Kon Ngaa Dapat Ka Magtambong sa “Balaan nga Paghidait” nga Kombension

Sa tion nga ang nagakatabo karon amo ang terorismo, rebolusyon, kag inaway, daw ano kaayo nga sugod sini nga bulan makatambong ikaw sa “Balaan nga Paghidait” nga Kombension sang mga Saksi ni Jehova! Makabaton ka didto indi lamang sing praktikal nga Cristianong instruksion sa paghupot sing paghidait kundi aktuwal nga makita mo ang linibolibo nga nagaaplikar sina nga instruksion.

Mangin didto sugod sa nagabukas nga sesyon sa ala 1:30 sang Huebes sang hapon. Makabati ikaw gikan sa madugay na nga mga manugwali sing paghidait. Subong man, maton-an mo ang mga siod sa sosyal nga kalingawan kag kon paano likawan sila. Kag sa konklusyon sang sesyon, may mabaton ikaw nga indi lamang matahom kundi mapuslanon sa pagministeryo sa iban.

Ang programa para sa Biernes sang aga magapresentar sang keynote address nga, “Balaan nga Paghidait Para sa mga Tinudloan ni Jehova.” Matandog gid ikaw sang drama nga “Pagtipig sang Kabuhi sa Panahon sang Tiggulutom.” Indi pagwasiha ini!

Sa Sabado, ang mga demonstrasyon, mga interbyu, kag ang makatudlo nga mga diskurso magahatag sing praktikal nga panuytoy para sa paghupot sing paghidait sa sulod sang pamilya. Ang programa magahinakop paagi sa importante nga pamulongpulong nga “Kalig-onan sa Bug-os nga Kalibutan sa Idalom sang ‘Prinsipe sang Paghidait’.”

Sa Domingo sang aga ang isa ka prangka, mabaskog sing punto nga modernong-adlaw nga drama ipresentar nga nagapadaku sang kinahanglanon nga pangitaon ang pagkamatarong sang Dios agod maluwas. Sa hapon, ang mabaskog nga pamulongpulong publiko nga, “Paghidait sa Katapusan!—Kon Dios ang Maghambal,” mangin isa pa ka daku nga bahin sang kombension.

Sanglit 27 ka kombension ang naiskedyul sa Pilipinas lamang, may yara kombension nga indi malayo sa imo puluy-an. Pamangkota ang mga Saksi ni Jehova sa lokal tuhoy sa petsa kag duog sang kombension nga pinakamalapit sa imo.