Nakita Ko nga Maayo si Jehova

Gin-asoy ni Lennart Johnson

SANG Domingo, Hulyo 26, 1931, ikaduha nga presidente sang Watch Tower Bible and Tract Society, si J. F. Ruth­er­ford, naghatag sing pamulongpulong “Ang Ginharian, ang Paglaum sang Kalibutan” sa koliseum sang Co­lum­bus, Ohio. Ang amon pamilya sa Rock­ford, Il­li­nois, nagpamati sa sini sa radyo. Katorse anyos lamang ako sadto, apang ining programa, daw subong bala, nga nagbutong sang madamol nga kurtina gikan sa akon mga mata.

Bisan pa ang akon amay interesado sa mensahe sang Ginharian, kag sang ulihi ang akon utod nga lalaki man, ang akon iloy wala magsapak. Napatay ang akon amay sang masunod nga tuig, sang 1932. Ang iban nga mga palayag sang Watch Tower nagpadayon sa pagpakaon sa akon sa espirituwal, apang, sang Abril 1933 lamang nga nakit-an ko ang duog nga ginatipunan ang mga Saksi ni Jehova, mga milya ang kalayuon sa pihak sang suba.

Nakibot gid ang diutay nga grupo didto sang makita nila ang isa ka niwangon nga tin-edyer nga nagbisikleta pakadto sa ila miting agod magtuon sa Vindication Tolon-an Dos! Sa tagsa ka miting, nagdugang pa ang akon naton-an kag duha ka bulan sang ulihi nalipay ako sa pagsugod sa pagpamalaybalay nga dala ang mensahe sang Ginharian. Ginbawtismuhan ako sa rehiyonal (karon sirkito) nga asambleya sadto gihapon nga tuig.

Sa tapos sang buhi sa eskwelahan kada adlaw, nagahinguyang ako sing mga isa ka oras sa pagduaw sa mga kaingod sa palibot sang amon puluy-an nga dala ang mensahe sang Ginharian. Nakatigayon man ako sing kahigayunan sa pagpanaksi sa eskwelahan. Halimbawa, ang isa ka kurso nagtudlo sang teoriya sang kalayuhon nga impierno kag sang pagpaantos. Nagtiklod ini sa akon sa paghatag sing Makasulatanhon nga pamatuod nga ang mga patay wala nagaantos kundi, sa baylo, wala sing pangalibutan sa ila mga lulubngan nga may palaabuton nga banhawon. Gintugutan ako sang manunudlo nga basahon sa atubangan sang bug-os nga klase ang akon ginhanda nga paathag.

Ang Bug-os-Tion nga Ministeryo

Sang Mayo 1935, nagtambong ako sa kombension sa Wash­ing­ton, D.C., nga sa diin ginpadaku ang pagpayunir (bug-os-tion nga ministeryo). Pagpauli ko, ginsulatan ko ang Watch Tower Society, kag wala lamang nila ako ginpadalhan sing listahan sang matigayon nga mga teritoryo kundi, sa akon kakibot, ginlakip man nila ang pila ka plano para sa pagtukod sing ­house trail­er. Sadtong mga adlaw ang pagpayunir masami nga nagakahulugan sa pagkadto sa bag-o nga mga duog, kag ang trail­er amo ang ginapuy-an sang isa. Gani namat-od ako sa pagtigayon sing awto kag sing trail­er agod nga mapadayon ko ang akon bug-os-tion nga ministeryo.

Samtang sa wala pa yadto, nadalahig ako sa paggamit sing ­sound car nga nabakal sang amon kongregasyon sa pagbantala sing mensahe sang Ginharian. Sang ang isa pa ka utod kag ako gin-agda sa Mon­roe, Wisconsin, agod gamiton ini, nakilala ko kag sang ulihi ginpakaslan ko si Virginia El­lis. Nagbuligay kami sa pagtigayon sing awto kag sing trail­er agod gamiton sa pagpayunir!

