Ginaagda Ikaw sa “Balaan nga Paghidait” nga mga Kombension

DAW ano ka malangkagon nga ginapaabot sang tagsa ka Cristianong saksi ni Jehova ang tuigan nga distrito nga mga kombension! Indi maduhaduhaan nga amo ini ang daku nga bahin sang tagsa ka tuig sang kalendaryo. Ang matahom nga mga pamulongpulong, ang mga drama sa Biblia, ang bag-o nga mga libro nga ginapaguwa, ang asosasyon—kon kaisa man ang daku nga tumalambong—nagatingob sa paghimo sining mga pagtinipon nga pinasahi gid.

Binagbinaga, halimbawa, ang iban sang “Mga Nagahupot sing Integridad” nga mga Kombension nga ginhiwat sang nagligad nga tuig. Ang duha sa São Paulo kag Rio de Janeiro, Brazil, may kataason nga tumalambong nga 249,351, upod ang 2,645 nga nagsimbulo sang ila dedikasyon kay Jehova nga Dios paagi sa pagpabawtismo sa tubig. Ang kombension sa Montreal, Canada, nga gintambongan sang 78,804, talalupangdon sa palarkingan sang mga trail­er kag bangod ginhiwat ini sa 11 ka nanuhaytuhay nga hambal. Ang mga nagtambong sa Zu­rich, Swit­zer­land, nagreport nga wala pa gid sila makaeksperiensia sa ila kabuhi sing subong sadto nga kapagsik kag daku nga kalipay. Amo man sini nga mga sentimiento ang ginpabutyag sang mga delegado nga nagtambong sa isa ukon kapin pa nga kombension nga ginhiwat sa Poland.

Ang indi kompleto nga report sa bug-os nga kalibutan nagapakita nga 5,653,689 ang nagtambong sa 754 ka “Mga Nagahupot sing Integridad” nga mga Kombension kag 75,202 ang bag-ong mga Saksi nga nabawtismohan. Daw ano ka dalayawon nga ginpakamaayo ni Jehova ining mga pagtinipon sang iya katawhan!

Batok sa popular nga hulubaton, para sa mga nagtambong sa sining kombension, labaw pa sa ginpaabot ang natabo. Sa masami ang pinakaulihi amo ang labing maayo. Gani ang tanan nga Saksi ni Jehova malangkagon nga nagapaabot sa “Balaan nga Paghidait” nga Distrito nga mga Kombension sini nga tuig, nga hiwaton sa bug-os nga kalibutan—ang 130 sini gin-iskedyul para sa Estados Unidos.

Daw ano ka matahom nga tema para sa aton distrito nga kombension: “Balaan nga Paghidait”! Ang tawhanon nga katilingban karon puno sing pinuyas. Wala lamang sing literal nga mga inaway sa bug-os nga duta karon kundi may yara man iban nga sahi sang inaway: ang ekonomiko nga inaway kag pinuyas sa ulot sang mga mag-asawa, subong man sa ulot sang mga ginikanan kag mga anak. Apang sing talalupangdon nga pagkatuhay, may yara paghidait sa tunga sang dedikado nga katawhan ni Jehova. Ang ila balaan nga paghidait nagahalin sa Isa nga Balaan, si Jehova nga Dios, ang Dios sang paghidait nga nagahatag sing paghidait. May pagpakighidait sila sa iya subong resulta sang pagtuo kag mga binuhatan, amo kon ngaa may paghidait sila sa isa kag isa, sa sulod sang kongregasyon kag sa pamilya.—Filipos 4:7; Roma 16:20.

Talupangda man, nga ining balaan nga paghidait indi lamang ang pagkakulang sing pinuyas. Ang tinaga para sa paghidait sa Hebreo amo ang sha·lohmʹ, kag nagakahulugan ini indi lamang sing pagkamahidaiton kundi sing pagkaayo kag kabuganaan. Huo, ang mga Saksi ni Jehova may yara kabuganaan subong man wala sing pinuyas bangod yara sila sa espirituwal nga paraiso. Ining kombension magabulig sa tanan nga makatambong nga mangin kapin pa ka mahunahunaon sa paghidait kag mabalaka sa pagsakdag sang paghidait, tubtob masarangan nila.—Roma 12:18.

