Kahulugan sang Balita

Paghambalanay sang mga Katoliko kag mga Marxista

Sa Buda­pest, Hungario, sang Oktubre 1986, 15 ka Katolikong mga teologo kag mga pilosopo ang nakigsapol sa 15 ka Marxista nga mga intelektuwal. Ang sinapol ginhiwat sang Vati­can Secre­tariat for Un­be­lievers kag sang Hunga­rian Aca­demy of Sci­ence agod hambalan ang ebolusyon sang mga kabilihanan sa moral.

Ang mga Katoliko nga nagtambong amo ang Pranses nga si Kar­dinal Poupard, tsirman sang Sec­retariat for Un­believers, kag ang ­taga-Austria nga si Kardinal Koe­nig, isa ka espesyalista sa mga relasyon sang Iglesia Katolika sa komunista nga mga pungsod. Ang Marxista naglakip sa mga pangulo sang Hun­garian Ins­ti­tute of Philoso­phy kag sang Soviet Ins­ti­tute of Scien­ti­fic Athe­ism.

Ang Pranses nga pamantalaan nga Le Monde nagreport: “Ginakilala sang Marxista nga mga intelek­tuwal nga nagaatubang sila sang krisis sa mga kabilihanan sa moral, ang kabug-at sini ginatakus nila paagi sa kadamuon sang mga paghikog, paggamit sang droga, kag pagkonsumo sang alkohol. Suno sa Katolikong delegasyon, sa pagpangita nila sing solusyon ginakinahanglan nila [mga Marxista] ang kooperasyon sang Cristianong mga iglesia. Sa bahin sang Romanong [Katoliko], ang duha ka katuyuan amo ang pagbanabana sing maayo kon paano ang tawo kag ang mga moral nagakabagay sa isa ka Marxista nga katilingban kag sa ‘pag-usisa sang moral nga sadsaran para sa mapag-on nga paghidait sa ulot sang mga Cristiano sa Nasidlangan [komunista] nga mga pungsod kag sang mga Marxista.’”

Ang matuod nga solusyon sa mga problema karon sa moral indi masapwan sa mga komperensia sa ulot sang nagasumpakilay nga mga ideo­lohiya. Sa baylo, masapwan ini kon ang Ginharian ni Jehova sa mga kamut sang iya Anak, si Jesus, magalaglag sang karon nga sistema sang mga butang, kag nagatukod sa lugar sini sang bag-ong kalibutan sa idalom sinang langitnon nga Ginharian.—Daniel 2:44; Bugna 21:4, 5.

Matuod nga Kahilwayan?

Ang teolohiya sa kahilwayan—isa ka hublag nga nagakondonar sang kasingki subong ang paagi sa “paghilway sa imol kag ginapigos,” labi na sa Ikatlong Kalibutan, dugang nga nagabantog. Amo ini ang topiko nga ginhambalan sa Ikaduhang Internasyonal nga Asambleya sang Ekumeniko nga Asosasyon sang mga Teologo sa Ikatlong Kalibutan nga ginhiwat sa Oax­tepec, Mex­i­co, sang Disiembre 8-13, 1986. Ngaa ining relihiosong mga eskolar determinado gid sa ila tulumuron nga pagbalhin sang katilingban sang sa nagligad?

Bisan pa nga sang 1985 ang Batikano nagpaguwa sang instruksion nga nagapakamalaut sang teolohiya sa kahilwayan, ang Instruction on Christian Freedom and Liberation nga ginpaguwa sang 1986 nagsiling nga “nagakabagay gid nga ang mga nagaantos sing pagpigos sa mga manggaranon ukon sa mga gamhanan sa politika magahulag.” Ang “armado nga paghimud-os” ginakahamut-an karon subong ang “katapusan nga paagi.”

Apang, samtang yari sa duta, naulamid bala si Jesucristo sa mga hublag sa katilingban sang kalibutan? Wala, sa kabaliskaran, sang si apostol Pablo naggamit sang “espada” agod pangapinan ang Anak sang Dios, ginsaway sia ni Jesus paagi sa pagsiling: “Itagub ang imo espada, kay ang tanan nga nagagamit sang espada sa espada mapatay.” (Mateo 26:52) Ang Biblia nagasaad nga ang matuod nga kahilwayan magaabot paagi sa balaan nga pagpasilabot kon ang Dios magakuha sa kalibutan indi lamang sang kaimulon, internasyonal nga pinuyas, pagkamaynadampigan sa rasa, kag pagpigos, kundi subong man sang luha, kasakit, kasubo, kag kamatayon. (Bugna 21:4) Sa pagkamatuod, mangin matuod nga kahilwayan ini!

Bawtismo sa Kabataan Ginsikway

Ang isa ka Aleman nga Protestante nga ministro halin sa Frank­furt sining karon lang nagpahibalo sa mga awtoridad sang simbahan nga indi sia “magabawtismo sa wala sing hinalung-ong nga kabataan sang iya parokya.” Nagapaathag kon ngaa ang iya kaugalingon nga pagbawtismo subong lapnag indi takus sa ngalan nga bawtismo, ang 58 anyos nga si ­Klaus Hoff­man nagsiling: “Wala sini ginatuman ang kinahanglanon sang bawtismo sa Biblia, nga amo ang pagtuo, kag wala ini sing nagakaigo nga simbulo, nga amo ang pagtum-oy.” Bilang pagsakdag sa iya pagtamod, ginpakamaayo niya nga magpabawtismo liwat kag busa “nakaagi sing bawtismo sang pagtum-oy sang Biblia,” report sang Aleman nga pamantalaan nga Frank­furter Allgemeine Zeitung.

Sang primero, ginsuspende sang mga opisyales sang iglesia si Hoff­man gikan sa tanan nga katungdanan, apang ang pamatbat ginpaubos sa “isa ka pagbiya sa sulod sang tatlo ka bulan sa tuyo nga magpanalawsaw.” Kag ano ang resulta? Ang pamantalaan nagabalita nga ang iya dugang nga pagpanalawsaw sa bagay naglig-on gid “nga ang Biblia wala nagasakdag sang pagbawtismo sa lapsag. Subong man, wala sing ginasiling ang mga sinulatan sang nahaunang Cristiano tuhoy sa pagpakilala sini nga buhat tubtob lamang sang ikatlo nga siglo.”

Sing dimakakilibot, ginsitar sang relihioso nga mga awtoridad ang tradisyon subong ang sadsaran para sa sini nga buhat. Apang, walay sapayan sining mga katunayan, ang pagbawtismo sa lapsag padayon nga ginabuhat sa halos kalabanan sang Cristiandad. Ina bala nga pagsakdag sang klerigo nagahimo sini nga husto? Ginsugo ni Jesus ang iya mga sumulunod nga magbawtismo, indi sang mga lapsag, kundi sang mga tumuluo nga gintudluan sa pagtuman sang tanan niya nga mga sugo. Sia mismo indi isa ka lapsag kundi “mga katloan ka tuig ang edad” sang gintum-oy sa tubig sang Suba sang Jordan.—Lucas 3:21-23; Mateo 28:19, 20.