Sang tigragas sang 1938 napatay ang akon iloy, kag sadto nga tion ginsulatan kami ni Har­old Wood­worth gikan sa New Mex­i­co: “Dali kamo diri; daku ang kinahanglanon.” Gani nagkadto kami sa New Mex­i­co, nga isa ka paglakbay sing mga 1,600 kilometros. Sa isa ka direksion sa dalanon, may nag-abot sa amon nga isa ka telegrama. “Pauli kamo,” siling sini. Gintanyagan ako sing mataas sing suweldo nga trabaho nga may maayo gid nga kahigayunan sa pag-uswag. Gingisi ko ang telegrama. Kon ginbuligan kami ni Jehova sa paghanda para sa pagpayunir, indi ko pagtugutan ang bisan ano sa pagbalabag!

Sang Marso 1939, ginsugdan namon ang amon pagpayunir sa ­Hobbs, New Mex­i­co. Isa ini ka pungsod nga madamo sing baka; madamo man diri sing duluawon nga bag-o nga mga kabalayan sa latagon nga kuluhaan sing langis. Ang diutay nga kongregasyon diri nagatipon kon Biernes kag Domingo, gani nagadala kami sing mga literatura, tubig, kalan-on, diutay nga pugon, kag pilo-pilo nga teheras kag nagahinguyang sang Lunes tubtob Biernes sang hapon sa pagbantala sa uma nga mga bahin. Pag-abot sang gab-i, nagatulog kami sa kagulangan nga ang atop namon amo ang langit kag malapit sa latagon sang langis nga amo ang “sulu” namon sa pagtabog sa mga rat­tle­snakes. Ginahinguyang namon ang talipuspusan sang semana sa banwa upod sa kongregasyon.

Pagligad sang pila ka bulan sa sini nga iskedyul, ginpadala kami sang Sosiedad sa Ros­well kag dayon sa Albu­quer­que, New Mex­i­co. Gingamit namon diri liwat ang ­sound car, nga epektibo gid sa pagpanaksi sa mga minuro sang mga India didto. Sang magsugod ang bag-o nga hilikuton sa pagpanaksi sa kalye paagi sa aton mga magasin sang maaga nga bahin sang 1940, nalipay kami sa pagpakigbahin sa sini upod sa mga kauturan sa Albu­quer­que.

Pagpamatok sa Tion sang Inaway

Ang ikaduha nga inaway kalibutanon nagsugod sa Europa sang nagligad nga Septiembre, kag nagsugod ang panahon sang mapintas nga paghingabot bangod sang amon neutral nga tindog sa pagpakigbahin sa inaway. Sang isa ka bes ang akon kamisadentro literal nga gingisi sa akon likod samtang nagapakigbahin ako sa ministeryo.

Sang tig-ilinit sang 1940, ang mga kauturan nagpanagtag sing mga magasin malapit sa El Paso, Tex­as, kag madamo sa ila ang naaresto. Sang masunod nga Lunes, si Har­old Wood­worth kag ako nagkadto agod buligan sila sa tion sang ila kasaba. Paagi sa pagpamangkot sa mga kauturan sa atubangan sang korte, napautwas ko ang mga punto nga nagadepensa sa ila. Sa tapos sila tanan madeklarar nga wala sing sala, ang balita sa pamantalaan nagtawag sa akon subong isa ka “palaabuton nga pamatan-on nga abogado gikan sa Al­bu­quer­que.” Apang sa pagkamatuod, si Jehova ang naghatag sa iya mga alagad sing kadalag-an sadto nga adlaw!

Sing kaanggid, ang amon kauturan nabilanggo bangod sa pagbantala sa lain naman nga siudad. Sa tapos ako magpakita sa korte sa pagdepensa sa ila, gindul-ungan namon ni Broth­er David Gray sing sulat ang tagsa ka opisyal sang siudad. Ang sulat nagpatalupangod sang legal nga kinamatarong sang mga Saksi ni Jehova sa paghimo sang ila hilikuton, kag nagpaandam ini nga kon ang mga Saksi padayon nga tublagon, ang mga opisyal amo ang manabat sa bisan ano nga halit nga mahimo magresulta.

