangin mga tawo sila nga nagabutang sang kalipay sa duog sang Dios, mga tawo nga nagapakita sang nagguwa nga dagway sang relihion, apang nagapanghiwala sang ila gahom.” (2 Timoteo 3:1-5, The New English Bible) Wala mo bala makita ini mismo nga kahimtangan bisan diin?

Madamo nga nagakabuhi karon, ayhan ikaw mismo, ang nagadumdum sang tion nga ang mga kahimtangan indi subong kalain sang sa karon. Ang mga tawo mas mapatugsilingon sa isa kag isa. Ang mga kabataan mas matinahuron sa ila mga ginikanan kag sa mga tigulang. Ang mga lalaki, mga babayi, mga kabataan wala mahadlok maglakat sa dalan bisan kon gab-i. Apang ang tion nagbalhin sing madasig. Bisan pa nga ang iban sining mga kahimtangan daw indi pa lapnag sa inyo duog, ayhan ang posibilidad sang isa ka nuklear nga inaway—bangod sang bugalon nga paghingamo sang tawo sa gahom—nagaapektar sa aton tanan.

Huo, subong nga maathag nga gintagna sang Dios sa iya Pulong, ang Biblia, ang “ulihi nga dag-on sining kalibutan,” nag-aman man sia sing impormasyon nahanungod sa tion sang apokalipsis, kon si Jesus magakari sa paghukom.

Mas Malapit sang sa Ginahunahuna sang Madamo

“Ginatagna ko karon ang bag-ong mga butang,” siling sang Dios. “Sa wala pa ini matabo ginasugid ko ini sa inyo.” (Isaias 42:9, The Jerusalem Bible) Huo, ginbalay niya sa aton sa Biblia ang panguna nga mga hitabo nga mahanabo sa wala pa ang apokalipsis.

Halimbawa, ginhambalan ni Jesus ang tuhoy sa mensahe nga ipalanog sa bug-os nga kalibutan kag gin-angot ini sa apokalipsis. Nagsiling sia: “Ining maayong balita sang ginharian ibantala sa bug-os napuy-an nga duta nga panaksi sa tanan nga kapungsoran; kag ugaling magaabot ang katapusan.” (Mateo 24:14) Ina nga “katapusan” nagalakip sa apokalipsis. Karon, ang mga Saksi ni Jehova nagahinguyang sing ginatos ka minilyon ka oras kada tuig nga nagabantala sing maukod sinang mensahe sang Ginharian sa balay kag balay kag sa bisan anong posible nga mga paagi, sa kapin sa 200 ka kadutaan sa palibot sang globo!

Nagahatag sing talalupangdon nga kaanggid para sa kaayohan sang iya mga sumulunod, ginpaanggid ni Jesus ang tion nga nagadul-ong sa apokalipsis sa tion sadtong wala pa ang Anaw sang adlaw ni Noe. Sadtong panahon ni Noe ang mga tawo tuman kasaku sa pagkaon kag pag-inum kag paglingawlingaw nga ‘wala nila pagtalupangda’ ang mensahe ni Noe nahanungod sa malapit nga kalaglagan. Wala nila pagsapaka ang iya mga paandam.—Mateo 24:37-39.

Ang mga kahimtangan sa aton adlaw nagaanggid gid sa mga kahimtangan sa wala pa ang Anaw! Ang mga tawo tuman kasaku sa ila matag-adlaw nga pagkabuhi amo kon ngaa wala nila pagpamatii ang mga paandam kag pamatuod sang nagahilapit nga apokalipsis.

Apang, ang apokalipsis mas malapit sang sa ginahunahuna sang madamo. Nahanungod sa tanda sang katapusan nga mga adlaw, si Jesus nagsiling nga “ining kaliwatan indi gid magataliwan tubtob ining tanan nga butang mahanabo.” (Mateo 24:34) Ano nga kaliwatan ang ginahambalan ni Jesus?

Ang 1914 nga Kaliwatan

Nagapatuhoy sa “daw mahidaiton kag mabuganaon nga Victoriahanon nga dag-on sang Gran Britanya,” si Primer Ministro Harold Macmillan anay nagsiling nga ginkabig niya ang ‘kalibutan nga iya natawhan’ subong isa nga “magaayo kag magaayo pa.” Apang “sing hinali, sa wala ginapaabot, isa ka aga sang 1914 ang tanan nga butang natapos.” Ginatawag ini nga katapusan sang “100 ka tuig sang paghidait kag pag-uswag,” gindumdum ni Macmillan kon paano gintandaan sang Inaway Kalibutanon I “ang katapusan sang dag-on” kag ang “ginsugoran sang kagamo nga nagakatabo gihapon.” Madamo pa nga iban, labi na yadtong buhi na sang 1914 kag buhi pa gihapon, ang nakahibalo sini nga matuod.

Huo, subong sang ginapatalupangod sining magasin sa iya mga bumalasa sing tinuig na, ginatudlo sang pamatuod ang 1914 nga kaliwatan sang mga tawo subong ang kaliwatan nga ginhambalan ni Jesus.a Busa, “ini nga kaliwatan indi gid magataliwan tubtob ining tanan nga butang [lakip ang apokalipsis] mahanabo.”

Bisan pa nga kapin na sa 70 ka tuig ang nagligad kutob sang 1914, may mga indibiduwal gihapon sa karon nga nagkabuhi sa sina nga dag-on. Suno sa The American Legion Magazine sang Disiembre 1984, sa Estados Unidos mga 272,000 ka beterano sang Inaway Kalibutanon I ang buhi gihapon, kag amo man ini sa iban nga kadutaan. Apang, ang kadamuon nagadiutay sing madasig. Gani tubtob san-o nga ang katapusan nga beterano sang Inaway Kalibutanon I magamartsa padulong sa maragtas?