Subong sang sa nagligad nga mga tuig, ining mga kombension magasugod sa Huebes sang hapon sa ala 1:30. Ang tagsa ka adlaw may tema nga may kaangtanan sa paghidait, ang tema sang nahauna nga adlaw amo ang “God Will ­Bless His Peo­ple With ­Peace,” nga napasad sa Salmo 29:11. Ang mapuslanon nga pangamuyo pagahambalan, kag ang daku nga bahin sang sesyon amo ang pamulongpulong sa kon paano bag-uhon ni Jehova ang tanan nga butang.

Sa Biernes, ang pamulongpulong tuhoy sa sadsaran nga ideya sang kombension nga amo ang, “Di­vine ­Peace for ­Those ­Taught by Je­ho­vah,” magapadaku sang ginahalinan sang aton paghidait. Lakip sa iban pa nga mga bahin sang programa amo ang makalilipay nga drama sang Biblia nga ginaangot ang dumaan nga mga tion sa aton adlaw.

Dugang sa pamulongpulong sa bawtismo, ang programa para sa Sabado sang aga magapadaku sang aton Cristianong mga obligasyon sa isa kag isa kag sang kinahanglanon nga mag-uswag subong Cristianong mga saksi ni Jehova. Sa hapon, may yara maayong laygay para sa mga katapo sang pamilya kag sa gintangdo nga mga manugtatap.

Ang isa ka tampad kag makasuntok nga modernong-adlaw nga drama ipakita sa Domingo sang aga. Sa hapon, ang mabaskog nga lektura sa publiko nga “­Peace at Last!—When God ­Speaks” mangin isa sang daku nga mga bahin sang kombension. Wala sing duhaduha nga ang tanan nga magatambong sa kombension magapauli nga nasangkapan sing bug-os sang paghidait sang Dios sa paghimo sang iya kabubut-on.

Busa, magkari para sa apat ka adlaw nga may maayong espirituwal nga gana, nagakabalaka sing bug-os sa inyo espirituwal nga kinahanglanon. (Mateo 5:3) Iskedyula ang inyo mga hilikuton agod nga makaabot kamo nga sibu sa oras para sa nagabukas nga ambahanon kag pangamuyo sa kada adlaw. Magkari nga nasangkapan sa pagkuha man sing mga nota, kay ang pagsulat sang yabi nga mga punto makabulig sa imo sa pagkonsentrar sa ginasiling sang humalambal. Dugang pa, paagi sa amo ang mga ideya nga ginapabutyag magasalop sing tudok pa sa imo tagipusuon kag hunahuna.

Apang indi naton pagkalimtan ang kamatuoran nga ang putli nga pagsimba kay Jehova nga Dios indi lamang isa ka butang sang pagbaton. Isa man ini ka butang sang paghatag. Luyag naton dumdumon ang prinsipio sang Biblia: “Sia nga nagasab-ug sing bunga magaani man sing bugana.” (2 Corinto 9:6) Kapin pa sa sina, sanglit nagsiling si Jesus nga “may kapin nga kalipay sa paghatag sang sa pagbaton,” tigayunon naton ang labing daku nga kalipay nga posible sa kombension paagi sa paghatag sang daku nga masarangan naton, nga nagaboluntaryo sang aton mga serbisyo. (Binuhatan 20:35) Sa pagkamatuod, indi gid dapat nga magpakiluoy pa para sa boluntaryo nga bulig.

Dugang pa, tamdon naton sing serioso ang aman para sa pagpakigbahin sa pagpanaksi sa Biernes sang hapon. Kag kabay nga magbantay kita sa sulod sang apat ka adlaw para sa mga kahigayunan nga makahimo sing dipormal nga pagpanaksi. Nagapahanumdom ini sa aton sang isa pa ka prinsipio sa Biblia: Ang maalwan nga kalag magabugana, kag sia nga nagabunyag pagabunyagan. (Hulubaton 11:25) Huo, agdahon naton ang tanan nga masarangan naton sa pagtuon para sa ila kaugalingon kon paano ang mga Saksi ni Jehova nagakalipay gid sa balaan nga paghidait.