Indi Magtanom sing Kaakig
AYHAN makahalangkat gid nga likawan ang maghinakit kon masaklaw kita sang iban. May praktikal nga laygay ang Biblia para sa subong sina nga mga kahimtangan. “Magpangakig,” sulat ni apostol Pablo, “apang dili magpakasala; dili pagpatunuri sing adlaw ang inyo kaakig.”—Efeso 4:26.
Kon ang iban makasala sa aton, normal lamang nga magbatyag kita sing isa ka kadakuon sang kaakig. Ang pagsiling ni Pablo nga “magpangakig” nagapahangop nga ang kaakig mahimo nga nagakaigo kon kaisa—ayhan subong reaksion sa dimakatarunganon nga pagtratar ukon inhustisya. (Ipaanggid ang 2 Corinto 11:29.) Apang kon pabay-an nga indi mahusay, bisan ang makatarunganon nga kaakig mahimo bangdan sang makahalalit nga mga resulta, nga magadul-ong sa daku nga sala. (Genesis 34:1-31; 49:5-7; Salmo 106:32, 33) Gani, ano ang imo mahimo kon ginapukaw ikaw nga mangakig?
Sa kalabanan nga kaso nga nagadalahig sa diutay nga mga sala, sarang mo mahusay ang kahimtangan sa imo tagipusuon “kag maghipos” ukon magpalapit sa nakasala kag hambalan ang hulusayon. (Salmo 4:4; Mateo 5:23, 24) Bisan diin man sa sini, labing maayo nga husayon sa gilayon ang problema agod indi magsingkal ang kaakig kag magbunga sing makapasubo nga mga resulta.—Efeso 4:31.
Si Jehova bug-os nga nagapatawad sang aton mga sala, bisan ang mga sala nga sing walay hinalung-ong ginahimo naton. Indi bala mahimo nga patawaron man naton ang diutay nga mga sala sang isa ka isigkatawo?—Colosas 3:13; 1 Pedro 4:8.
Sing makawiwili, ang Griegong tinaga para sa “pagpatawad” literal nga nagakahulugan sing “buy-an.” Ang pagpatawad wala nagakahulugan nga pakadiutayon naton ukon pabay-an ang sala. Kon kaisa mahimo nga ang dapat lamang himuon amo nga buy-an ang kahimtangan, bangod narealisar naton nga ang pagtanom sing kaakig magapabug-at lamang sang imo lulan kag makaguba sang paghiusa sang Cristianong kongregasyon. Dugang pa, ang pagtanom sing kaakig makahalit sa imo panglawas!—Salmo 103:9.