Mga Pamangkot Gikan sa mga Bumalasa
◼ Sa dumaan nga Israel ang siklo sang 49 ka tuig ginsundan sang isa ka tuig sang Paghinugyaw (ang ika-50 nga tuig). Ina bala nga Paghinugyaw nagatumbas sa panahon sa tapos sang semana sang pagpanuga sang Dios nga 49,000 ka tuig?
Bangod ang numero nga 49 makita sa duha ka kaso, daw subong bala nga ang Paghinugyaw nagalandong sang tion nga magasunod sa katapusan sang semana sang pagpanuga nga 49,000 ka tuig. Apang para sa katawhan sa kabilogan nga nakabaton sang kahamuot sang Dios, ang natabo sa tion sang Paghinugyaw sang Israel nagatumbas sa mahanabo sa tion sang Milenio, ang katapusan nga isa ka libo ka tuig sinang semana sang pagpanuga, indi ang magasunod sa tapos sina nga semana. Binagbinaga ang sadsaran sini:
Una, ang Mosaikong Kasugoan nagpatuman nga ang kada ikapito ka tuig mangin inugpahuway para sa duta; wala sing tanum nga isab-ug, kultibaron, ukon anihon. Sa tapos sang ikapito nga tuig nga Inugpahuway (ang ika-49 nga tuig), amo ang pinasahi nga tuig sang Paghinugyaw, ang ikakalim-an nga tuig. Isa yadto ka inugpahuway nga sa tion sini papahuwayon liwat ang duta. Kapin pa ka importante, ginabantala ang kahilwayan. Ang mga Hebreo nga nagbaligya sang ila kaugalingon sa pagkaulipon ginahilway gikan sa utang kag pagkaulipon. Subong man, ang pinanubli nga duta ginabalik sa mga pamilya nga napilitan sa pagbaligya sini. Gani ang Paghinugyaw isa ka tion sang kahilwayan kag pagpasag-uli para sa mga Israelinhon.—Levitico 25:1-46.
Ikaduha, ang pagtuon sang katumanan sang tagna sa Biblia kag sa kon diin na kita sa lakat sang tion mabaskog nga nagapakita nga ang tagsa sang mga adlaw sang pagpanuga (Genesis, kapitulo 1) may kalawigon nga 7,000 ka tuig. Ginahangop nga ang paghari ni Cristo sa isa ka libo ka tuig magatapos sang 7,000 ka tuig nga ‘adlaw sang pagpahuway’ sang Dios, ang katapusan nga ‘adlaw’ sang semana sang pagpanuga. (Bugna 20:6; Genesis 2:2, 3) Pasad sa sining pangatarungan, ang bug-os nga semana sang pagpanuga may kalawigon nga 49,000 ka tuig.
Bangod sang pagkaanggid sang mga numero, ginpaanggid sang iban ang 49 ka tuig sang dumaan nga siklo sang Paghinugyaw sa 49,000 ka tuig sang semana sang pagpanuga. Bangod sini nga pagpangatarungan, nagdumdom sila nga ang Paghinugyaw sang Israel (ika-50) nga tuig nagalaragway, ukon nagalandong, sang maabot sa tapos sang katapusan sang semana sang pagpanuga.
Apang, dumduma nga ang Paghinugyaw isa ka tuig sang kahilwayan kag pagpasag-uli para sa katawhan. Ang semana sang pagpanuga may daku nga kaangtanan sa planeta nga Duta kag sa pag-uswag sini. Apang tuhoy sa pagkatuman sang katuyoan sang Dios para sa tawo sa duta, ang globo wala ginbaligya sa pagkaulipon kag sa amo wala nagakinahanglan sing kahilwayan. Ang katawhan amo ang nagakinahanglan sina, kag ang tawo nagluntad, indi sa sulod sang 49,000 ka tuig, kundi sa sulod lamang sang mga 6,000 ka tuig. Ang Biblia nagapakita nga sang pila ka tion sa tapos gintuga si Adan kag si Eva, nagrebelde sila batok sa Dios, sa amo naulipon sa sala, dikahimpitan, kag sa kamatayon. Suno sa Roma 8:20, 21, si Jehova nga Dios nagtuyo nga hilwayon ang tumuluo nga katawhan gikan sa sining pagkaulipon. Subong resulta, ang matuod nga mga sumilimba sa duta “hilwayon gikan sa pagkaulipon sa kaduluntan kag makaagom sing mahimayaon nga kahilwayan sang mga anak sang Dios.”—Tan-awa man ang Roma 6:23.
Bisan pa napatawad na ang mga sala sang diutay nga grupo nga napilian nga mapalangit sugod sang Pentecostes 33 C.E. kag sa amo nagabenepisyo na sa Paghinugyaw, ginapakita sang Kasulatan nga ang kahilwayan sang tumuluo nga katawhan mahanabo sa tion sang Milenio nga Paghari ni Cristo. Matabo ina kon iaplikar na niya sa katawhan ang mga benepisyo sang iya halad nga gawad. Sa katapusan sang Milenio, ang katawhan nabayaw na sa tawhanon nga pagkahimpit, nga hilway sing bug-os gikan sa napanubli nga sala kag kamatayon. Bangod nalaglag na ang katapusan nga kaaway (kamatayon nga ginpaliton ni Adan), ibalik ni Cristo ang Ginharian sa Amay sa katapusan sang 49,000 nga tuig sang semana sang pagpanuga.—1 Corinto 15:24-26.
Busa, para sa tumuluo nga katawhan nga may dutan-on nga paglaum, ang kahilwayan kag pagpasag-uli nga nagtanda sang tuig sang Paghinugyaw sa dumaan nga Israel nagakaigo nga nagatumbas sa tion sang nagapakari nga Milenio nga Inugpahuway. Nian maeksperiensiahan ang kahilwayan kag pagpasag-uli. Mahanabo ina sa idalom sang paggahom ni Cristo, “kay ang Ginuo sang adlaw nga inugpahuway amo ang Anak sang tawo.”—Mateo 12:8.