Ginbaton sang meyor ang sulat kag ginbasa ini nga wala sing komento, apang ginsilingan kami sang hepe sang polisiya: ‘Diri sa Nakatundan, ang mga tawo nagalakbay halin sa banwa, kag . . . bueno . . . ang iban nagapangita sa ila sa ulihi, kag indi na sila makit-an.’ Apang, wala ginhimo ang pamahog; sa baylo, naglinong ang kahimtangan, kag wala pagdayuna sang korte ang aksion batok sa kauturan.

Sini nga tion gintangdo ako sang Watch Tower Society subong alagad sa sona (karon ginatawag manugtatap sa sirkito). Ang akon asaynment nagkobre sang daku nga bahin sang New Mex­i­co kag sang isa ka bahin sang ­Texas.

Gilead kag Asaynment sa Luwas

Sang 1943 si Virginia kag ako nakabaton sing imbitasyon nga mag-eskwela sa ikaduha nga klase sang Watch­tow­er Bi­ble ­School of Gil­ead. Sa tapos sang gradwasyon sang Enero 1944, gin-asayn kami sang primero sa pagpanghikot upod sa Kongregasyon sang Flat­bush sa Brook­lyn, Nueva York. Nagpuyo kami sa likod sang pabrika sang Sosiedad sa isa ka daan nga tinukod nga sang ulihi ginguba agod padakuon ang pabrika sa ­Adams ­Street.

Apang, sang ulihi nabaton namon ang amon asaynment sa Do­min­ican Republic, nga sa diin si Rafael Leónidas Tru­jil­lo Molina ang bug-os nga diktador. Sang mag-abot kami sang Do­min­go, Abril 1, 1945, si Virginia kag ako amo lamang ang mga Saksi sa pungsod. Nagkadto kami sa Victoria Hotel kag nangita sing dalayunan—$5 ang adlaw para sa amon nga duha, lakip ang kalan-on. Sadto gid nga hapon ginsugdan namon ang amon una nga pagtuon sa Biblia sa puluy-an.

Amo sini ang natabo: Ginhatag sa amon sang duha ka taga-Do­min­ican nga mga babayi nga amon ginatudluan sing Biblia sa Brook­lyn ang mga ngalan sang ila mga himata kag mga kilala, ang isa sa ila amo si Dr. ­Green. Sang ginduaw namon sia, nakilala man namon ang iya kaingod nga si Moses Rol­lins. Sa tapos namon masugid sa ila kon paano namon nakuha ang ila mga ngalan kag mga direksion, namati sila sing maayo sa mensahe sang Ginharian kag nag-ugyon sa pagtuon sa Biblia. Wala madugay si Moses nangin ang una nga lokal nga manugbantala sang Ginharian.

Sadto gid nga gab-i gin-updan kami ni ­Dr. Green sa pagpangita sing balay gikan sa ibabaw nga bahin sang duha sing panalgan nga bus. Sang ulihi nag-arkila kami sing diutay kongkreto nga balay didto sa kapital, Ciudad Tru­jil­lo (karon Santo Domingo). Sang Hunyo apat pa ka misyonero ang nagbuylog sa amon. Ginbuksan ang ikaduha nga puluy-an sang misyonero, kag kapin pa nga mga misyonero ang nag-abot. Pag-abot sang Agosto 1946 may kataason kami nga 28 ka manugbantala. Wala madugay madamo pa nga misyonero ang nag-abot, kag ginbuksan man ang mga puluy-an para sa ila. Nagsugod ang pag-uswag!

Pag-alagad sa Idalom sang Pagdumili

Sang 1950 nag-uswag kami tubtob sa kapin sa 200 ka manugbantala. Apang, bangod neutral gid ang mga Saksi ni Jehova, ginsugdan sang pangulohan ni Tru­jil­lo nga ilupot sa bilangguan ang amon pamatan-on nga mga utod nga lalaki. Nian, sing malain pa, bug-os nga gindumilian ang hilikuton sang mga Saksi ni Jehova sang Hunyo 21, 1950.

