“Ang Bug-os nga Tinuga Padayon nga Nagaugayong”—Ngaa?

ANG una nga lalaki kag babayi nagtalikod sa Dios. Apang sa tapos matigayon ang “kahilwayan” nga ginhandum nila, sila na karon ang magdumala sang ila mga hilikuton sa labi nga masarangan nila. Wala madugay natukiban nila nga ang labing maayo sa ila kulang pa. Ang kakulang sing eksperiensia kag limitado nga ihibalo nagdul-ong sa mga problema.

Amo kon ngaa madamo sa aton ang nabiktima sang pag-ihig-ihig ukon inhustisya. Amo kon ngaa kita tanan naulipon sa tawhanon nga pagkadihimpit, amo kon ngaa nagamasakit kita, indi normal nga nagaantos sa lawas kag hunahuna, kag nagapatulo sing mga luha sang kasubo. Ukon, subong ginpabutyag sa hambal sang Biblia, amo kon ngaa “ang bug-os nga tinuga padayon nga nagaugayong sa kasakit sing tingob tubtob karon.”—Roma 8:22.

Sa amo ang una nga pagtinguha sang tawo sing kahilwayan amo ang nag-ulipon sa iya. Sa sulod sang 60 ka siglo na karon, nagatinguha sia sa paghilway sang iya kaugalingon gikan sa malain nga mga epekto sini. Apang ano ang kadalag-an?

Politikal nga Kahilwayan

Gin-eksperimentohan sang tawo ang tanan nga sahi sang pangulohan. Ang mapiguson ukon indi makatarunganon, ukon ang napaslawan sa paghatag sang kinahanglanon sang katawhan, ginsikway ukon masingki nga ginpukan kag gin-islan sing iban—apang indi pat-od ang mga resulta.

Ang dyurnalista nga si Lance Morrow, naghambal nahanungod sa politikal nga mga rebolusyon: “Ang maragtas nagparada sing madamo gid nga utopianhon nga drama sang pagbag-o nga ang resulta pareho lang ka totalitaryanhon, pareho lang ka manugpatay sa pagginahom nga ginbuslan—kadalag-an sang malauton nga mga panatiko batok sa eksperiensia.”

Ang pag-ilis sing dihimpit man nga pangulohan sa isa ka dihimpit nga pangulohan indi amo ang paagi sa pagpahanabo sing matuod nga kahilwayan. Busa, ang maalam nga si Hari Solomon gin-inspirar sang Dios sa pagsulat: “Ang tawo naggahom sa tawo sa iya kasamaran.” (Manugwali 8:9) Sing maathag, ‘ang bug-os nga tinuga [padayon] nga magaugayong sa kasakit’ tubtob himuon sang himpit nga pangulohan ang kahilwayan gikan sa dihimpit nga paggahom nga isa ka katunayan.

Kahilwayan Gikan sa Pagdampigdampig sang Pungsod kag Rasa

Ang rasyal ukon pungsodnon nga mga pagdampigdampig talangkod nga nagasumpakil sa mga kamatuoran sang Biblia nga “ginhimo [sang Dios] ang tagsa ka pungsod sang mga tawo” kag nga “ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang katarungan kalahamut-an sa iya.” (Binuhatan 17:26; 10:34, 35) Apang ang mga tawo nga nagatinguha sing tupong nga pagtratar masami nga napaslawan sa pagtigayon sini, bisan sa mga pungsod nga nagapangangkon subong Cristiano.

Halimbawa, binagbinaga ang itom nga rasa. Ang iban nga ginatawag nga mga Cristiano nagasiling nga ang itom nga duag sang panit resulta sang pagpakamalaut sang Dios kay Canaan kag sa iya mga kaliwat, kag naghimo sa iya nga ulipon. Sayop sila sa sini. Ang itom nga rasa wala maghalin kay Canaan kundi kay Cus kag ayhan kay Put. Kag pareho nga wala sila ginpakamalaut.—Genesis 9:24, 25; 10:6.

Walay sapayan sining kamatuoran, nasapwan sang mga itom nga pirme sila ginapigos sa katilingban kag sa pangabuhi bisan sang kapareho nila nga mga itom. Luyag nila mahilway. Apang ang ila mga kahublagan para sa kahilwayan, walay sapayan sang mga welga kag mga martsa sa pagprotesta, wala magmadinalag-on sing bug-os. Bangod indi nila mabalhin ang tagipusuon sing bug-os, napaslawan sila sa pagdula sang pagdampigdampig sa rasa, relihioso nga pagkawalay hinalung-ong, kag kakulang sing gugma sa isigkatawo.

Gani ‘ang bug-os nga tinuga [padayon] nga magaugayong sa kasakit sing tingob’ tubtob nga dulaon sang Ginharian sang Dios ang pagdampigdampig sang rasa paagi kay Cristo.

Ang Kahilwayan sang mga Babayi

Sa bug-os nga siglo, ang mga babayi gin-abusohan kag masami nga ginkabig subong segunda klase nga tawo. Indi ini sayop sang ila Manunuga. Wala niya pagtugaha ang babayi agod tamdon sia sang lalaki para sa sekso lamang. Kag wala man gintudloan ang lalaki nga pintasan sia. Subong asawa sang lalaki, sia mangin “kabulig” niya, agod mag-alagad “subong komplemento niya,” agod mangin “isa ka unod” upod sa iya.—Genesis 1:26-28; 2:18-24.

Ang paghandum ni Eva sing kahilwayan gikan sa mahigugmaon nga awtoridad sang Dios nagresulta indi sa kahilwayan kundi sa mapintas nga pagpigos. Nakita na ini, ang Dios nagtagna: “Ang imo handum mangin sa imo bana kag sia magagahom sa imo.” (Genesis 3:16) Para sa madamo nga babayi, ang pagdominar sang dihimpit nga mga lalaki indi gid makalilipay, kag pila ka kahublagan sang mga babayi ang nagtinguha sa pagdula sini.

Apang ang Kahublagan para sa Kahilwayan sang mga Babayi, bisan pa nagresulta sa pila ka pagbalhin para sa kaayohan, napaslawan bangod batok ini sa balanse nga kahilwayan nga ginasaad sang Dios. ‘Ang bug-os nga tinuga [padayon] nga magaugayong sa kasakit sing tingob’ tubtob nga matudloan sang Ginharian sang Dios ang tanan nga lalaki sa paghigugma sang “ila mga asawa subong sang ila kaugalingon nga mga lawas” kag sa pagtratar sa “magulang nga mga babayi subong nga mga iloy, manghod nga mga babayi subong nga mga utod sa bug-os nga kaputli.”—Efeso 5:28; 1 Timoteo 5:2.

Apang antes ipaathag kon paano ina nga adlaw magaabot, dapat naton anay sabton ang isa pa ka importante nga pamangkot. Paano dapat tamdon sang mga Cristiano ang mga kahublagan karon para sa kahilwayan?

[Kapsion sa pahina 4]

Ang pag-ilis sing isa ka dihimpit nga pangulohan sa isa pa ka dihimpit nga pangulohan indi amo ang solusyon para sa matuod nga kahilwayan

[Kapsion sa pahina 5]

Ang paglalis sang mga banwahanon, mga welga, kag mga martsa sa pagprotesta indi makapabag-o sang mga tagipusuon

[Kapsion sa pahina 5]

Ang Kahublagan para sa Kahilwayan sang mga Babayi napaslawan bangod batok ini sa balanse nga kahilwayan nga ginasaad sang Dios