Report sang mga Manugbantala sang Ginharian

“Makatilingala nga Distrito nga Kombension”

AMO ini ang ulong-dinalan sang pamantalaan sa Martinez de la Torre, Veracruz, Mex­i­co, nahanungod sa kombension sang mga Saksi ni Jehova nga ginhiwat sa sadto nga siudad. Ang pamantalaan nagkomento: “Ang daku nga tumalambong sa distrito nga kombension sang [mga Saksi ni Jehova] nga ginhiwat sa lokal nga Ex­po­si­tion ­Grounds amo ang labing talunsay nga pasundayag sang isa ka tumalagsahon nga hitabo sa bug-os nga kalibutan sa aton adlaw: ang nagadugang nga indi pagsalig sang katawhan sa mga doktrina sang ginatawag nga ‘Cristianong’ mga iglesia kag ang malig-on nga pagpati nga ang kadakuon sang mga problema indi masarangan nga lubaron sang gahom sang mga pangulohan.

“Wala pa sing politikal nga miting ukon sosyal nga hitabo nga gintambongan sang subong kadamo nga kadam-an nga may kahim-ong kag katinlo. Makatilingala gid tan-awon ang 5,000 ka tawo nagasunod sang isa ka programa nga nasentro sa impormasyon gikan sa Biblia kag nagabinagbinag sang mga bahin sang adlaw-adlaw nga pagkabuhi halin sa pagpadaku sa kabataan kag pagpuyo sing tingob subong isa ka pamilya tubtob sa moralidad kag espirituwal nga kapagros, upod ang sugilanon sa Biblia nga ginadrama kag ang aplikasyon sini sa modernong mga tion.”

Sa tapos magkomento tuhoy sa “daku nga pasundayag sang may paghilituhog nga katalunsay kag organisasyon,” ang balita nagsiling: “Ang pagkaimportante sang hilikuton nga ginahimo sang lokal nga mga Saksi ni Jehova matakus sang mga resulta nga natigayon sa nagligad nga pila ka tuig lamang. Sa karon isa ini ka katilingban nga nagauswag sing daku, nga wala gid nagakabalaka nahanungod sa negatibo nga mga komento nga sa masami nagalibot sa ila. Ang bisan anong negatibo nga butang nga ihambal batok sa ila nagakadula kon mapanilagan sang isa ang ila tindog sa mga butang nga nagalibot sa ila, ang mahim-ong nga paagi sang ila pagdamo, ang ila pagtahod sa awtoridad, kag ang daku nga apresasyon nila sa pagkatinlo kag maayong panghambal.

“Ining mga estudyante sang Biblia ginahuman sang halos 100 por siento sang aktibo nga mga katapo anay sang nanuhaytuhay nga relihion, ang kalabanan Katoliko, nga nakatalupangod sang pagkahuyog sang relihion sa politika kag sang pagbaton sini kag pagkahamuot sa di-Biblikanhon nga mga buhat subong sang pagsamo sang pagtuluohan, imoralidad, kag kasingki. Nakasapo sila sing kaayawan sa pagpahisuno sa Makasulatanhon nga mga prinsipio sang paggawi nga wala nagaliso sa pagsimba sa idolo ukon mga tradisyon nga indi sigurado ang ginhalinan. Nakahatag ini sa ila sing dalayawon nga paghiusa sa pagtuo nga nagapatuhay sa ila bisan diin man sila makit-an.”

Ining mga komento nagapahanumdom sa aton sang prinsipio nga ginsiling ni Jesus: “Paagi sa ila mga bunga makilala ninyo sila.” (Mateo 7:16) Madamo sang bunayag sing tagipusuon nga mga tawo sa Mex­i­co ang nagakilala sa Pagkamakasulatanhon sang mga panudlo sang mga Saksi ni Jehova, ang nagapakig-upod sa ila, kag bugana nga ginapakamaayo sa espirituwal ni Jehova nga Dios.

[Laragway sa pahina 29]

Tipiko nga danyag sang kombension sa Mexico