Bangod indi makatipon sa mga King­dom Hall, ang mga kauturan nagsugod sa pagtipon sing likom sa diutay nga mga grupo sa pribado nga mga puluy-an. Ginton-an namon didto ang mga artikulo sang Watchtower nga gin-mimeo­graph. Ginpakamahal sang tanan nga matutom ang espirituwal nga kusog nga padayon nga ginhatag ni Jehova sa ila sa sining diutay nga mga grupo sang pagtinuon.

Ang Domingo amo ang amon adlaw sa pagduaw sa madamo nga taga-Do­min­ican nga kauturan sa mga bilangguan ni Tru­jil­lo. Ginakapkapan kami sa amon pagsulod, kag ginausisa gid ang amon bug-os nga identipikasyon. Kon kaisa ginalibutan kami sang mga soldado kon kaupod namon ining mga kauturan, agod bantayan kami sing maayo. Sang isa ka okasyon ginbuylugan kami ni Stan­ley ­Aniol gikan sa Chi­ca­go, nga nagduaw sa iya misyonera nga anak nga si Mary (karon Mary ­Adams, nga nagaalagad sa Beth­el sa Brook­lyn). Natandog sang integridad sang pamatan-on nga mga utod nga lalaki sa Do­min­ican, ginhalukan sila tanan ni Broth­er ­Aniol sa atubangan sang nagatan-aw nga mga soldado.

Sang matapos ang pagduaw, samtang nagalakat kami sa daku nga kalye sang kumbuyahan, ginsundan kami sang isa ka salakyan nga puno sing mga tinawo ni Tru­jil­lo sing hinayhinay gid. Isa ini sang kilala gid nga mga metodo ni Tru­jil­lo sa pagpahadlok sa mga tawo. Sang ginsugiran namon si Broth­er ­Aniol kon ano ang ila ginaplano, wala gid sia ginhadlukan. Sa pagkamatuod, kinahanglan gid nga indi pagsapakon ang mga panikasog ni Tru­jil­lo sa pagpahog kag magsalig sing bug-os kay Jehova.

Kon kaisa, ginakadtuan kami sang mga impostor, mga espiya ni Tru­jil­lo, nga nagapakunokuno subong mga utod. Gani dapat kami ‘magmaalamon subong sang mga man-ug apang wala sing daya subong sang mga salampati.’ (Mateo 10:16) Gani ginatilawan namon ining mga tawo sing nagapangusisa nga mga pamangkot agod mahibaluan kon bala sila matuod gid nga mga kauturan namon ukon indi.

Sa tion sang pagdumili ang tagsatagsa sang pila ka humalambal nagahatag sing pamulongpulong sang Memoryal sa tatlo ka tuhay nga mga grupo sang pagtinuon, nagalakbay sing likom gikan sa isa ka lokasyon padulong sa lain. Masami nga nagaulan sing mabunok sa gab-i sang Memoryal, kag sanglit ang armada sang mga espiya ni Trujillo nahadlok sa mabunok nga ulan subong sa pagkahadlok sang mga tawo sa iban nga mga duog sa mabaskog nga bagyo, nangin pagpakamaayo ini sa amon.

Sanglit ang pagsulod liwat dumilian sang pangulohan ni Tru­jil­lo, ang kalabanan sang mga misyonero wala magtambong sa internasyonal nga mga kombension sa Siudad sang Nueva York sang 1950 kag 1953. Dapat kami mangin kontento sa report sang The New York Times tuhoy sa kombension, nga naghatag sing matahom nga mga laragway sang kombension kag detalyado nga adlaw-adlaw nga mga paglaragway sa programa. Subong man, ang isa ka lokal nga sinehan naghatag sing malawig nga salida sang daku nga bawtismo sa kombension sang 1953.