Samtang ining estadistika magaganyat sang aton igtalupangod sa katapusan nga mga inoras sang 1914 nga kaliwatan, daw ano kita ka espesipiko nahanungod sa eksakto nga tion sang apokalipsis?

“Makawat sa Kagab-ihon”

Ang Biblia nagapaandam: “Nahanungod sa mga tion kag mga panag-on, . . . kamo gid nakahibalo sing sibu nga ang adlaw ni Jehova magaabot subong sang makawat sa kagab-ihon.” (1 Tesalonica 5:1, 2) Mapaabot mo bala sing makatarunganon ang isa ka makawat nga magapadala sing telegrama nga nagapahibalo kon san-o sia nagaplano nga mangawat sa imo balay?

Sing nagakaigo, nian, ginalaygayan kita ni Jesus nahanungod sa eksakto nga oras: “Padayon sa pagbantay, padayon sa pagmata, kay wala kamo makahibalo kon san-o ang gintalana nga tion.” (Marcos 13:32-37) Bisan amo sina, natalupangdan naton nga ginlaragway ni Jesus ang lainlain nga mga hitabo nga nagatudlo sa 1914 nga kaliwatan. Kag ginalaragway sang Biblia ang palaabuton nga mga hitabo nga magatanda sang nagahilapit nga apokalipsis. Ano ang mapaabot naton?

Pagbalhin sang mga Hitabo

Si apostol Pablo nagsiling: “Sang nagasiling ang katawhan: ‘May paghidait kag kalig-onan!’ nian sa hinali ang kalaglagan magaabot sa ila subong nga ang kasakit sa pag-anak nagaabot sa babayi nga nagadala; kag indi sila nga mas-a makalikaw.” (1 Tesalonica 5:3) Gani samtang nagapadulong kita sa katapusan sining “katapusan nga mga adlaw,” mapaabot naton ang pila ka pinasahi nga igtalupangod nga ihatag sa “Paghidait kag kalig-onan!” bilang katumanan sang pinamulong ni Pablo. Nian ano?

Ginapakita sang mga tagna sang Biblia nga ang relihion sang kalibutan, nga ginlaragway subong ang “Babilonia nga Daku,” hinali nga pagasalakayon sang dutan-on nga mga kagamhanan sa politika kag hinali nga pagalaglagon! (Bugna 17:5, 16; 18:10, 17) Magatanda ini sang ginsugoran sang “dakung kapipit-an nga wala pa sing subong nga nahanabo kutob sa ginsugoran sang kalibutan tubtob karon.” (Mateo 24:21) Apang paano sini maapektohan yadtong padayon nga ‘nagamata’ kag nagabantay sa apokalipsis?

Ang matuod nga mga Cristiano makasalig nga hilwayon sila ni Jehova. (2 Pedro 2:9) Huo, tubtob kilala nila si Jehova kag dimakagud nga ginaalagad sia, wala sila sing kabangdanan nga magkahadlok kon ang Dios kag si Cristo magakari sa pagpakig-away sa Armagedon.—Bugna 11:17, 18; 16:14, 16.

Sing masunod, ang apokalipsis magadul-ong sa pagpain kay Satanas nga Yawa kag sa iya dimakita nga mga puwersa gikan sa katawhan. (Bugna 20:2, 3) Huo, ang kasingkal nga magakari magalabaw pa sa pagdula sa duta sang mga tawo nga indi handa sa pag-alagad sa Dios. Bisan ang malauton nga mga espiritu nga nagaimpluensia karon sa kalibutan sa palibot naton pagadulaon. (2 Tesalonica 1:6-9) Magakahulugan ini sing walay katapusan nga pagpakamaayo para sa mga makalampuwas sa apokalipsis.

Apokalipsis—Pamuno Padulong sa Paraiso

Nahanungod sa mga pumuluyo sang duta, ang tolon-an sang Bugna (Ang Apokalipsis, Douay) nagasugid sa aton nga ang Dios “magapahid sang tagsa ka luha gikan sa ila mga mata. Wala na sing kamatayon ukon kasubo ukon paghibi ukon kasakit, kay ang daan nga kahimusan sang mga butang magataliwan.” (Bugna 21:4, New International Version) Sa baylo sang makasulubo nga resulta sang apokalipsis, ginapakita sang Biblia nga ang tawo makasarang sa pagkabuhi sing dayon sa isa ka paraiso sa duta.—Salmo 37:9-11, 29.

Paraiso? Kabuhi nga walay katapusan sa duta? Hunahunaa lamang, mapagros sing himpit, malipayon nga mga tawo gikan sa tanan nga mga rasa nga nagakabuhi sing masadya! ‘Paano ini mangin resulta sang apokalipsis?’ basi ipamangkot mo. Ginhatag sang Dios ang iya pulong. Mangin kasubong ini sa mga pagpakig-angot sang Dios sa Israel, nga “walay bisan ano nga nakulang sa bisan anong maayong butang nga napamulong ni Jehova . . .; nahanabo ang tanan.”—Josue 21:45.

Gani, nahanungod sa eksakto nga adlaw kag takna sang apokalipsis wala sing isa ang nakahibalo, apang ginapakita sang pamatuod nga nagakabuhi kita sa dag-on sang apokalipsis. Kon ini mahanabo, kabay nga masapwan kita nga nagamata kag “nagabantay.” Kay “ang kalibutan nagataliwan kag ang handum sini, apang sia nga nagahimo sang kabubut-on sang Dios nagapabilin sing dayon.”—Marcos 13:33, 37; 1 Juan 2:17; Mateo 24:36.

[Footnote]