Sang 1956 si Roy ­Brandt kag ako ginpatawag agod pamangkuton sang mga opisyal. Una sa amon, gin-agda sang mga opisyal sang pangulohan ni Tru­jil­lo si Broth­er Manuel Hier­re­zuelo nga magkari kag makigkita sa ila. Apang sang ulihi gindala pauli si Manuel sa iya pamilya subong bangkay na. Gani karon, ano ayhan ang matabo sa amon?

Pag-abot namon, ginpamangkot kami nga napain sa isa kag isa, ang amon sabat ginarekord. Wala na sing dugang pa nga natabo, apang duha ka bulan sang ulihi ang mga pamantalaan nagpahibalo nga ginakuha na sang pangulohan ni Tru­jil­lo ang pagdumili sa mga Saksi ni Jehova kag mapadayon namon liwat ang amon hilikuton sa publiko. Gintukod sa liwat ang mga Kingdom Hall, kag ang hilikuton ni Jehova nagpadayon sa pag-uswag.

Apang, sang Hunyo 1957 ang masingki bag-o nga balod sang paghingabot nagsugod, kag ang tanan nga misyonero ginpaguwa sa pungsod. Ang amon paghalin isa gid ka masubo nga adlaw para sa amon. Si Virginia kag ako nag-alagad sing 12 ka tuig sa Do­min­ican Republic kag nakita namon ang kadamuon sang mga Saksi nga nag-uswag halin sa duha lamang sa amon tubtob sa kapin sa 600. Sang 1960 ang ikaduha nga pagdumili ginkuha, kag ang kadamuon sang mga manugbantala nagpadayon sa pag-uswag tubtob sa karon ini mga 10,000!

Pag-alagad sa Puerto Rico

Sang mag-abot kami sa Puerto Rico sang Agosto 1957, ang amon Cristianong mga kauturan subong man ang mga reporter sang pamantalaan didto sa pagbaton sa amon. Ang resulta nga report sang pamantalaan naghatag sing lapnag nga panaksi. Sadto nga tion, kubos sa 1,200 ang manugbantala sang Ginharian sa Puerto Rico; karon may yara halos 22,000!

Sang 1958 gin-agda ako sang Sosiedad nga mangin nagalakbay nga manugtatap. Sa amo, sa sulod sang mga tinuig nakilala namon kag nagpanghikot kami upod sa madamo nga matutom nga kauturan gikan sa tanan nga bahin sang Puerto Rico kag Vir­gin Is­lands. Sang ulihi, ang akon asawa kag ako nangin mga katapo sang lokal nga panimalay Beth­el. Kag sugod sang pagporma sang Komite sang Sanga diri, ginpakamaayo ako ni Jehova nga mangin katapo sini.

Puno ako sing kalipay bangod nabaton ko sing personal gikan kay Jehova ang gintagna nga “isa ka gatos ka pilo sa karon . . . nga mga utod nga lalaki kag mga utod nga babayi kag mga iloy kag mga anak.” (Marcos 10:30) Wala gid ako sing handum nga gamiton ang akon kabuhi sa lain nga paagi sang sa pag-alagad sa iya. Kag gani, samtang ginabalikid ko ang mga 48 ka tuig kutob sang magsugod ako sa pagpayunir, nagakalipay ako sa pagsiling nga, sa pagkamatuod, nakita ko nga maayo si Jehova!—Salmo 34:8.

Samtang ang sugilanon sang kabuhi ni Lennart Johnson sa ibabaw yara sa hingapusan nga paghanda, si Virginia Johnson napatay sing malinong sa iya pagtulog sang Enero 31, 1987

[Kapsion sa pahina 27]

Si Jehova ang naghatag sa iya mga alagad sing kadalag-an sadto nga adlaw!

[Kapsion sa pahina 28]

Gin-apresyar gid sang tanan nga matutom ang espirituwal nga kusog nga padayon nga ginhatag sa ila ni Jehova

[Laragway sa pahina 29]

Si Virginia kag ako nagpanghikot upod sa madamo nga matutom nga kauturan gikan sa tanan nga bahin sang Puerto Rico